ബിജെപിയ്ക്കെതിരെ കോണ്‍ഗ്രസൊഴികെ ആര് ജയിച്ചാലും കേരളത്തിലെ സഖാക്കള്‍ ജയ് വിളിക്കുന്ന കാഴ്ചയാണ് കുറേ നാളുകളായി കാണാന്‍ കഴിഞ്ഞത്. അതിന് ഏറ്റവും അവസാനത്തെ ഉദാഹരണമായിരുന്നു ഡല്‍ഹിയിലെ അരവിന്ദ് കെജ്രിവാള്‍. മോദിയും അമിത്ഷായും കളത്തിലിറങ്ങിയതോടെ കേരളത്തിലെ സഖാക്കളെല്ലാം കെജ്രിവാളിനോടൊപ്പമായി. പിണറായിക്കും അടുപ്പമുള്ളയാണ് കെജ്രിവാള്‍. അങ്ങനെ കെജ്രിവാളിന്റെ വിജയം സഖാക്കള്‍ ആഘോഷിച്ചപ്പോള്‍ ദേ കെജ്രിവാളിന്റെ ഭാരത് മാതാകീ ജയ് വിളി. അതും വിജയം ആഘോഷിക്കുന്ന വേളയില്‍. മാത്രമല്ല ഹനുമാനാണ് വിജയത്തിന് പിന്നിലെന്ന് പറഞ്ഞ് ഹനുമാന്‍ ക്ഷേത്രത്തില്‍ നേര്‍ച്ചയും കഴിച്ചു. മാത്രമല്ല സംഘികളെപ്പോലെ നല്ല ഒന്നാന്തരം ചുവന്ന പാളയംകോടന്‍ കുറിയും ഇട്ടൊരു വരവും. ഇതോടെ മോദിയ്ക്കും അമിത്ഷായ്ക്കും ഹാപ്പിയായി. ഇവിടത്തെ വിശ്വാസികള്‍ക്കും സന്തോഷം. സന്തോഷം നഷ്ടമായത് സഖാക്കള്‍ക്ക് മാത്രം. കെജ്രിവാളിന് ചെറിയ കാവി ചായ്വ് ഇല്ലേന്ന് സംശയം.

മൂന്നാം തവണയും ആം ആദ്മിയില്‍ വിശ്വസമര്‍പ്പിച്ച ജനങ്ങള്‍ക്ക് നന്ദി പറഞ്ഞ വേദിയിലാണ് അരവിന്ദ് കെജ്രിവാള്‍ സഖാക്കളെ നാണം കെടുത്തിയത്. ദില്ലിയിലെ ജനങ്ങളോട് ഐ ലവ് യൂ എന്ന് പറഞ്ഞുകൊണ്ടാണ് കെജ്രിവാള്‍ സംസാരിച്ചു തുടങ്ങിയത്.

ഇത് എന്നെ മകനായി കണക്കാക്കിയവരുടെ വിജയമാണ്. ഡല്‍ഹിക്കാരുടെ മാത്ര വിജയമല്ല ഇന്ത്യക്കാരുടെ മുഴുവന്‍ വിജയമാണ് ഇത്. ഡല്‍ഹിയിലെ ജനങ്ങളെ ഭഗവാന്‍ ഹനുമാന്‍ അനുഗ്രഹിച്ചു.

ജനങ്ങള്‍ വോട്ട് ചെയ്തത് വികസനത്തിന് വേണ്ടിയാണ്. തിരഞ്ഞെടുപ്പ് വിജയത്തിലൂടെ രാജ്യത്ത് പുതിയൊരു രാഷ്ട്രീയത്തിനാണ് തുടക്കം കുറിച്ചിരിക്കുന്നത്, അത് വാഗ്ദാനങ്ങളുടേതല്ല, പ്രവൃത്തിയുടെ രാഷ്ട്രീയമാണെന്നും' കെജ്രിവാള്‍ പറഞ്ഞു.

തിരഞ്ഞെടുപ്പ് ഫലം പുറത്തുവന്നാതോടെ ജന്തര്‍മന്തറിലെ ഹനുമാന്‍ ക്ഷേത്രം സന്ദര്‍ശിക്കുകയും ചെയ്തു.

