സാമ്പത്തിക ബുദ്ധിമുട്ടിലായിരുന്ന ഹോട്ടലുടമ ട്രെയിനിനു മുന്നില്‍ ചാടി ജീവനൊടുക്കി. കുറിച്ചിയിലെ വിനായക ഹോട്ടലുടമ കനകക്കുന്ന് ഗുരുദേവഭവനില്‍ സരിന്‍ മോഹനാണ് (42) മരിച്ചത്. സര്‍ക്കാരിനെതിരെ ഫേസ്ബുക്ക് പോസ്റ്റിട്ട ശേഷമാണ് ആത്മഹത്യ ചെയ്തത്.

ഗള്‍ഫിലായിരുന്ന സരിന്‍ 2020 ആഗസ്റ്റിലാണ് ഹോട്ടല്‍ ആരംഭിച്ചത്. വന്‍ വിജയമായതോടെ ഇതേ കെട്ടിടത്തില്‍ ടെക്സ്‌റ്റൈല്‍ ഷോപ്പിനും സ്പെയര്‍ പാര്‍ട്സ് കടയ്ക്കുമായി ക്രമീകരണങ്ങള്‍ സജ്ജമാക്കി. എന്നാല്‍, രണ്ടാം കൊവിഡ് തരംഗത്തെ തുടര്‍ന്ന് ഹോട്ടല്‍ അടച്ചിടേണ്ട സാഹചര്യം വന്നുപെട്ടതോടെ ബിസിനസാകെ താറുമാറായി.

കെട്ടിടവാടക മാത്രം ഒരു മാസം 35,000 രൂപ നല്‍കേണ്ടതായിരുന്നു. കടംവാങ്ങിയും പണയം വച്ചുമാണ് വാടക നല്‍കിയിരുന്നതും വീട്ടുചെലവു നടത്തിയിരുന്നതും.

കടം കൊടുത്തവര്‍ തിരികെ ചോദിക്കാന്‍ ആരംഭിച്ചതോടെ പിടിച്ചുനില്‍ക്കാനാവാതെയായി. അതേ തുടര്‍ന്നാണ് സരിന്‍ ആത്മഹത്യ ചെയ്തതെന്നാണ് ബന്ധുക്കള്‍ പറയുന്നത്.

ഇളയ കുട്ടി ഓട്ടിസം ബാധിതനാണ്.മൂത്ത കുട്ടി ഒമ്പതാം ക്ലാസിലാണ് . ഇന്നലെ പുലര്‍ച്ചെ നാലരയോടെ ഫേസ്ബുക്ക് പോസ്റ്റിട്ട ശേഷം, കുറിച്ചി ലെവല്‍ ക്രോസിനു സമീപം ട്രെയിനിനു മുന്നില്‍ ചാടുകയായിരുന്നു. മൃതദേഹം മെഡിക്കല്‍ കോളേജ് ആശുപത്രി മോര്‍ച്ചറിയിലേക്കു മാറ്റി.