തെലുങ്കാനയില്‍ കുഴല്‍ക്കിണറ്റില്‍ വീണ മൂന്നു വയസ്സുകാരന്‍ മരിച്ചു... മൂടിയില്ലാത്ത 120 അടി താഴ്ചയുള്ള കുഴല്‍ക്കിണറിലാണ് കുട്ടി വീണത്, സമാന്തര കുഴിയെടുത്ത് രക്ഷിക്കാന്‍ ശ്രമിച്ചെങ്കിലും ഫലമുണ്ടായില്ല. ബുധനാഴ്ച രാത്രി പോദ്ച്ചനാപ്പള്ളിയിലായിരുന്നു സംഭവം നടന്നത്. രാത്രി നടത്തിയ രക്ഷാപ്രവര്‍ത്തനത്തിനൊടുവില്‍ വ്യാഴാഴ്ച രാവിലെ കുട്ടിയുടെ മൃതദേഹമാണ് കുഴല്‍ക്കിണറില്‍നിന്ന് വീണ്ടെടുക്കാനായത്.

അടുത്തിടെ കുഴിച്ച മൂടിയില്ലാത്ത 120 അടി താഴ്ചയുള്ള കുഴല്‍ക്കിണറിലാണ് കുട്ടി വീണത്. കുഴല്‍ കിണറിലേക്ക് ഓക്‌സിജന്‍ എത്തിച്ച് കുട്ടിയുടെ ജീവന്‍ നിലനിര്‍ത്താന്‍ ശ്രമിച്ചിരുന്നു. മണ്ണുമാന്തി യന്ത്രം ഉപയോഗിച്ച് കുഴല്‍ക്കിണറിന് സമീപം സമാന്തര കുഴിയെടുത്ത് ഇതിലൂടെ രക്ഷിക്കാനുള്ള ശ്രമങ്ങളും നടന്നെങ്കിലും കുട്ടിയെ രക്ഷിക്കാനായില്ല. സംഘറെഡ്ഡി സ്വദേശിയായ ഫോട്ടോഗ്രാഫര്‍ ഗോവര്‍ധന്റെ മകന്‍ സായി വര്‍ധനാണ് മരിച്ചത്. ഗോവര്‍ധനും കുടുംബവും ഏതാനും ദിവസം മുമ്പാണ് പോദ്ച്ചനാപ്പള്ളിയില്‍ എത്തിയത്. അമ്മയുടെ അച്ഛനൊപ്പം സായി കൃഷിയിടത്തില്‍ പോയതായിരുന്നു. കൃഷി സ്ഥലത്ത് ആദ്യം കുത്തിയ കുഴല്‍ക്കിണറില്‍ വെള്ളം ലഭിച്ചിരുന്നില്ല.

വീണ്ടും കുഴല്‍ക്കിണര്‍ കുഴിച്ചെങ്കിലും ഇതിലും വെള്ളം ലഭിച്ചില്ല. ഇത് പരിശോധിക്കാനെത്തിയതായിരുന്നു സായി വര്‍ധനും മുത്തച്ചനും.കുഴല്‍ക്കിണറിന് അടുത്തെത്തി പരിശോധിക്കുന്നതിനിടെ കുട്ടിയും എത്തിനോക്കി. ഇതോടെ സായി കാല് വഴുതി കിണറിലേക്ക് വീഴുകയായിരുന്നു.