ദേശീയ ചലച്ചിത്ര പുരസ്കാര പ്രഖ്യാപനത്തിന് പിന്നാലെ രൂക്ഷ വിമര്ശനവുമായി മുഖ്യമന്ത്രി
എഴുപത്തിയൊന്നാമത് ദേശീയ ചലച്ചിത്ര പുരസ്കാരങ്ങള് പ്രഖ്യാപനത്തിന് പിന്നാലെ വിവാദം കൊഴുക്കുന്നു. ദി കേരള സ്റ്റോറി എന്ന സിനിമയ്ക് നല്കിയ പുരസ്കാരങ്ങളുടെ പേരിലാണ് വിവാദം, അവാര്ഡ് പ്രഖ്യാപനത്തെ മുഖ്യമന്ത്രി പിണറായി വിജയന് രൂക്ഷമായി വിമര്ശിച്ചു.
കേരളത്തെ അപകീര്ത്തിപ്പെടുത്താനും വര്ഗീയത പടര്ത്താനും നുണകളാല് പടുത്ത ഒരു സിനിമയ്ക്ക് പുരസ്കാരങ്ങള് സമ്മാനിച്ചതിലൂടെ മതസാഹോദര്യത്തിനും ദേശീയോദ്ഗ്രഥനത്തിനുമായി നില കൊണ്ട ഇന്ത്യന് സിനിമയുടെ ശ്രേഷ്ഠപാരമ്പര്യത്തെയാണ് ജൂറി അവഹേളിച്ചിരിക്കുന്നത് എന്ന് മുഖ്യമന്ത്രി പറഞ്ഞു. വര്ഗിയ അജണ്ട നടപ്പാക്കാനുള്ള ആയുധമായി ചലച്ചിത്രത്തെ മാറ്റുക എന്ന സംഘപരിവാര് അജണ്ടയാണ് ഇതിലൂടെ അവര് നടപ്പാക്കുന്നതെന്നും മുഖ്യമന്ത്രി കുറ്റപ്പെടുത്തി.
ഈ നടപടിക്കെതിരെ ശക്തമായി പ്രതിഷേധിക്കുന്നു. ഓരോ മലയാളിയും രാജ്യത്തെ ജനാധിപത്യ വിശ്വാസികളാകെയും ഈ അനീതിക്കെതിരെ സ്വരമുയര്ത്തണമെന്നും അദ്ദേഹം പറഞ്ഞു. കലയെ വര്ഗീയത വളര്ത്താനുള്ള ആയുധമാക്കി മാറ്റുന്ന രാഷ്ട്രീയത്തിനെതിരെ അണിനിരക്കണം എന്നും മുഖ്യമന്ത്രി ആഹ്വാനം ചെയ്തു.
അതേസമയം മികച്ച സഹനടിക്കും സഹനടനുമുള്ള പുരസ്കാരങ്ങള് നേടിയ ഉര്വശിയെയും വിജയരാഘവനെയും മുഖ്യമന്ത്രി അഭിനന്ദിച്ചു. തങ്ങളുടെ അതുല്യ പ്രതിഭയാല് മലയാള സിനിമയെ സമ്പന്നമാക്കിയ ഉര്വശിയും വിജയരാഘവനും മികച്ച സഹനടിക്കും സഹനടനുമുള്ള പുരസ്കാരങ്ങള് നേടിയത് ഈ നിമിഷത്തിന്റെ തിളക്കം കൂട്ടുന്നുവെന്ന് മുഖ്യമന്ത്രി പറഞ്ഞു. കൂടുതല് മികവുറ്റ സിനിമകളുമായി പുതിയ ഉയരങ്ങളിലേക്ക് കുതിക്കാന് ഈ അവാര്ഡുകള് മലയാള സിനിമയ്ക്ക് പ്രചോദനം പകരട്ടെ എന്നും മുഖ്യമന്ത്രി ആശംസിച്ചു.
https://www.facebook.com/Malayalivartha
