സ്വകാര്യ ആശുപത്രി പരിസരത്തു നിന്നും പതിനൊന്ന് തലയോട്ടികളും 54 ഭ്രൂണാസ്ഥികളും കണ്ടെത്തി. മഹാരാഷ്ട്രയിലെ വാര്‍ധയില്‍ സ്വകാര്യ ആശുപത്രിയുടെ ബയോഗ്യാസ് പ്ലാന്റില്‍ നിന്നാണ് ഇത് കണ്ടെത്തിയത്. അര്‍വി ടെഹ്‌സിലുള്ള കദാം ആശുപത്രിയിലാണ് ഞെട്ടിക്കുന്ന സംഭവം നടന്നത്.

പതിമൂന്നുകാരിയുടെ ഗര്‍ഭച്ഛിദ്രവുമായി ബന്ധപ്പെട്ട കേസന്വേഷണത്തിനിടെയാണ് പൊലീസ് തലയോട്ടികളും അസ്ഥികളും കണ്ടെത്തിയത്. പതിമൂന്ന് വയസുള്ള പെണ്‍കുട്ടിയെ നിയമവിരുദ്ധമായി ഗര്‍ഭച്ഛിദ്രം നടത്തിക്കുന്നതിനായി വീട്ടുകാര്‍ കദാം ആശുപത്രിയില്‍ എത്തിക്കുകയായിരുന്നു.

സംഭവവുമായി ബന്ധപ്പെട്ട് കദാം ആശുപത്രിയിലെ രേഖ കദാം എന്ന ഡോക്ടര്‍ അറസ്റ്റിലായിരുന്നു. ഈ കേസിന്റെ തുടരന്വേഷണത്തിനിടയിലാണ് പുതിയ കണ്ടെത്തല്‍. തലയോട്ടികളും അസ്ഥികളും പരിശോധനയ്ക്ക് അയച്ചു.


ഇവ നിയമവിരുദ്ധമായാണോ നിക്ഷേപിച്ചത് എന്നത് സംബന്ധിച്ച് പൊലീസ് അന്വേഷണം ആരംഭിച്ചു. ജനുവരി ഒന്‍പതിനാണ് കദാം ആശുപത്രിയിലെ നഴ്‌സും ഡോക്ടര്‍ രേഖാ കദാമും അനധികൃത ഗര്‍ഭച്ഛിദ്രത്തിന്റെ പേരില്‍ അറസ്റ്റിലാവുന്നത്.

പതിമൂന്നുകാരിയെ ഗര്‍ഭിണിയാക്കിയ കേസില്‍ പ്രായപൂര്‍ത്തിയാകാത്ത ആണ്‍കുട്ടിയുടെ മാതാപിതാക്കള്‍ അറസ്റ്റിലായിരുന്നു. ഗര്‍ഭച്ഛിദ്രം നടത്തിയില്ലെങ്കില്‍ പെണ്‍കുട്ടിയെ അപകീര്‍ത്തിപ്പെടുത്തുമെന്ന് ആണ്‍കുട്ടിയുടെ മാതാപിതാക്കള്‍ പെണ്‍കുട്ടിയുടെ അച്ഛനമ്മമാരെ ഭീഷണിപ്പെടുത്തിയിരുന്നു. ഗര്‍ഭച്ഛിദ്രം നടത്താനുള്ള പണവും ഇവര്‍ നല്‍കിയിരുന്നു. സംഭവത്തില്‍ സമഗ്രമായ അന്വേഷണം നടന്നുവരികയാണ്.