തൂത്തുക്കുടിയില്‍ സമരക്കാര്‍ക്ക് നേരെ പൊലീസ് നടത്തിയ വെടിവെപ്പിനെതിരെ നല്‍കിയ ഹരജി പരിഗണിക്കുന്നത് സുപ്രീംകോടതി തിങ്കളാഴ്ചത്തേക്ക് മാറ്റി. കേസ് ഇന്ന് കേള്‍ക്കാന്‍ സാധിക്കില്ലെന്ന് കോടതി പറഞ്ഞു.
തൂത്തുക്കുടിയിലെ പൊലീസ് വെടിവെപ്പില്‍ സി.ബി.ഐ അന്വേഷണം വേണമെന്നാവശ്യപ്പെട്ട് ജി.എസ് മണി എന്നയാളാണ് ഹര്‍ജി നല്‍കിയത്. നൂറു ദിവസത്തിലേറെയായി തൂത്തുക്കുടിയില്‍ സ്‌റ്റെര്‍ലൈറ്റ് കോപ്പര്‍ പ്ലാന്റിനെതിരായി നാട്ടുകാര്‍ സമരം നടത്തുന്നു. പ്ലാന്റ് പരിസര മലിനീകരണമുണ്ടാക്കുന്നുവെന്നും അടച്ചു പൂട്ടണമെന്നും ലൈസന്‍സ് പുതുക്കരുതെന്നും ആവശ്യപ്പെട്ടായിരുന്നു സമരം.

കഴിഞ്ഞ ദിവസം സമരക്കാര്‍ പ്ലാന്റിലേക്ക് നടത്തിയ ലോങ് മാര്‍ച്ചിനു നേരെ പൊലീസ് വെടിവെക്കുകയായിരുന്നു. വെടിവെപ്പില്‍ 13 പേര്‍ കൊല്ലപ്പെട്ടു. വെടിവെപ്പ് മനഃപൂര്‍വമായിരുന്നെന്ന് തെളിയിക്കുന്ന ദൃശ്യങ്ങളും പറത്തു വന്നിരുന്നു. 
തുടര്‍ന്നാണ് സംഭവത്തില്‍ സി.ബി.ഐ അന്വേഷണം ആവശ്യപ്പെട്ട് സുപ്രീം കോടതിയില്‍ ഹരജി നല്‍കിയത്.