ജിഎസ്ടി; കേന്ദ്രം നല്കാനുള്ളത് 2900 കോടി; കേരളം സുപ്രീംകോടതിയിലേക്ക്; സംസ്ഥാനങ്ങള്ക്ക് ലഭിക്കേണ്ട നഷ്ടപരിഹാരം നിഷേധിക്കുന്നതിനെതിരെ കേരളം മറ്റു സംസ്ഥാനങ്ങളുമായി ചേര്ന്ന് സുപ്രീംകോടതിയില് ഹര്ജി നല്കാന് ധാരണയായി
ജിഎസ്ടി നിയമം വ്യവസ്ഥ ചെയ്തിട്ടുള്ള ദ്വൈമാസ നഷ്ടപരിഹാരതുകയുടെ ഒക്ടോബറിലെ തവണ ഇനിയും കേന്ദ്രസര്ക്കാര് നല്കിട്ടില്ല. കേരളത്തിന് 1600 കോടിയാണ് ലഭിക്കാനുള്ളത്. കേന്ദ്രനികുതിയില്നിന്നുള്ള സംസ്ഥാനവിഹിതത്തിന്റെ മാസതവണയായ 1300 കോടിയും ലഭിക്കാനുണ്ട്. സംസ്ഥാനങ്ങള്ക്ക് ലഭിക്കേണ്ട നഷ്ടപരിഹാരം നിഷേധിക്കുന്നതിനെതിരെ കേരളം മറ്റു സംസ്ഥാനങ്ങളുമായി ചേര്ന്ന് സുപ്രീംകോടതിയില് ഹര്ജി നല്കാന് ധാരണയായി.
മാന്ദ്യത്തിന്റെ പേരില് 1,75,000 കോടി കോര്പറേറ്റ് നികുതിഇളവ് പ്രഖ്യാപിച്ചപ്പോള്, സംസ്ഥാനവിഹിതമാണ് അനിശ്ചിതത്വത്തിലായത്. കോര്പറേറ്റ്നികുതി ഉള്പ്പെട്ട കേന്ദ്രനികുതിയുടെ 42 ശതമാനം സംസ്ഥാനങ്ങള്ക്കുള്ളതാണ്. കേരളത്തിന് 5370 കോടിയുടെ കുറവുണ്ടാകുമെന്നാണ് പ്രാഥമിക കണക്ക്.
സഹകരിക്കാന് തയ്യാറാകുന്ന സംസ്ഥാനങ്ങളെയും ഒപ്പംകൂട്ടിയുള്ള നിയമനടപടികള്ക്ക് കേരളം മുന്കൈ എടുക്കും. തുടര്നടപടികള്ക്കും, മറ്റ് സംസ്ഥാനങ്ങളുമായുള്ള ആശയവിനിമയത്തിനും ഏകോപനചുമതല ടാക്സസ് കമീഷണര്ക്കായിരിക്കും.
ഈ വര്ഷത്തെ കേരളത്തിന്റെ അനുവദനീയ വായ്പയില് 6645 കോടി കേന്ദ്രം വെട്ടിക്കുറച്ചു. ഇതോടെ വായ്പ എടുക്കലും പ്രയാസത്തിലായി. എല്ലാവിധ ചെലവും ചുരുക്കിയിട്ടും പിടിച്ചുനില്ക്കാന് കഴിയാത്ത അവസ്ഥയിലായി. ഇതേ സ്ഥിതിയിലാണ് മിക്ക സംസ്ഥാനങ്ങളും. കഴിഞ്ഞ ദിവസം ഡല്ഹിയില് ചേര്ന്ന ജിഎസ്ടി മന്ത്രിതലസമിതിക്കുശേഷം വിഷയത്തില് ഒരുമയോടെ നില്ക്കാന് കേരളം, പശ്ചിമ ബംഗാള്, ഡല്ഹി, പഞ്ചാബ്, രാജസ്ഥാന് ധനമന്ത്രിമാര് തീരുമാനിച്ചിരുന്നു.
ജിഎസ്ടി നിയമത്തിന് അംഗീകാരം നല്കിയതിലൂടെ പാര്ലമെന്റ് സംസ്ഥാനങ്ങള്ക്ക് നല്കിയ വാഗ്ദാനമാണ് ജിഎസ്ടി നഷ്ടപരിഹാരം. ഓരോവര്ഷവും 14 ശതമാനം വരുമാനവര്ദ്ധനവില്ലെങ്കില്, ആ കുറവ് നഷ്ടപരിഹാരത്തുകയിലൂടെ നികത്തുമെന്നതാണ് വ്യവസ്ഥ. ഇത് ആദ്യഘട്ടത്തില് ഓരോ മാസവും നല്കിയിരുന്നു.
പിന്നീട് രണ്ടു മാസത്തിലൊരിക്കലാക്കി. ഇപ്പോള് നിര്ത്തിവച്ച സ്ഥിതിയായി. നഷ്ടപരിഹാരം എന്ന ഉറപ്പിന്റെ അടിസ്ഥാനത്തിലാണ് ജിഎസ്ടിയ്ക്കായി സംസ്ഥാനങ്ങളുടെ ധനപരമായ അധികാരത്തില് വിട്ടുവീഴ്ച ചെയ്യാന് തയ്യാറായത്.
നഷ്ടപരിഹാരം ഉറപ്പാക്കുന്ന വ്യവസ്ഥ ഭരണഘടനയില് ഉള്പ്പെടുത്തിയശേഷമാണ് സംസ്ഥാനങ്ങള് ജിഎസ്ടിയില് ചേരാന് തീരുമാനിച്ചത്.
https://www.facebook.com/Malayalivartha
