ഡല്ഹിയില് കര്ഷക പ്രക്ഷോഭം നടക്കുന്ന വേദിക്ക് സമീപം വെടിവെയ്പ്പ്... സംഭവത്തില് പോലീസ് അന്വേഷണം തുടങ്ങി
ഡല്ഹിയില് കര്ഷക പ്രക്ഷോഭം നടക്കുന്ന വേദിക്ക് സമീപം വെടിവെയ്പ്പ്. സിങ്കുവിലെ വേദിയ്ക്ക് സമീപം വെടിവയ്പ്പ് നടന്നതായി കര്ഷകര്. മൂന്ന് തവണ വെടിവയ്പ്പ് നടത്തിയതായാണ് കര്ഷകര് പറയുന്നത്.
ആകാശത്തേക്കാണ് വെടിവയ്പ്പ് നടത്തിയതെന്നാണ് പ്രാഥമിക അന്വേഷണത്തില് കണ്ടെത്തിയിരിക്കുന്നത്.സംഭവത്തില് ആര്ക്കും പരിക്കേറ്റില്ല. ചണ്ഡീഗഡ് രജിസ്ട്രേഷന് വാഹനത്തിലെത്തിയവരാണ് വെടിവെച്ചതെന്നാണ് പ്രഥമിക അന്വേഷണത്തില് വ്യക്തമായത്. ഇവര്ക്ക് ഏതെങ്കിലും സംഘടനകളുമായി ബന്ധമുണ്ടോയെന്ന വിവരം പോലീസ് പരിശോധിച്ചുവരികയാണ്.
സംഭവത്തില് അന്വേഷണം പുരോഗമിക്കുന്നുവെന്ന് ഹരിയാന പോലീസിലെ ഉന്നത ഉദ്യോഗസ്ഥര് വ്യക്തമാക്കി. സംഭവ സ്ഥലത്ത് ഉന്നത ഉദ്യോഗസ്ഥരുടെ നേതൃത്വത്തിലുള്ള സംഘം എത്തി.
വനിതാ ദിനത്തിന്റെ ഭാഗമായി കര്ഷക പ്രതിഷേധത്തില് പങ്കെടുക്കാന് പഞ്ചാബിന്റെ വിവിധ ഭാഗങ്ങളില് നിന്നും സ്ത്രീകള് ഡെല്ഹിയിലേക്ക്. പഞ്ചാബില് നിന്ന് 40000 സ്ത്രീകള് ഡെല്ഹിയില് എത്തുമെന്ന് കര്ഷക സംഘടനകള് അറിയിച്ചു.
അതേസമയം അന്താരാഷ്ട്ര വനിതാദിനമായ ഇന്ന് 'വനിതാ കര്ഷകദിന'മായി കര്ഷകസംഘടനകള് ആചരിക്കും. കര്ഷകസമരത്തിന് നേതൃത്വം നല്കുകയും പ്രക്ഷോഭത്തില് പങ്കാളികളാകുകയും ചെയ്യുന്ന വനിതാ കര്ഷകരോടുള്ള ആദരസൂചകമായാണിത്.
തിങ്കളാഴ്ച രാജ്യത്തെ കര്ഷകസമര കേന്ദ്രത്തിലെല്ലാം നിയന്ത്രണം പൂര്ണമായും വനിതകള്ക്കാണ്. വേദികള് നിയന്ത്രിക്കുന്നതും പ്രസംഗിക്കുന്നതുമെല്ലാം വനിതാ കര്ഷകരായിരിക്കുമെന്ന് സംയുക്ത കിസാന് മോര്ച്ച വക്താവ് ദര്ശന്പാല് അറിയിച്ചു.
വനിതാ കര്ഷകദിനം പ്രമാണിച്ച് പ്രത്യേക റാലികളും യോഗങ്ങളും സംഘടിപ്പിക്കും. കര്ണാടകത്തില് മോഡി സര്ക്കാരിനെ തുറന്നുകാട്ടല് പ്രചാരണത്തിന് തുടക്കമായതായി ദര്ശന്പാല് അറിയിച്ചു. വിവിധ സംസ്ഥാനങ്ങളില് മഹാപഞ്ചായത്തുകളും തുടരുകയാണ്. ബംഗാളടക്കം കൂടുതല് സംസ്ഥാനങ്ങളിലേക്ക് കര്ഷകസമരം വ്യാപിപ്പിക്കുമെന്ന് ബികെയു നേതാവ് ജഗ്മോഹന് സിങ് പട്യാല അറിയിച്ചു.
കാര്ഷിക നിയമങ്ങളില് ഭേദഗതി കൊണ്ടുവരാന് സര്ക്കാര് ഒരുക്കമാണെന്ന് കേന്ദ്ര കൃഷിമന്ത്രി നരേന്ദ്ര സിങ് തോമര്. പ്രതിപക്ഷം വിഷയത്തില് രാഷ്ട്രീയം കളിക്കുകയാണെന്ന് അഗ്രിവിഷന് ദേശീയ കണ്വന്ഷനില് മന്ത്രി പറഞ്ഞു. കാര്ഷിക നിയമത്തിലെ പാളിച്ച ചൂണ്ടിക്കാട്ടാന് കര്ഷകര്ക്കായില്ല.
"
https://www.facebook.com/Malayalivartha
