തലസ്ഥാനത്തെ വെങ്ങാനൂരിലുള്ള സൂര്യ ഫിനാന്‍സ് എന്ന സ്വകാര്യ ധനകാര്യ സ്ഥാപനത്തിലെ ജീവനക്കാരിയായിരുന്ന വെണ്ണിയൂര്‍ സ്വദേശി അഞ്ജു (28) എന്ന യുവതിയുടെ ജീവനൊടുകയും മറ്റൊരു യുവതി അത്യാസന്ന നിലയില്‍ ആശുപത്രിയില്‍ ചികിത്സയില്‍ കഴിയേണ്ടി വന്നതിന്റെയും കാരണം കനകമാണ്. സ്വര്‍ണം സ്ഥാപന ഉടമ അറിയാതെ തിരിമറി നടത്തിയിരുന്നവരാണ് ആത്മഹത്യക്ക് ശ്രമിച്ചവരും പ്രതിയാക്കപ്പെട്ട് പിടിയിലായ സിന്ധുവും. അഞ്ജു ജീവനൊടുക്കുന്ന അവസ്ഥയിലേക്ക് എത്തിയതില്‍ സിന്ധുവിന്റെ പങ്കു വലിതാണെന്നാണ് പോലീസ് അന്വേഷണത്തില്‍ വ്യക്തമായിരിക്കുന്ന കാര്യം.

സ്വകാര്യ സ്വര്‍ണപണയ സ്ഥാപനത്തിലെ സ്വര്‍ണം കൈക്കലാക്കി തട്ടിപ്പ് നടത്തിയ കേസില്‍ പ്രതി സിന്ധുവിനെതിരെ ആത്മഹത്യ പ്രേരണ കുറ്റം ചുമത്തിയാണ് എഫ്ഐആര്‍ രജിസ്റ്റര്‍ ചെയ്തിരിക്കുന്നത്. യുവതികള്‍ സ്വര്‍ണം തിരികെ ആവശ്യപ്പെട്ടപ്പോള്‍ ലഭിക്കാതെ വന്നതോടെയാണ് യുവതികള്‍ ആത്മഹത്യാ ശ്രമം നടത്തിയത്. പണയം വെച്ചവര്‍ സ്വര്‍ണം തിരികെ എടുക്കാന്‍ എത്തിയപ്പോഴാണ് ജീവനക്കാര്‍ വെട്ടിലായത്. ഇതോടെ ഇവര്‍ സ്വര്‍ണം ആവശ്യപ്പെട്ട് സിന്ധുവെിനെ വിളിച്ചു. എന്നാല്‍ യുവതികളെ കബളിപ്പിച്ച് പണം തട്ടാന്‍ യുവതി ഇതിനോടകം പ്ലാന്‍ ചെയ്തിരുന്നു.

സ്വര്‍ണം തന്നതിന് തെളിവില്ലന്നാണ് സിന്ധു പറഞ്ഞത്. ഇതോടെ തങ്ങള്‍ മരിക്കുമെന്ന് യുവതികള്‍ പറഞ്ഞിരുന്നു. എന്നാല്‍ പോയി മരിക്കാനാണ് സിന്ധു അവരോട് പറഞ്ഞതെന്ന് എഫ്ഐആറില്‍ പരാമര്‍ശിക്കുന്നു. പ്രതിയുടെ മറ്റ് തട്ടിപ്പുകളെ കുറിച്ച് അന്വേഷിക്കുകയാണെന്നും വിഴിഞ്ഞം പോലീസ് വ്യക്തമാക്കി. സിന്ധുവിന്റെ തട്ടിപ്പിന് ഇരയായി രണ്ടു പേരാണ് കഴിഞ്ഞ ദിവസം ജീവനൊടുക്കാന്‍ ശ്രമിച്ചത്.