ഇവിടത്തെ സഖാക്കള്‍ ഓടിയൊളിക്കുമ്പോഴും വിജയിച്ചത് കെജ്രിവാളാണ്. ജീവിതം പോലെ തന്നെയാണ് രാഷ്ട്രീയം. അല്ലെങ്കില്‍ ജീവിതം തന്നെയാണ് രാഷ്ട്രീയം. കെണികള്‍ തിരിച്ചറിഞ്ഞില്ലെങ്കില്‍ ജീവിതത്തിലെന്ന പോലെ രാഷ്ട്രീയത്തിലും വീണു പോവും. ഡെല്‍ഹിയിലെ കെണികളില്‍ വീണില്ല എന്നിടത്താണ് അരവിന്ദ് കെജ്രിവാളിന്റെ വിജയമിരിക്കുന്നത്. കെണിയൊരുക്കിയത് ബിജെപിയാണ്. ബിജെപിയുടെ ബുദ്ധികേന്ദ്രം ആര്‍എസ്എസ് ആണെന്നുവരുമ്പോള്‍ കെണിയുടെ ബഹുമതിയും അവര്‍ക്കവകാശപ്പെടാവുന്നതാണ്. ധ്രുവീകരണം എന്ന കെണിയാണ് സംഘപരിവാര്‍ മിക്കപ്പോഴും ഫലപ്രദമായി പ്രയോഗിക്കുന്നത്. കേവലം രണ്ട് സീറ്റില്‍ നിന്ന് ലോക്സഭയില്‍ 303 എന്ന ഗംഭീര അക്കത്തിലേക്ക് ബിജെപി എത്തിയതിന് പിന്നില്‍ ഈ ആയുധം വഹിച്ച പങ്ക് ചെറുതല്ല.

ഒരര്‍ത്ഥത്തില്‍ ബിജെപിയുടെ ആവനാഴിയിലെ ഏറ്റവും മാരകമായ ആയുധമാണത്. സിദ്ധാന്തങ്ങളിലല്ല ഇത്തരം പ്രയോഗങ്ങളിലാണ് ഇപ്പോള്‍ ബിജെപിക്ക് താല്‍പര്യം. ആയുധങ്ങളുണ്ടായാല്‍ മാത്രം പോര, കൈ വിറക്കാതെ പ്രയോഗിക്കാന്‍ കഴിവുള്ളവരും വേണം. പ്രധാനമന്ത്രി മോദി മുതല്‍ ഉത്തര്‍പ്രദേശ് മുഖ്യന്‍ യോഗി ആദിത്യനാഥ് വരെ ഈ ശ്രേണിയിലുണ്ട്.

മോദിയോടും അമിത് ഷായോടും ഏറ്റുമുട്ടുമ്പോള്‍ കൈ വിറക്കരുത്, കാല് കുഴയരുത്, സര്‍വ്വോപരി മനസ്സ് പതറരുത്. ഇവിടെയാണ് അരവിന്ദ് കെജ്രിവാള്‍ വിജയിച്ചത്. അതുകൊണ്ടുതന്നെ കെജ്രിയുടെ വിജയത്തിന് പകരം വെയ്ക്കാന്‍ മറ്റൊന്നില്ല.

ഹിന്ദുക്കളെയും മുസ്ലീങ്ങളേയും വിഭജിക്കുന്നതിനുള്ള ബിജെപിയുടെ വലിയ അജണ്ടയാണെന്ന തിരിച്ചറിവായിരുന്നു അത്. ഷഹീന്‍ബാഗിലെ പ്രക്ഷോഭ വേദിയില്‍നിന്നു കെജ്രിവാള്‍ വിട്ടുന്നിന്നു. സിഎഎയെ മുന്‍നിര്‍ത്തിയല്ല, തന്റെ സര്‍ക്കാരിന്റെ പ്രകടനത്തിന്റെ പുറത്താണ് കെജ്രിവാള്‍ വോട്ട് ചോദിച്ചത്. വൈദ്യുതി, വെള്ളം, ആസ്പത്രി, വിദ്യാഭ്യാസം ജനങ്ങളെ അടിത്തട്ടില്‍ ബാധിക്കുന്ന നാലു മേഖലകളില്‍ കെജ്രിവാളിന്റെ സര്‍ക്കാര്‍ കിടിലന്‍ പ്രകടനമാണ് കാഴ്ചവെച്ചത്. ജമ്മു കാശ്മീരിനെ ഒരു വഴിക്കാക്കിയതു കൊണ്ടോ അയോദ്ധ്യയില്‍ രാമക്ഷേത്രം നിര്‍മ്മിക്കുന്നതു കൊണ്ടോ ഒരു സംസ്ഥാനം പിടിക്കാന്‍ പറ്റില്ലെന്നാണ് ഡെല്‍ഹി തിരഞ്ഞെടുപ്പ് ഫലം പറയുന്നത്.