ജോലിയില്‍ നിന്ന് വിരമിച്ച ശേഷം കൂടുതല്‍ക്കാലം യു.എ.ഇ.യില്‍ താമസിക്കാന്‍ ഇഷ്ട്ടമുള്ളവര്‍ക്ക് അഞ്ച് വര്‍ഷത്തെ വിസ അനുവദിച്ച് യുഎഇ മന്ത്രിസഭ. യു.എ.ഇ.വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂമാണ് ഇതു സംബന്ധിച്ച പ്രഖ്യാപനം നടത്തിയത്. വേനലവധിക്കുശേഷമുള്ള ആദ്യ മന്ത്രിസഭാ യോഗത്തിലാണ് ഈ തീരുമാനം. രാജ്യത്തിന്റെ സാമ്പത്തികസ്ഥിതി കൂടുതല്‍ മെച്ചപ്പെടുത്തുന്നതിനുള്ള നടപടികള്‍ക്ക് ഞായറാഴ്ച ചേര്‍ന്ന മന്ത്രിസഭായോഗം രൂപം നല്‍കിയതായും അദ്ദേഹം അറിയിച്ചു.

ദുബായില്‍ താമസിക്കുന്നതിനായി മൂന്ന് വ്യവസ്ഥകളാണ് പ്രധാനമായും മുന്നോട്ട് വെച്ചിരിക്കുന്നത്. ഇരുപത് ലക്ഷം ദിര്‍ഹത്തിന്റെ (ഏതാണ്ട് 3,92,62,181 രൂപ )നിക്ഷേപം വസ്തുവകകളില്‍ ഉണ്ടായിരിക്കണം. അല്ലെങ്കില്‍ പത്ത് ലക്ഷത്തിലേറെ ദിര്‍ഹത്തിന്റെ സമ്പാദ്യം യു.എ.ഇ.യില്‍ ഉണ്ടായിരിക്കണം. മാസം തോറും 20,000 ദിര്‍ഹത്തില്‍(ഏതാണ്ട് 3,92,621 രൂപ) കുറയാത്ത വരുമാനവും അയാള്‍ക്കുണ്ടായിരിക്കണം. ഈ വ്യവസ്ഥകളനുസരിച്ചായിരിക്കും അഞ്ച് വര്‍ഷ വിസ അനുവദിക്കുന്നതെന്ന് ഞായറാഴ്ചത്തെ മന്ത്രിസഭായോഗത്തിന് ശേഷം ശൈഖ് മുഹമ്മദ് അറിയിച്ചു.