ഇതില്‍ വെങ്ങാനൂര്‍ സ്വദേശി അഞ്ജു ചികിത്സയിലിരിക്കെ തിരുവനന്തപുരം മെഡിക്കല്‍ കോളേജില്‍ വെച്ച് മരിച്ചു. സ്വര്‍ണം കൈക്കലാക്കിയ ശേഷം അമേരിക്കയിലേക്ക് കടന്ന സിന്ധു, മകള്‍ക്കൊപ്പം താമസിക്കുകയായിരുന്നു. മരിച്ച അഞ്ജുവില്‍ നിന്നും 20ലക്ഷം കൈക്കലാക്കിയ പ്രതി ജീവനൊടുക്കാന്‍ ശ്രമിച്ച ഐശ്വര്യയില്‍ നിന്നും അമ്പത് പവനാണ് വാങ്ങിയത്. വെങ്ങാനൂര്‍ അമരവിളയിലുള്ള സൂര്യ ഫിനാന്‍സിലെ ജീവനക്കാരാണ് മരിച്ച അഞ്ജുവും ചികിത്സയില്‍ കഴിയുന്ന ഐശ്വര്യയും.

പ്രതി സിന്ധുവിന്റെ മകന്‍ രാഷ്ട്രപതിയുടെ പൈലറ്റും ഭര്‍ത്താവ് വിരമിച്ച് സൈനിക ഉദ്യോഗസ്ഥനുമാണ്. ശനിയാഴ്ച രാത്രി പത്തു മണിയോടെയാണ് സിന്ധു അറസ്റ്റിലായത്. ഇവരുടെ മൊബൈല്‍ ഫോണില്‍ നിന്നും പൊലീസിന് നിരവധി തെളിവുകള്‍ ലഭിച്ചിട്ടുണ്ട്. കൂടുതല്‍ പേര്‍ ഇവര്‍ക്കെതിരെ പരാതിയുമായി രംഗത്തെത്തിയിട്ടുണ്ട്. പാപ്പനംകോട് മറ്റൊരു ബാങ്കിംഗ് സ്ഥാപനം നടത്തിയപ്പോഴും സിന്ധി ചില തട്ടിപ്പുകള്‍ നടത്തിയതായി സൂചനയുണ്ട്.

പോലീസ് അന്വേഷണത്തില്‍ പുറത്തുവരുന്ന വിവരങ്ങള്‍ അനുസരിച്ച് ഇവരുടെ ആത്മഹത്യാ ശ്രമത്തിന് സ്വര്‍ണ്ണം സംബന്ധിച്ച ഇടപാടാണ്. സൂര്യ ഫിനാന്‍സിന്റെ വിഴിഞ്ഞം, അമരിവിള ശാഖകളില്‍ പണയമിരുന്ന യഥാര്‍ത്ഥ ഉടമകളുടെ സ്വര്‍ണം ഈ ജീവനക്കാരികള്‍ ചേര്‍ന്ന് തങ്ങളുടെ സിന്ധുവിന് മറിച്ച് നല്‍കുകയായിരുന്നു. ഒന്നും രണ്ടുമല്ല, 70 പവന്‍ സ്വര്‍ണമാണ് ഇത്തരത്തില്‍ ബാങ്കില്‍ നിന്നും ഇവര്‍ പുറത്തേക്ക് കടത്തിയത്.

ബാങ്കിലെ സ്വര്‍ണം സിന്ധുവിന് കൊടുത്ത് പുറത്തുള്ള മറ്റ് സ്ഥാപനങ്ങളില്‍ ഉയര്‍ന്ന തുകയ്ക്ക് പണയം വെപ്പിക്കുന്നതിലൂടെ ഈ ജീവനക്കാരികള്‍ക്ക് വന്‍ തുക കമ്മീഷനായി ലഭിച്ചിരുന്നു എന്നാണ് വിവരം. കുറച്ചു നാളായി ഈ 'ബിസിനസ്' സുഗമമായി നടന്നു വരികയായിരുന്നു. എന്നാല്‍ കഴിഞ്ഞ ദിവസങ്ങളില്‍ സ്വര്‍ണത്തിന്റെ യഥാര്‍ത്ഥ ഉടമകള്‍ പണം തിരികെ നല്‍കി സ്വര്‍ണം വീണ്ടെടുക്കാനായി സൂര്യ ഫിനാന്‍സില്‍ എത്തിയതോടെയാണ് കഥ മാറിയത്.