പെട്രോള്‍ വില ഉയരുമ്പോള്‍ ബൈക്ക് വിറ്റ് കുതിരയെ വാങ്ങി പാല്‍വിതരണം നടത്തുന്നയാള്‍ കൗതുകമാകുന്നു. മുംബെ കല്ല്യാണിലെ മുര്‍ബാദിലുള്ള ദസായ് ഗ്രാമത്തിലാണ് പെട്രോളഴിച്ച് ബൈക്കോടിക്കുന്നതിലും ലാഭകരമാണ് കുതിരയെ പോറ്റുക എന്ന് തെളിയിക്കുന്ന സംഭവം. നാല്‍പ്പത്തിയൊന്‍പത് കാരനായ പാണ്ഡുരംഗ വിഷെയാണ് കുതിരപ്പുറത്തേറി പാല്‍ വിതരണം നടത്തുന്നത്.

വിഷെ തന്റെ ഗ്രാമത്തില്‍ ഏഴ് കിലോമീറ്റര്‍ യാത്രചെയ്താണ് പാല്‍ വിതരണം നടത്തിയത്. മുംബെയിലെ പെട്രാള്‍ വില 84 രൂപയിലെത്തിയതോടെ ഒരാഴ്ച്ച പാല്‍വിതരണത്തിന് മാത്രം 200 രൂപയുടെ പെട്രോള്‍ വേണമെന്ന അവസ്ഥയായി അതോടെ ബൈക്ക് 22000 രൂപയ്ക്ക് വില്‍ക്കുവാന്‍ പാണ്ഡുരംഗ തീരുമാനിച്ചു. ബൈക്കിന് പകരം 25000 രൂപയ്ക്ക് കുതിരയെ വാങ്ങുകയും ചെയ്തു.

കുതിരയുടെ ചെലവ് കുറവാണെന്നാണ് പാണ്ഡുരംഗയുടെ അഭിപ്രായം. അമ്മയും ഭാര്യയും മൂന്ന് മക്കളുമടക്കമുള്ളവരുടെ ചെലവൊക്കെ പാണ്ഡുരംഗയുടെ പാല്‍കച്ചവടത്തിലൂടെയാണ് കഴിഞ്ഞ് പോകുന്നത്. ഒരു ദിവസം 15 ലിറ്റര്‍ പാല് വില്‍ക്കുന്ന പാണ്ഡുരംഗ കുതിരയെ വാങ്ങിയതോടെ ചെറിയ സാമ്പത്തിക ലാഭം കണ്ടെത്തിയതിന്റെ ആശ്വാസത്തിലുമാണ്.