കണ്ണീര്‍ക്കാഴ്ചയായി... വയനാട് കമ്പളക്കാട് പാല്‍ വാങ്ങാനായി റോഡരികില്‍ നിന്ന പത്തൊമ്പതുകാരി മരിച്ച അപകടത്തില്‍ ജീപ്പ് ആദ്യം ഇടിച്ചത് റോഡരികില്‍ ഇറക്കിയിട്ട കുടിവെള്ള പൈപ്പില്‍. ഇതോടെ നിയന്ത്രണം വിട്ട ജീപ്പ് റോഡരികില്‍ നിന്ന യുവതിയെയും ഇടിക്കുകയായിരുന്നു. ഇന്നലെ രാവിലെയുണ്ടായ അപകടത്തില്‍ കമ്പളക്കാട് പുത്തന്‍തൊടുകയില്‍ ഹാഷിം ആയിഷ ദമ്പതികളുടെ മകള്‍ ദില്‍ഷാനയാണ് മരിച്ചത്. വീടിന് തൊട്ടുതാഴെയായിരുന്നു അപകടം നടന്നത്.

കുടിവെള്ള പദ്ധതിയുടെ പൈപ്പുകള്‍ വഴിയരികില്‍ കൂട്ടിയിട്ടിരുന്നു. അപകടമുണ്ടാക്കിയ ക്രൂയിസര്‍ ജീപ്പ് അമിതവേഗത്തിലാണ് വന്നതെന്ന് ദൃക്‌സാക്ഷികള്‍ . വലിയ പൈപ്പില്‍ ഇടിച്ച് നിയന്ത്രണംവിട്ട ജീപ്പ് ദില്‍ഷാനയെയും ഇടിക്കുകയായിരുന്നു. കമ്പളക്കാട് സിനിമാളിനു സമീപത്ത് ശനിയാഴ്ച രാവിലെ ഏഴു മണിയോടെയായിരുന്നു അപകടം.

കോഴിക്കോടു ഭാഗത്ത് നിന്നും മാനന്തവാടിയിലേക്ക് പോവുകയായിരുന്ന ജീപ്പാണ് ഇടിച്ചത്. വീതിയില്ലാത്ത റോഡില്‍ ഇത്തരത്തില്‍ പൈപ്പ് ഇറക്കിയിട്ട കരാറുകാരും അതിന് കൂട്ടുനിന്ന അധികൃതരുംകൂടി അപകടത്തിന് ഉത്തരവാദികളാണെന്ന് നാട്ടുകാര്‍ കുറ്റുപ്പെടുത്തുന്നു.ബത്തേരി സെന്റ് മേരീസ് കോളജില്‍ രണ്ടാം വര്‍ഷ ബിരുദ വിദ്യാര്‍ഥിനിയാണ് ദില്‍ഷാന. അപകടത്തില്‍ ഗുരുതരമായി പരിക്കേറ്റ ദില്‍ഷാനയെ കല്‍പറ്റയിലെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. മുഹമ്മദ് ഷിഫിന്‍, മുഹമ്മദ് അഹാഷ് എന്നിവരാണ് ദില്‍ഷാനയുടെ സഹോദരങ്ങള്‍. വിദേശത്തുള്ള ദില്‍ഷാനയുടെ പിതാവ് നാട്ടിലേക്കു തിരിച്ചു.