അപസര്‍പ്പക കഥ പോലെയാണ് കൊച്ചിയിലെ നോറയുടെ കൊലപാതകം. കഥയും. ഇത്രയും ദുരൂഹത നിറഞ്ഞ ഒരച്ഛനും അമ്മൂമ്മയും കാമുകനും. അതിനിടയില്‍ പിടഞ്ഞ് ഇല്ലാതായ ഒന്നരവയസുകാരി. അവസാനം കാമുകന്‍ പ്രതി ജോണ്‍ ബിനോയ് ഡിക്രൂസ് (28) പൊലീസിനോടു എല്ലാം തുറന്നു പറഞ്ഞു.

അകന്നുമാറാന്‍ ശ്രമിച്ചിട്ടും അനുവദിക്കാതിരിക്കുകയും തന്നെ കള്ളക്കേസുകളില്‍ കുടുക്കിയും കുടുംബഛിദ്രമുണ്ടാക്കിയും ദ്രോഹിക്കുകയും ചെയ്തതിലുള്ള വൈരാഗ്യം മൂലമാണു മുത്തശ്ശി സിക്‌സിയുടെ കൊച്ചുമകളെ കൊലപ്പെടുത്തിയതെന്നു ബിനോയ് ഡിക്രൂസ് പൊലീസിനോടു വെളിപ്പെടുത്തി. കുളിമുറിയിലെ ബക്കറ്റിലെ വെള്ളത്തില്‍ കുട്ടിയെ തലകീഴായി മുക്കിപ്പിടിച്ചു ശ്വാസം മുട്ടിച്ചു കൊലപ്പെടുത്തുകയായിരുന്നുവെന്നാണു പ്രതിയുടെ മൊഴി.

നോറ തന്റെയും ജോണിന്റെയും മകളാണെന്നാണു സിക്‌സി ജോണിനോടു പറഞ്ഞിരുന്നത്. ഇക്കാര്യം പറഞ്ഞു ഭീഷണിപ്പെടുത്തുകയും ജോണിന്റെ വീട്ടുകാരുടെ മുന്നില്‍ നാണം കെടുത്തുകയും ചെയ്തതായാണു വിവരം. ഇതേത്തുടര്‍ന്നു ജോണിനെ വീട്ടില്‍നിന്നു പുറത്താക്കിയിരുന്നു.

കുഞ്ഞു മരിക്കുമ്പോള്‍ മുത്തശി മുറിയിലുണ്ടായിരുന്നതാണ് അവര്‍ രക്ഷപ്പെടാന്‍ കാരണം. പുറത്തു പോയിരുന്ന ഇവരെ ജോണ്‍ ബിനോയ് അറിയിച്ചത്, കുഞ്ഞു പാലു കുടിച്ചപ്പോള്‍ നെറുകയില്‍ പോയി അബോധാവസ്ഥയിലായി എന്നായിരുന്നു. രാത്രി ഒന്നരയോടെ ഹോട്ടല്‍ മുറിയിലേയ്ക്ക് എത്തിയ ഇവര്‍ ജീവനക്കാരോടു കുഞ്ഞിന് എന്തോ പറ്റി എന്നു പറഞ്ഞാണ് അകത്തേയ്ക്കു പോയത്. തിരികെ വരുമ്പോള്‍ തോളില്‍ അബോധാവസ്ഥയില്‍ കുഞ്ഞുണ്ടായിരുന്നു. ഉടനെ ആശുപത്രിയില്‍ എത്തിച്ചപ്പോള്‍ പറഞ്ഞതും ഇതു തന്നെയായിരുന്നു.

കുഞ്ഞിന്റെ മരണം സ്വാഭാവികമാണ് എന്നായിരുന്നു ആശുപത്രി അധികൃതരും കരുതിയത്. എന്നാല്‍ സംശയം തോന്നിയ കുഞ്ഞിന്റെ പിതാവ് ആവശ്യപ്പെട്ടതനുസരിച്ചു നടത്തിയ പോസ്റ്റ്‌മോര്‍ട്ടത്തിലാണ് മരണം വെള്ളം അകത്തു ചെന്നാണ് എന്നു ബോധ്യപ്പെട്ടത്. ഇതോടെ ഇരുവരെയും പൊലീസ് ചോദ്യം ചെയ്യുകയായിരുന്നു.

കലൂരില്‍ പിഞ്ചുകുഞ്ഞിനെ ബക്കറ്റില്‍ മുക്കി കൊലപ്പെടുത്തിയ കേസില്‍ അറസ്റ്റിലായ ജോണ്‍ ബിനോയ് ഡിക്രൂസ് പള്ളുരുത്തി ഇഎസ്‌ഐ ആശുപത്രി റോഡില്‍ താമസിക്കുന്ന ആളാണ്. ജോണിനെ ദത്തെടുത്തു വളര്‍ത്തുകയായിരുന്നു എന്നാണ് സമീപവാസികള്‍ നല്‍കുന്ന വിവരം. ഇയാള്‍ ലഹരി ഉപയോഗിച്ചിരുന്നതായും പ്രദേശവാസികള്‍ പറയുന്നു.

ലോഡ്ജില്‍ മുത്തശ്ശിയുടെ സുഹൃത്ത് കൊലപ്പെടുത്തിയ ഒന്നരവയസ്സുകാരിയുടെ പിതാവിനെ നാട്ടുകാര്‍ മര്‍ദിച്ചു. കൊല്ലപ്പെട്ട നോറ മരിയയുടെ പിതാവ് സജീവിനാണ് ഭാര്യ ഡിക്‌സിയുടെ വീടിന് അടുത്തുവച്ചു മര്‍ദ്ദനമേറ്റത്. കൊല്ലപ്പെട്ട നോറയുടെ സംസ്‌കാരം വൈകിട്ട് അഞ്ചരയോടെ കൊച്ചി കറുകുറ്റി പള്ളിയില്‍ നടന്നിരുന്നു. രാത്രി ഏഴരയോടെയാണ് ഡിക്‌സിയുടെ വീട്ടിലേക്കു സജീവ് എത്തിയത്.

അമിതവേഗത്തില്‍ കാറോടിച്ചെത്തിയ ഇയാളെ നാട്ടുകാര്‍ തടയുകയും അസഭ്യവര്‍ഷം നടത്തുകയും കയ്യേറ്റം ചെയ്യുകയും ചെയ്‌തെന്നാണു വിവരം. സ്ഥലത്തുണ്ടായിരുന്ന ചിലര്‍ ചേര്‍ന്ന് ഇയാളെ കാറില്‍ കയറ്റിയിരുത്തിയെങ്കിലും സംഘര്‍ഷാവസ്ഥ അയഞ്ഞില്ല. നാട്ടുകാരും സജീവും തമ്മില്‍ പലവട്ടം വാക്കേറ്റമുണ്ടായി. ഇതിനിടെയാണു സജീവ് എത്തിയ കാര്‍ നാട്ടുകാര്‍ അടിച്ചു പൊളിച്ചത്.

മകളുടെ മരണവാര്‍ത്തയറിഞ്ഞ് അമ്മ ഡിക്‌സി വിദേശത്തുനിന്നും എത്തിയിരുന്നു. സജീവിന്റെ അമ്മ സിപ്‌സിക്കും പ്രതിയായ ബിനോയിക്കും ഒപ്പം ഹോട്ടലിലുണ്ടായിരുന്ന അഞ്ചു വയസ്സുകാരന്‍ മകനെ ഡിക്‌സിക്കും കുടുംബത്തിനും ഒപ്പം വിട്ടയച്ചതായി ശിശുക്ഷേമസമിതി അറിയിച്ചു.