ഉന്നത വിദ്യാഭ്യാസത്തില്‍ സമഗ്രമാറ്റം നിര്‍ദ്ദേശിക്കുന്ന പരീക്ഷാ പരിഷ്‌കരണ സമിതി റിപ്പോര്‍ട്ട് നടപ്പാക്കുന്നതോടെ ബിരുദ, ബിരുദാനന്തര കോഴ്‌സുകളില്‍ വിജയ ശതമാനം കുതിച്ചുയരും. എഴുത്തുപരീക്ഷ 60, ഇന്റേണല്‍ 40 മാര്‍ക്കിനാക്കുന്നതാണ് ഗുണം ചെയ്യുന്നത്.


നിലവില്‍ ബിരുദത്തിന് ഇത് 80, 20 മാര്‍ക്ക് വീതമാണ്. വിജയിക്കാന്‍ ഇന്റേണലിന് 7, എഴുത്തുപരീക്ഷയ്ക്ക് 28 മാര്‍ക്ക് മിനിമം വേണം. ഇന്റേണലിന് വിജയിക്കാന്‍ മിനിമം മാര്‍ക്കെന്ന വ്യവസ്ഥ ഇനി ഒഴിവാകും. എഴുത്തുപരീക്ഷയ്ക്ക് 21മാര്‍ക്കെങ്കിലും വേണം.

ഇന്റേണലില്‍ 20 മാര്‍ക്കിനായി കോളേജില്‍ എഴുത്തുപരീക്ഷ നടത്തണം. വിദ്യാര്‍ത്ഥികളുടെ ഉയര്‍ന്ന ചിന്താശേഷി പരിശോധിക്കുന്നതിനുള്ള ഘടകങ്ങളാണ് ഇതിലുണ്ടാവേണ്ടത്. 5 ഇന്റേണല്‍ മാര്‍ക്കിന് ഹാജര്‍ മാനദണ്ഡമാക്കുന്നത് ഒഴിവാക്കും. നിലവില്‍ 90 ശതമാനം ഹാജരുള്ളവര്‍ക്കാണ് 5 മാര്‍ക്കും നല്‍കുന്നത്.

പി.ജി കോഴ്‌സുകളില്‍ നിലവില്‍ 75 മാര്‍ക്കിന്റെ എഴുത്തുപരീക്ഷയും 25ന് ഇന്റേണലുമാണ്. വിജയിക്കാന്‍ എഴുത്തുപരീക്ഷയ്ക്ക് മാത്രം 40 ശതമാനവും രണ്ടിനും ചേര്‍ത്ത് 50 ശതമാനവും മാര്‍ക്കു വേണം.ഇന്റേണല്‍ മാര്‍ക്ക് കുറച്ചാല്‍ വകുപ്പ്, കോളേജ്, സര്‍വകലാശാല തലങ്ങളില്‍ പരാതിപ്പെടാം.

പി.ജി പ്രവേശനത്തിന് ദേശീയതലത്തില്‍ വിജ്ഞാപനം ചെയ്തശേഷം പ്രവേശനപരീക്ഷ നടത്തുന്നതിനാല്‍ അന്യസംസ്ഥാന വിദ്യാര്‍ത്ഥികള്‍ക്കും ഇവിടെ പ്രവേശനം നേടാം.

പ്രകൃതിക്ഷോഭം കാരണമല്ലാതെ പരീക്ഷകള്‍ മാറ്റരുതെന്നാണ് ശുപാര്‍ശ. പരീക്ഷകള്‍ അടിക്കടി മാറ്റിവയ്ക്കുന്നതും ഇതോടെ ഒഴിവാകും.വര്‍ഷം നഷ്ടപ്പെടാതിരിക്കാന്‍ പ്രത്യേക പരീക്ഷ അവസാന സെമസ്റ്ററിലെ രണ്ട് വിഷയങ്ങളില്‍ മാത്രം പരാജയപ്പെട്ടവര്‍ക്ക് തൊഴിലിനും ഉപരിപഠനത്തിനും അവസരമൊരുക്കാനും ഒരു വര്‍ഷം നഷ്ടപ്പെടാതിരിക്കാനുമായി പ്രത്യേക സപ്ലിമെന്ററി പരീക്ഷ നടത്തും.

എല്ലാ സര്‍വകലാശാലകളിലും ഡിജിറ്റല്‍ ചോദ്യബാങ്ക് നിര്‍ബന്ധം. അതില്‍ നിന്നാവും ചോദ്യങ്ങള്‍. പ്രവേശനത്തിന് ടി.സി നിര്‍ബന്ധമല്ല.

30ദിവസത്തിനകം ഫലപ്രഖ്യാപനം 15ദിവസത്തിനകം പ്രൊവിഷണല്‍ ബിരുദം 30ദിവസത്തിനകം ബിരുദസര്‍ട്ടിഫിക്കറ്റ്''പരീക്ഷാ പരിഷ്‌കരണ ശുപാര്‍ശകള്‍ വേഗത്തില്‍ നടപ്പാക്കാന്‍ നിര്‍വഹണ സമിതി രൂപീകരിക്കുമെന്നും മന്ത്രി.