ഓണറേറിയം വര്‍ദ്ധിപ്പിക്കണമെന്നാവശ്യപ്പെട്ട് സെക്രട്ടറിയേറ്റിനു മുന്നില്‍ സമരം തുടരുന്ന ആശാ വര്‍ക്കര്‍മാരുടെ രാപകല്‍ സമരയാത്ര മഹാറാലിയോടെ സമാപിക്കുന്നതാണ്. ഇന്ന് രാവിലെ പിഎംജി ജംഗ്ഷനില്‍ നിന്ന് പ്രകടനമായി സെക്രട്ടറിയേറ്റ് പടിക്കല്‍ എത്തിച്ചേരുന്ന റാലി പ്രതിപക്ഷനേതാവ് വിഡി സതീശന്‍ ഉദ്ഘാടനം ചെയ്യും.

കാസര്‍കോട് നിന്ന് ആരംഭിച്ച് തിരുവനന്തപുരം വരെ ആശാ സമരസമിതി നേതാവ് എം എ ബിന്ദു നയിച്ച യാത്രയാണ് ഇന്ന് സമാപിക്കുന്നത്.
സെക്രട്ടറിയേറ്റ് പടിക്കലെ സമരവേദിയില്‍ നിന്ന് ഫ്‌ലാഗ് ഓഫ് ചെയ്ത രാപകല്‍ സമരയാത്ര മെയ് അഞ്ചിനാണ് കാസര്‍കോട് നിന്ന് ആരംഭിച്ചത്. 14 ജില്ലകളിലായി 45 ദിവസം പൂര്‍ത്തിയാക്കിയാണ് സെക്രട്ടറിയേറ്റിനു മുന്നില്‍ രാപകല്‍ സമരയാത്ര സമാപിക്കുന്നത്.

ഉപതിരഞ്ഞെടുപ്പ് നടക്കാനായി പോകുന്ന നിലമ്പൂരിലടക്കം സമരം ചെയ്യുന്ന ആശാ പ്രവര്‍ത്തകര്‍ ഇടത് പക്ഷത്തിനെതിരെ വോട്ട് അഭ്യര്‍ത്ഥിച്ചിരുന്നു.

അതേസമയം, ഇന്ന് കേരളത്തിലെ മുഴുവന്‍ ആശാവര്‍ക്കര്‍മാര്‍ക്കും സര്‍ക്കാര്‍ ഓണ്‍ലൈന്‍ ട്രെയിനിംഗ് ക്ലാസ് സംഘടിപ്പിച്ചിട്ടുണ്ട്. ഇതില്‍ ആശമാര്‍ നിര്‍ബന്ധമായും പങ്കെടുക്കണമെന്നും നിര്‍ദ്ദേശം നല്‍കിയിട്ടുണ്ട്്. പുതുതായി ആരംഭിച്ച 'ശശക്ത്' എന്ന വെബ് പോര്‍ട്ടല്‍ പരിചിതമാക്കാനുള്ള പരിശീലനമാണ് ഇന്ന് ഓണ്‍ലൈനായി നടക്കുക.