മദ്യപാനം എപ്പോഴും അങ്ങനെയാണ്. സന്തോഷം വന്നാലും കുടിച്ച് ആഘോഷിക്കും ദു:ഖം വന്നാലും കുടിച്ച് ആശ്വസിക്കും. ഇപ്പോഴിതാ ലോകകപ്പ് വന്നപ്പോഴും അതാണ് സ്ഥിതി. ലോക കപ്പ് ഫുട്‌ബോളിന്റെ കലാശ പോരാട്ടത്തില്‍ അര്‍ജന്റീനയ്ക്കും ഫ്രാന്‍സിനും ഐക്യദാര്‍ഢ്യം പ്രഖ്യാപിക്കാന്‍ കേരളീയര്‍ കുടിച്ചത് 56 കോടിയുടെ മദ്യം.

ഫുട്‌ബോള്‍ ആവേശം സിരകളില്‍ കൊഴുത്തുകയറിയപ്പോള്‍ ബെവ്‌കോയുടെ ഒരു ദിവസത്തെ വരുമാനത്തില്‍ വന്ന വര്‍ദ്ധന 21 കോടിയോളം രൃപ. സാധാരണ ദിവസങ്ങളില്‍ ശരാശരി 35 കോടിയും ഞായറാഴ്ചകളില്‍ 40 കോടിയുമാണ് ബെവ്‌കോ ഷോപ്പുകള്‍ വഴിയുള്ള വില്പന.ബെവ്‌കോയുടെയും കണ്‍സ്യൂമര്‍ഫെഡിന്റെയും ചില്ലറ വില്പന ശാലകള്‍ വഴി കഴിഞ്ഞ ഞായറാഴ്ച വിറ്റത് 50 കോടിയുടെ മദ്യമാണ്.

ശനിയാഴ്ച വെയര്‍ ഹൗസുകളില്‍ നിന്ന് ബാറുകള്‍ വാങ്ങിയത് ആറു കോടിയുടെ മദ്യവും. കഴിഞ്ഞ ദിവസം വിദേശ മദ്യത്തിന്റെ വില്പന നികുതി നാല് ശതമാനവും കൈകാര്യ ചെലവ് ഒരു ശതമാനവും കൂട്ടിയതോടെ മദ്യത്തിന്റെ വിലിയല്‍ മാറ്റം വന്നു. രാത്രിയിലാണ് വില വര്‍ദ്ധന നടപ്പാക്കാനുള്ള നിര്‍ദ്ദേശം വെയര്‍ഹൗസ് മാനേജര്‍മാര്‍ക്കും റീജിയണല്‍ മാനേജര്‍മാര്‍ക്കും കിട്ടിയത്.

പുതുക്കിയ വില കണക്ക് കൂട്ടാന്‍ ബെവ്‌കോ ഐ.ടി വിഭാഗം അശ്രാന്ത പരിശ്രമം നടത്തുന്നതനിടെയാണ് ലോക കപ്പ് ഫൈനല്‍ എത്തുന്നത്. കൂടുതല്‍ വില്പന നടന്ന ഷോറൂമുകള്‍ ഏതെല്ലാമെന്ന് തിട്ടപ്പെടുത്തി വരുന്നേയുള്ളു.

ഇന്ത്യന്‍ നിര്‍മ്മിത വിദേശ മദ്യത്തിന് സര്‍ക്കാര്‍ പ്രഖ്യാപിച്ചിരുന്ന വിലവര്‍ദ്ധന കഴിഞ്ഞ ദിവസം പ്രാബല്യത്തിലായി. ബ്രാന്‍ഡുകളുടെ വ്യത്യാസം അനുസരിച്ച് ഫുള്‍ ബോട്ടിലിന് (750 മില്ലി) 10 മുതല്‍ പരമാവധി 30 രൂപ വരെയാണ് വര്‍ദ്ധിച്ചിട്ടുള്ളത്. നിയമസഭ പാസാക്കിയ പൊതുവില്പന ഭേദഗതി ബില്ലില്‍ വെള്ളിയാഴ്ച ഗവര്‍ണര്‍ ഒപ്പിട്ടതോടെയാണ് വില വര്‍ദ്ധന നടപ്പായത്. വൈനിന്റെ വില്പന നികുതി 84 ശതമാനമായി കുറച്ചതിനാല്‍ രണ്ടാഴ്ച മുമ്പ് വിലയില്‍ നേരിയ കുറവ് വന്നിരുന്നു. ബിയറിന്റെ വിലയുടെ കാര്യത്തില്‍ ബെവ്‌കോയുടെ തീരുമാനം വന്നിട്ടില്ല.

