മോഡിക്ക് സ്തുതി പാടി... അവസാനം നേതൃത്വം കൈവിട്ടു; അനില് ആന്റണിക്ക് പകരക്കാരനായി ഡോ. പി സരിന്
ഗുജറാത്ത് കലാപത്തില് പ്രധാനമന്ത്രി നരേന്ദ്രമോഡിയുടെ പങ്കു ആരോപിക്കുന്ന 'ഇന്ത്യ: ദി മോദി ക്വസ്റ്റിയന്' ഡോക്യുമെന്ററി കേന്ദ്ര സര്ക്കാര് വിലക്കേര്പ്പെടുത്തിയിരുന്നു. എന്നാല് ഡോക്യുമെന്ററിയെ രാഹുല് ഗാന്ധിയടക്കം സ്വാഗതം ചെയ്യുകയും സംസ്ഥാനത്ത് ഡോക്യുമെന്ററി പ്രദര്ശനത്തിന് കെപിസിസി മുന്കൈയെടുക്കുകയും ചെയ്തിരുന്നു.
ഇപ്പോള് ഗുജറാത്ത് കലാപവുമായി ബന്ധപ്പെട്ട് ബിബിസി പുറത്തിറക്കിയ ഡോക്യുമെന്ററി വിവാദത്തില് നരേന്ദ്രമോഡിക്ക് അനുകൂല പരാമര്ശം നടത്തിയതിനെ തുടര്ന്ന് രാജിവെച്ച അനില് ആന്റണിക്ക് പകരക്കാരനായി ഡോ. പി സരിനെ കോണ്ഗ്രസ് നിയമിച്ചിരിക്കുകയാണ്. അനില് ആന്റണി ചുമതല വഹിച്ചിരുന്ന കെപിസിസി ഡിജിറ്റല് മീഡിയ കണ്വീനര് സ്ഥാനമാണ് ഡോ. സരിന് നല്കുന്നത്. കമ്മിറ്റി പുന:സംഘടിപ്പിക്കാനും ധാരണയായിട്ടുണ്ട്. രാഹുല് മാങ്കൂട്ടത്തില്, ബിആര്എം ഷെഫീര്, നിഷ സോമന്, ടിആര്, രാജേഷ്.താരാ ടോജോ അലക്സ് വീണ നായര് എന്നിവരെ അംഗങ്ങളായി സജീവമായി പരിഗണിക്കുന്നുണ്ട്. അടുത്ത ദിവസം ഔദ്യോഗിക പ്രഖ്യാപനം വരും.
നിയമസഭാ തെരഞ്ഞെടുപ്പില് ഒറ്റപ്പാലം മണ്ഡലത്തിലെ കോണ്ഗ്രസ് സ്ഥാനാര്ഥിയായിരുന്നു സരിന്. ഗുജറാത്ത് കലാപത്തെ സംബന്ധിച്ച് ബിബിസി രണ്ട് എപ്പിസോഡുകളിലായി പുറത്തിറക്കിയ ഡോക്യുമെന്ററി വലിയ വിവാദത്തിലായിരുന്നു. ഡോക്യുമെന്ററിക്ക് കേന്ദ്രസര്ക്കാര് വിലക്കേര്പ്പെടുത്തിയപ്പോള് പ്രദര്ശിപ്പിക്കുമെന്ന് കോണ്ഗ്രസ് വെല്ലുവിളിച്ച സമയത്താണ് അനില് ആന്റണി ബിജെപിക്കും മോദിക്കും അനുകൂലമായ പരാമര്ശം നടത്തിയത്. തുടര്ന്ന് പാര്ട്ടിക്കുള്ളില് നിന്നുതന്നെ വലിയ പ്രതിഷേധം നേരിട്ടതോടെ സ്ഥാനം രാജിവെച്ചു.
കോണ്ഗ്രസ് നേതൃത്വത്തിന് ചുറ്റും സ്തുതിപാഠകരാണെന്ന് രാജിവെച്ച ശേഷം അനില് ആന്റണി പ്രതികരിച്ചിരുന്നു. തന്നോട് പ്രതികരിച്ചവര് കാപട്യക്കാരായിരുന്നു. യോഗ്യതയെക്കാള് സ്തുതിപാഠകര്ക്കാണ് സ്ഥാനമെന്നും അനില് ആന്റണി പ്രതികരിച്ചു. പാര്ട്ടി വിടില്ലെന്നും വ്യക്തിപരമായ ചുമതലകളുമായി മുന്നോട്ട് പോകുമെന്നും അദ്ദേഹം പ്രതികരിച്ചു. എഐസിസി സോഷ്യല് മീഡിയ കോര്ഡിനേറ്റര് അടക്കമുള്ള പദവി രാജിവച്ചതിന് പിന്നാലെയായിരുന്നു അനില് ആന്റണിയുടെ പ്രതികരണം.
