ശ്രീകൃഷ്ണ ജയന്തി ഇന്ന്.... നാടെങ്ങും ഭഗവാന്‍ ഉണ്ണിക്കണ്ണന്റെ പിറന്നാള്‍ ദിനമായ അഷ്ടമി രോഹിണിയുടെ ആഘോഷത്തില്‍... ബാലഗോകുലത്തിന്റെ ആഭിമുഖ്യത്തില്‍ നിരവധി കേന്ദ്രങ്ങളില്‍ ശോഭായാത്രകള്‍ നടക്കും... ഗുരുവായൂരും അമ്പലപ്പുഴയും വന്‍ ഭക്തജന തിരക്ക്.

ഗുരുവായൂര്‍ അടക്കമുള്ള പ്രധാന ശ്രീ കൃഷ്ണ ക്ഷേത്രങ്ങളില്‍ എല്ലാം പ്രത്യേക ചടങ്ങുകള്‍ ഉണ്ട്. കുട്ടികള്‍ക്കായി വിവിധ സംഘടനകള്‍ മത്സരങ്ങളും കലാപരിപാടികളും സംഘടിപ്പിച്ചിട്ടുണ്ട്. കൊവിഡ് നിയന്ത്രണങ്ങള്‍ പിന്‍വലിച്ചശേഷം ഉള്ള ആദ്യ ശ്രീ കൃഷ്ണ ജയന്തി ആയതിനാല്‍ ആഘോഷങ്ങള്‍ വിപുലമാക്കിയിട്ടുണ്ട്

ഹിന്ദുമത വിശ്വാസപ്രകാരം കൃഷ്ണ ജന്മാഷ്ടമി വ്രതം വളരെ ഗംഭീരമായി ആഘോഷിക്കുന്നു. പുരാണങ്ങള്‍ അനുസരിച്ച്, ഭദ്രപാദയിലെ കൃഷ്ണപക്ഷത്തിലെ അഷ്ടമി തിഥിയിലാണ് ശ്രീകൃഷ്ണന്‍ ജനിച്ചത്. രാജ്യത്തങ്ങോളമിങ്ങോളമുള്ള നിരവധി ഭക്തര്‍ ശ്രീകൃഷ്ണനെ ഈ ദിവസം ആരാധിക്കുകയും വ്രതം അനുഷ്ഠിക്കുകയും ചെയ്യുന്നു.

ഗുരുവായൂര്‍ ഉള്‍പ്പെടെയുള്ള ശ്രീകൃഷ്ണ പ്രതിഷ്ഠയുള്ള ക്ഷേത്രങ്ങളില്‍ വിപുലമായ ചടങ്ങുകളാണ് ശ്രീകൃഷ്ണ ജയന്തിയോട് അനുബന്ധിച്ചു നടക്കുക. ബാലഗോകുലത്തിന്റെ ആഭിമുഖ്യത്തില്‍ പതിവ് പോലെ സംസ്ഥാനത്തെമ്പാടും ശോഭായാത്രകള്‍ നടക്കും. ചിങ്ങമാസത്തിലെ അഷ്ടമിയും രോഹിണിയും ചേര്‍ന്ന് വരുന്ന ദിവസത്തിലാണ് ശ്രീകൃഷ്ണന്റെ ജനനം.

എന്നാല്‍ അഷ്ടമിയും രോഹിണിയും അര്‍ധരാത്രിയില്‍ വരുന്ന ദിനമാണ് കേരളീയര്‍ പൊതുവെ ജന്മാഷ്ടമിയായി കണക്കാക്കുന്നത്.

ആറന്മുള അഷ്ടമിരോഹിണി വള്ളസദ്യയും ഇന്ന്. രാവിലെ 11.30 ന് തിരുവതാംകൂര്‍ ദേവസ്വം ബോര്‍ഡ് പ്രസിഡന്റ് കെ അനന്തഗോപന്‍ കൊടിമരച്ചുവട്ടില്‍ വിളക്ക് കൊളുത്തി ഉദ്ഘാടനം ചെയ്യും. 401 പറ അരിയുടെ സദ്യയാണ് ഒരുക്കുന്നത്. പതിനായിരക്കണക്കിന് ആളുകള്‍ അഷ്ടമി രോഹിണി വള്ളസദ്യയില്‍ പങ്കെടുക്കും.