ജനുവരി ഒന്നുമുതല്‍ വില വര്‍ദ്ധിപ്പിക്കുമെന്നാണ് പറഞ്ഞിരുന്നതെങ്കിലും കഴിഞ്ഞ ദിവസം മുതല്‍ വര്‍ദ്ധന പ്രാബല്യത്തില്‍ വരുത്താന്‍ ബെവ്‌കോ വെയര്‍ഹൗസ് മാനേജര്‍മാര്‍ക്കും റീജിയണല്‍ മാനേജര്‍മാര്‍ക്കും നിര്‍ദ്ദേശം നല്‍കുകയായിരുന്നു. വില്പന നികുതി നാല് ശതമാനവും ബെവ്‌കോയുടെ കൈകാര്യ ചെലവ് (മാര്‍ജിന്‍) ഒരു ശതമാനവുമാണ് കൂട്ടിയത്.

സര്‍ക്കാര്‍ ഉത്പന്നമായ ജവാന്‍ റം ഒരു ലിറ്ററിന് 600 രൂപയായിരുന്നത് 610 ആയി. 400 രൂപ വരെ വിലയുള്ള ജനപ്രിയ ബ്രാന്‍ഡുകള്‍ക്ക് ഫുള്‍ ബോട്ടിലിന് 10 രൂപയുടെയും അതിന് മുകളില്‍ വിലയുള്ളതിന് 20 രൂപയുടെയും വര്‍ദ്ധനയുണ്ടായിട്ടുണ്ട്. ചില്ലറ വില്പനശാലകള്‍ക്ക് പുറമെ സംസ്ഥാനത്തെ ബാറുകളും ഇന്നലെ മുതല്‍ വിലവര്‍ദ്ധന നടപ്പാക്കി. നേരത്തെ സ്റ്റോക്ക് ചെയ്തിട്ടുള്ള മദ്യവും പുതിയ നിരക്കില്‍ വില്‍ക്കുന്നതിലൂടെ ബാറുകാര്‍ക്ക് നല്ല കൊയ്ത്തുമായി.

ഒരറ്റത്ത് കുടിച്ച് തീര്‍ത്തപ്പോള്‍ മററ്റത്ത് ബിരിയാണിയുമുണ്ടായിരുന്നു. ഫിഫ വേള്‍ഡ് കപ്പില്‍ അര്‍ജന്റീനയുടെ മെസിപ്പട ഖത്തറില്‍ കപ്പുയര്‍ത്തിയാല്‍ സൗജന്യമായി ബിരിയാണി നല്‍കുമെന്ന വാക്ക് പാലിച്ച് ഹോട്ടലുടമ. അര്‍ജന്റീനയുടെ കടുത്ത ആരാധകരായ തൃശൂര്‍ ചേറൂര്‍ പള്ളിമൂലയിലെ റോക്ക് ലാന്റ് ഹോട്ടലാണ് സൗജന്യ ബിരിയാണി നല്‍കുന്നത്.

ആള്‍ക്കാര്‍ വരുന്തോറും ബിരിയാണി കൊടുക്കും, മെസി കപ്പില്‍ മുത്തമിട്ട നിമിഷമാണ്. ഞങ്ങള്‍ തകര്‍ക്കുമെന്ന് ഹോട്ടലുടമ പറഞ്ഞു. ബിരിയാണി ചെമ്പ് പൊട്ടിച്ചത് മുതല്‍ ഹോട്ടലിന് മുന്നില്‍ നീണ്ട ക്യൂവാണ്. ഇന്നലെ രാവിലെ പതിനൊന്നരയോടെയാണ് ഭക്ഷണ വിതരണം ആരംഭിച്ചത്.

കേരളത്തില്‍ തന്നെ ഇതാദ്യമായാണ് ഇങ്ങനെ ആരാധന മൂത്ത് വേറിട്ട രീതിയില്‍ ആഘോഷം നടത്തുന്നത്. തൃശൂര്‍ ചേറൂര്‍ പള്ളിമൂലയിലെ ഷിബു പൊറത്തൂരിന്റെ ഉടമസ്ഥതയിലുള്ള റോക്ക് ലാന്റ് ഹോട്ടലില്‍, ഇന്നലെ അര്‍ജന്റീന കപ്പുയര്‍ത്തിയതിന് തൊട്ടുപിന്നാലെ തന്നെ ബിരിയാണി വിതരണത്തിനായുള്ള തയ്യാറെടുപ്പുകള്‍ തുടങ്ങിയിരുന്നു. അതോടെ വാര്‍ത്തകളിലും നിറഞ്ഞു. അങ്ങനെ മലയാളികള്‍ തിന്നും കുടിച്ചും ആഘോഷിച്ചു.