ബിബിസി ഡോക്യുമെന്ററിയെ രാഹുല് ഗാന്ധിയടക്കം സ്വാഗതം ചെയ്യുകയും സംസ്ഥാനത്ത് ഡോക്യുമെന്ററി പ്രദര്ശനത്തിന് കെപിസിസിയും മുന്കൈയെടുക്കുകയും ചെയ്തപ്പോഴായിരുന്നു നേതൃത്വത്തെ ഞെട്ടിച്ച് അനില് ആന്റണി ബിബിസിയെ തള്ളി പറഞ്ഞത്. ബിബിസിയുടെ നടപടി ഇന്ത്യയുടെ പരമാധികാരത്തിന് മേലുള്ള കടന്നുകയറ്റമാണെന്നും മുന്വിധിയുടെ ചരിത്രമുള്ള ചാനലാണ് ബിബിസിയെന്നുമായിരുന്നു അനില് ആന്റണിയുടെ ട്വീറ്റ്. പരാമര്ശം വിവാദമായതോടെ അനിലിനെതിരെ കടുത്ത വിമര്ശനമാണ് കോണ്ഗ്രസില് ഉയര്ന്നത്. അനില് ആന്റണിയുടെ പരാമര്ശം പാര്ട്ടി നിലപാട് അല്ലെന്ന് നേതാക്കള് തിരുത്തിയിട്ടും അനില് അഭിപ്രായത്തില് ഉറച്ച് നിന്നതില് ശക്തമായ എതിര്പ്പാണ് ഉയര്ന്നത്.
ഗുജറാത്ത് കലാപത്തില് പ്രധാനമന്ത്രി നരേന്ദ്രമോഡിയുടെ പങ്കു ആരോപിക്കുന്ന 'ഇന്ത്യ: ദി മോദി ക്വസ്റ്റിയന്' ഡോക്യുമെന്ററി സംസ്ഥാന വ്യാപകമായി പ്രദര്ശിപ്പിച്ചത് ഡിവൈഎഫ്ഐയും എസ്എഫ്ഐയുമാണ്. തിരുവനന്തപുരം ലോ കോളേജിലും കണ്ണൂര് സര്വ്വകലാശാലയിലും കോഴിക്കോട് മുതലക്കുളത്തും പാലക്കാട് വിക്ടോറിയ കോളേജിലുമാണ് ഡോക്യുമെന്ററി പ്രദര്ശിപ്പിച്ചത്.കോഴിക്കോട് നടന്ന പ്രദര്ശനം ഡിവൈഎഫ്ഐ സംസ്ഥാന പ്രസിഡന്റ് വി വസീഫ് സ്വിച്ച് ഓണ് ചെയ്തു. മുതലക്കുളം സരോജ് ഭവന് പുറത്ത് പൊലീസ് കാവലിലാണ് ഡോക്യുമെന്ററി പ്രദര്ശിപ്പിച്ചത്.
കണ്ണൂര് യൂണിവേഴ്സിറ്റി മാങ്ങാട്ടുപറമ്പ് ക്യാമ്പസിലെ സെമിനാര് ഹാളിന് പുറത്തുവച്ചാണ് ഡോക്യുമെന്ററി എസ്എഫ്ഐ നേതൃത്വത്തില് പ്രദര്ശിപ്പിച്ചത്. വിക്ടോറിയ കോളേജിലെ എസ്എഫ്ഐ യൂണിറ്റ് കമ്മിറ്റിയാണ് ഉച്ചയോടെ ഡോക്യുമെന്ററി പ്രദര്ശിപ്പിച്ചത്. എറണാകുളം മഹാരാജാസ് കോളേജ്, ലോ കോളേജ് എന്നിവിടങ്ങളിലും പ്രദര്ശനം സംഘടിപ്പിക്കുമെന്ന് ഡിവൈഎഫ്ഐ വ്യക്തമാക്കിയിട്ടുണ്ട്.യൂത്ത് കോണ്ഗ്രസും കെപിസിസി ന്യൂനപക്ഷ സെല്ലും സംസ്ഥാന വ്യാപകമായി ഡോക്യുമെന്ററി പ്രദര്ശിപ്പിക്കുമെന്ന് അറിയിച്ചിട്ടുണ്ട്. പത്തനംതിട്ടയിലും തൃശൂരിലും ഡോക്യുമെന്ററി പ്രദര്ശിപ്പിക്കുമെന്ന് യൂത്ത് കോണ്ഗ്രസും ഡിവൈഎഫ്ഐയും അറിയിച്ചു.ഡോക്യുമെന്ററിക്ക് കേന്ദ്ര സര്ക്കാര് വിലക്കേര്പ്പെടുത്തിയതോടെയാണ് സംസ്ഥാന വ്യാപക പ്രദര്ശനവുമായി ഡിവൈഎഫ്ഐയും എസ്എഫ്ഐയും യൂത്ത് കോണ്ഗ്രസും രംഗത്തെത്തിയത്.
https://www.facebook.com/Malayalivartha
