മക്കള്‍ കാണിച്ചുകൂട്ടുന്ന കോപ്രായങ്ങള്‍ക്ക് പഴി അപ്പനും അമ്മയ്ക്കും... കോപ്രായങ്ങള്‍ക്കിടയില്‍ ഇവര്‍ക്ക് എന്തെങ്കിലും സംഭവിച്ചാല്‍ ഇല്ലാതാകുന്നതും അപ്പനും അമ്മയ്ക്കുമാണെന്ന് ഈ യുവ തലമുറ ഇനി എന്ന് മനസ്സിലാക്കും. ആലപ്പുഴ വലിയഴിക്കല്‍ പാലത്തില്‍ യുവാക്കളുടെ അപകടകരമായ അഭ്യാസപ്രകടനം കണ്ട് ഞെട്ടിയിരിക്കുകയാണ് നാട്ടുകാര്‍.

12 മീറ്റര്‍ ഉയരവും 110 മീറ്റര്‍ നീളവുമുള്ള ആര്‍ച്ച് സ്പാനിലൂടെ നടന്ന് കയറിയാണ് യുവാക്കളുടെ സാഹസികത. ആലപ്പുഴ ജില്ലയിലെ ആറാട്ടുപുഴ പഞ്ചായത്തിനെയും കൊല്ലം ജില്ലയിലെ ആലപ്പാട്ടിനെയും തമ്മില്‍ ബന്ധിപ്പിച്ച് കായംകുളം കായലിനു കുറുകെ നിര്‍മ്മിച്ചിരിക്കുന്ന സംസ്ഥാനത്തെ തന്നെ ഏറ്റവും വലിയ ആര്‍ച്ച് പാലമാണ് വലിയഴീക്കലേത്.

ദക്ഷിണേഷ്യയിലെ തന്നെ ഏറ്റവും നീളം കൂടിയ ബോസ്ട്രിങ് ആര്‍ച്ചാണ് പാലത്തിന്റെ പ്രധാന ആകര്‍ഷണങ്ങളില്‍ ഒന്ന്. ഈ ആര്‍ച്ച് സ്പാനിലൂടെ കയറിയാണ് യുവാക്കള്‍ അപകടകരമായ പ്രകടനത്തിനു മുതിര്‍ന്നത്. ഇതിന്റെ വീഡിയോ ദൃശ്യങ്ങള്‍ പുറത്ത് വന്നു. രണ്ട് പേരാണ് ദൃശ്യങ്ങളിലുള്ളത്. മറ്റ് രണ്ട് പേര്‍ മൊബൈലില്‍ ദൃശ്യങ്ങള്‍ പകത്തുന്നതും പുറത്ത് വന്ന വീഡിയോയില്‍ ദൃശ്യമാണ്.

നേരത്തെയും പാലത്തിന് മുകളില്‍ സമാനമായ രീതിയില്‍ യുവാക്കളുടെ അഭ്യാസപ്രകടനങ്ങളുടെ ദൃശ്യങ്ങള്‍ പുറത്ത് വന്നിരുന്നു. ബൈക്കില്‍ അഭ്യാസങ്ങള്‍ നടത്തിയ യുവാക്കള്‍ക്കെതിരെ പൊലീസ് കഴിഞ്ഞ ദിവസം കേസെടുത്ത സാഹചര്യവുമുണ്ട്. തുടര്‍ന്ന് പോലീസും മോട്ടോര്‍ വാഹനവകുപ്പും ഇവിടെ പരിശോധനയും ബോധവല്‍ക്കരണവും നടത്തിയിരുന്നു.

ഇപ്പോള്‍ സാമൂഹിക മാധ്യമങ്ങളിലൂടെ പ്രചരിക്കുന്ന ഈ യുവാക്കളുടെ സാഹസിക പ്രകടന വീഡിയോയ്ക്ക് രൂക്ഷ വിമര്‍ശനമാണ് പ്രതികരണമായി ലഭിച്ചുകൊണ്ടിരിക്കുന്നത്. ചിലര്‍ 'തിന്നിട്ട് എല്ലിനിടയില്‍ കയറുന്നതാണ് എന്നു വിമര്‍ശിച്ചപ്പോള്‍, പെയിന്‍്‌റിങ്ങിന് കയറിയതാണെന്നായിരുന്നു മറ്റു ചിലരുടെ പരിഹാസം.

എന്നാലും ചിലരെങ്കിലും ഈ സാഹസികത കാണുമ്പോള്‍ അറിയാതെയെങ്കിലും ഇവരെ വളര്‍ത്തി വലുതാക്കിയവരെ ഒരു നിമിഷമെങ്കിലും ഓര്‍ക്കും. എന്തിനാണ് മക്കളെ ഇങ്ങനെ വളര്‍ത്തുന്നത് എന്ന്?