ഇറാന് പരമോന്നത നേതാവ് ആയത്തുള്ള അലി ഖമേനിക്ക് അന്ത്യാഞ്ജലി അര്പ്പിക്കാന് ലക്ഷക്കണക്കിന് ജനങ്ങള് തെരുവിലിറങ്ങിയ വിലാപയാത്രയില്
ഇറാന് പരമോന്നത നേതാവ് ആയത്തുള്ള അലി ഖമേനിക്ക് അന്ത്യാഞ്ജലി അര്പ്പിക്കാന് ലക്ഷക്കണക്കിന് ജനങ്ങള് തെരുവിലിറങ്ങിയ വിലാപയാത്രയില്, അദ്ദേഹത്തിന്റെ മകനും പിന്ഗാമിയുമായ മുജ്തബ ഖമേനിയുടെ അസാന്നിധ്യം അന്താരാഷ്ട്ര തലത്തില് ചര്ച്ചയാകുന്നു. ഞായറാഴ്ച ടെഹ്റാനില് നടന്ന പ്രാര്ത്ഥനാ ചടങ്ങുകളില് ഖമേനിയുടെ മറ്റ് മൂന്ന് ആണ്മക്കള് പങ്കെടുത്തപ്പോഴും പുതിയ പരമോന്നത നേതാവായ മുജ്തബ പ്രത്യക്ഷപ്പെടാതിരുന്നതാണ് അദ്ദേഹത്തിന്റെ ആരോഗ്യസ്ഥിതിയെക്കുറിച്ചും ഒളിയിടത്തെക്കുറിച്ചുമുള്ള ചര്ച്ചകള്ക്ക് വീണ്ടും വഴിവെച്ചിരിക്കുന്നത്.
ടെഹ്റാനിലെ ഇമാം ഖമേനി ഗ്രാന്ഡ് മൊസല്ലയില് നടന്ന ചടങ്ങില് അലി ഖമേനിയുടെ ആണ്മക്കളായ മുസ്തഫ, മെയ്സം, മസൂദ് ഖമേനി എന്നിവര് പിതാവിന്റെ ഭൗതികശരീരം അടങ്ങിയ പെട്ടിക്ക് പിന്നിലായി നില്ക്കുന്ന ദൃശ്യങ്ങള് ഇറാന് സ്റ്റേറ്റ് ടെലിവിഷന് പുറത്തുവിട്ടു. ഇറാന് പ്രസിഡന്റ് മസൂദ് പെസെഷ്കിയന്, പാര്ലമെന്റ് സ്പീക്കര് മുഹമ്മദ് ബാഗര് ഗാലിബാഫ്, ഇസ്ലാമിക് റെവല്യൂഷണറി ഗാര്ഡ് കോര്പ്സ് (ഐ.ആര്.ജി.സി) കമാന്ഡര് ഇന് ചീഫ് അഹമ്മദ് വാഹിദി എന്നിവരും പ്രാര്ത്ഥനയില് പങ്കുചേര്ന്നു.
വിപ്ലവ ആദര്ശങ്ങളുടെ പ്രതീകമായ 'കെഫിയ്യ' സ്കാര്ഫ് കൊണ്ട് മസൂദ് ഖമേനി കണ്ണീര് തുടയ്ക്കുന്ന വൈകാരികമായ ദൃശ്യങ്ങളും പുറത്തുവന്നു. ഇറാനിയന് പതാക പുതപ്പിച്ച ഖമേനിയുടെ ഭൗതികശരീരത്തിനൊപ്പം കഴിഞ്ഞ ഫെബ്രുവരിയിലുണ്ടായ വ്യോമാക്രമണത്തില് കൊല്ലപ്പെട്ട നാല് ബന്ധുക്കളുടെ മൃതദേഹങ്ങളും പൊതുദര്ശനത്തിന് വെച്ചിരുന്നു.
കഴിഞ്ഞ മാര്ച്ചിനാണ് മുജ്തബ ഖമേനി ഇറാന്റെ പുതിയ പരമോന്നത നേതാവായി ചുമതലയേറ്റത്. എന്നാല് അതിനുശേഷം ഇതേവരെ അദ്ദേഹം പരസ്യമായി പ്രത്യക്ഷപ്പെടുകയോ സംസാരിക്കുകയോ ചെയ്തിട്ടില്ല. ഫെബ്രുവരി 28-ന് ഖമേനി കുടുംബത്തിന്റെ വസതിക്ക് നേരെ ഇസ്രായേലും അമേരിക്കയും നടത്തിയ ബോംബാക്രമണത്തില് മുജ്തബയ്ക്ക് ഗുരുതരമായി പരിക്കേറ്റിരുന്നതായാണ് റിപ്പോര്ട്ടുകള്. അദ്ദേഹത്തിന്റെ കാലുകള്ക്ക് പരിക്കേല്ക്കുകയും മുഖത്തിന് വൈരൂപ്യം സംഭവിക്കുകയും ചെയ്തതായി അന്താരാഷ്ട്ര വാര്ത്താ ഏജന്സിയായ റോയിട്ടേഴ്സ് റിപ്പോര്ട്ട് ചെയ്തിരുന്നു. ഈ ആക്രമണത്തിലാണ് മുജ്തബയുടെ ഭാര്യ സെഹ്റ ഹദാദ്-ആദലും കൗമാരക്കാരനായ മകനും കൊല്ലപ്പെട്ടത്.
https://www.facebook.com/Malayalivartha
