കര്‍ണാടക നിയമസഭാ തിരഞ്ഞെടുപ്പിന്റെ ആദ്യ ഫലസൂചനകള്‍ പുറത്തുവന്നപ്പോള്‍ ബിജെപി മുന്നേറുന്നു. 222 മണ്ഡലങ്ങളിലെ ലീഡ്‌നില വ്യക്തമായപ്പോള്‍ 109 മണ്ഡലങ്ങളിലും ബിജെപി മുന്നേറുന്നു. കോണ്‍ഗ്രസ് 68 മണ്ഡലങ്ങള്‍ മാത്രമാണ് കോണ്‍ഗ്രസ് മുന്നിട്ടുനില്‍ക്കുന്നത്. ജെഡിഎസ് 43 സീറ്റുകളില്‍ ലീഡ് ചെയ്തുകൊണ്ട് നിര്‍ണായക ശക്തിയാവുകയാണ്. ഒരിടത്ത് സ്വതന്ത്രനും മുന്നിട്ടുനില്‍ക്കുന്നു.

ലിംഗായത്തുകളെ കൂടെനിര്‍ത്തിക്കൊണ്ടുള്ള കോണ്‍ഗ്രസിന്റെ തിരഞ്ഞെടുപ്പു തന്ത്രത്തിന് തിരിച്ചടിയായതായാണ് ഫലം നല്‍കുന്ന സൂചന. ദളിത് വോട്ടുകളും ഗ്രാമീണ മേഖലയിലെ വോട്ടുകളും കോണ്‍ഗ്രസിന് ഗുണം ചെയ്തില്ല. മത്സരിച്ച രണ്ടു മണ്ഡലങ്ങളിലും മുഖ്യമന്ത്രി സിദ്ധരാമയ്യ കടുത്ത മത്സരമാണ് നേരിടുന്നത്.

ജെഡിഎസിന് വ്യക്തമായ മുന്‍തൂക്കം നേടാന്‍ സാധിച്ചിട്ടുണ്ട്. കഴിഞ്ഞ തവണ ഉണ്ടായിരുന്ന 40 സീറ്റുകള്‍ നിലനിര്‍ത്തുന്നു എന്നതു് ഇന്നത്തെ സാഹചര്യത്തില്‍ വലിയ മുന്നേറ്റമായാണ് നിരീക്ഷിക്കപ്പെടുന്നത്. തൂക്കു മന്ത്രിസഭ ഏറെക്കുറെ ഉറപ്പായ സാഹചര്യത്തില്‍ സര്‍ക്കാര്‍ രൂപീകരണത്തിന് ജെഡിഎസ് പിന്തുണ അനിവാര്യമാണെന്ന സാഹചര്യമാണുള്ളത്.

കോണ്‍ഗ്രസ് അധ്യക്ഷനായി രാഹുല്‍ ഗാന്ധിയെ തിരഞ്ഞെടുക്കപ്പെട്ടാല്‍ ഏറ്റവും ദുര്‍ബലനായ നേതാവിനെയാകും കോണ്‍ഗ്രസിന് ലഭിക്കുക എന്നുള്ള പരാതികള്‍ ശരിവയ്ക്കുന്നതാണ് കര്‍ണാടക തെരഞ്ഞെടുപ്പ് ഫലങ്ങള്‍.
.
ഗോവ, മണിപ്പൂര്‍, മേഘാലയ തുടങ്ങിയ സംസ്ഥാനങ്ങളുടെ നേതൃത്വം ലഭിച്ചതില്‍ ഇപ്പോഴും ചോദ്യങ്ങള്‍ ബാക്കി നില്‍ക്കുന്നുണ്ടെങ്കിലും; ബിജെപിഎന്‍ഡിഎ പരിധിയിലുള്ള സംസ്ഥാനങ്ങളുടെ എണ്ണം 2014ല്‍ ഏഴ് എന്നതില്‍ നിന്നും ഇന്നേക്ക് ഇരുപതു കടന്നിരിക്കുന്നു. യുദ്ധത്തിലും പ്രണയത്തിലും എന്തും ആവാം എന്നാണെങ്കില്‍ രാഷ്ട്രീയവും അങ്ങനെ തന്നെയാണ്. മോദിഷാ സഖ്യമുള്‍പ്പെടെ മമത ബാനര്‍ജി, മായാവതി, ലാലു യാദവ്, നിതീഷ് കുമാര്‍, കെ ചന്ദ്രശേഖരറാവു തുടങ്ങിയവരും തെരഞ്ഞെടുപ്പ് തന്ത്രങ്ങള്‍ പയറ്റി തെളിഞ്ഞവരാണ്. ഇവരിലെല്ലാം പൊതുവായി കണ്ടെത്താവുന്ന ഏക വിശേഷണം എല്ലാവരും പ്രകടമായി തന്നെ സ്വേച്ഛാധിപതികളും ഉള്ളില്‍ ജനാതിപത്യമൂല്യങ്ങള്‍ കലര്‍ന്നിട്ടില്ലാത്തവരുമാണ് എന്നതാണ്.

തെരഞ്ഞെടുപ്പ് രാഷ്ട്രീയത്തിന്റെ വിജയതന്ത്രങ്ങളിലെ പ്രധാനഘടകം ഭയപ്പെടുത്തി ഭരിക്കുക എന്നതാണ്, എകാധിപത്യപരമായ ഈ നയം തെറ്റിയിട്ടുമില്ല താനും. സമാധാനപ്രിയനും മേല്‍പ്പറഞ്ഞ രാഷ്ട്രീയതന്ത്രങ്ങളുടെ വക്താവുമല്ലാത്ത കോണ്‍ഗ്രസ് ദേശീയ പ്രസിഡണ്ട് രാഹുല്‍ ഗാന്ധിക്കാകട്ടെ, പലപ്പോഴും നേരായ രീതിയിലുള്ള തെരഞ്ഞെടുപ്പ് രാഷ്ട്രീയം പയറ്റുന്നതില്‍ പോലും പിഴവ് പറ്റുന്നു. ഏതു വിധേനെയും തെരഞ്ഞെടുപ്പില്‍ വിജയിക്കുകയും; ജയിക്കുന്നവര്‍ക്ക് ജയ് വിളിക്കുകയും ചെയ്യുന്നതായാണ് പുതിയ കാലത്തിന്റെ സ്വാഭാവികത എന്നുള്ളത് മറ്റൊരു യാഥാര്‍ത്ഥ്യം.

കോണ്‍ഗ്രസ് അധ്യക്ഷനായി രാഹുലിനെ തിരഞ്ഞെടുത്താല്‍ ബിജെപിയുടെ 'അച്ഛേദിനങ്ങള്‍' ആരംഭിക്കുമെന്ന കേന്ദ്ര മന്ത്രി സ്മൃതി ഇറാനിയുടെ പരിഹാസം ഇപ്പോള്‍ സോഷ്യല്‍ മീഡിയ ആഘോഷിക്കുകയാണ്.