വിൽപത്രം തയാറാക്കുമ്പോൾ പ്രവാസികൾ നിർബന്ധമായും അറിഞ്ഞിരിക്കേണ്ട കാര്യങ്ങൾ...
ഓരോ പ്രവാസിയും നിര്‍ബന്ധമായും ചെയ്തിരിക്കേണ്ട ഒരു കാര്യമാണ് വില്‍പത്രം തയ്യാറാക്കുക എന്നത്. യു .എ.ഇ.യില്‍ വച്ച് പെട്ടന്നുണ്ടാകുന്ന മരണം പലപ്പോഴും പ്രവാസികളുടെ കുടുംബങ്ങള്‍ വഴിയാധാരമാകുന്നതിന് കാരണമാകും. സ്വന്തം സംരംഭങ്ങള്‍ നടത്തുന്ന പലരുടെയും പെട്ടന്നുള്ള മരണത്തെത്തുടര്‍ന്ന് പങ്കാളിക്ക് അവകാശമില്ലാത്തതിന്റെ പേരില്‍ സ്ഥാപനങ്ങള്‍ വരെ അടച്ചു പൂട്ടേണ്ടി വരുന്നത് സാധാരണമാകുകയാണ്. നിയമപരമായ തടസങ്ങളാണ് പലപ്പോഴും ഇതിനു കാരണമാകുന്നത്.
മറ്റു രാജ്യങ്ങളില്‍ നിന്ന് വ്യത്യസ്തമായി , മരണത്തെത്തുടര്‍ന്ന് സ്വത്ത് കൂടെ ജീവിക്കുന്ന പങ്കാളിക്ക് നല്‍കണം എന്ന് ഇവിടുത്തെ നിയമം അനുശാസിക്കുന്നില്ല. എന്നാല്‍ ഒരു വില്‍പത്രം ഉണ്ടെങ്കില്‍ യു .എ.ഇ.യുടെ സിവില്‍ ട്രാന്‍സാക്ഷന്‍സ് നിയമത്തിന്റെ കീഴില്‍ ഇതിനു അംഗീകാരം ലഭിക്കും. വില്‍പത്രം രജിസ്റ്റര്‍ ചെയ്യാതിരുന്നാൾ മരിച്ച ആ വ്യക്തിയുടെ ബാങ്ക് അക്കൗണ്ടുകള്‍ മരവിപ്പിക്കും. ആശ്രിത വിസ റദ്ദാക്കപ്പെടും. ലൈഫ് ഇന്‍ഷുറന്‍സ് തുക കട ബാധ്യതകള്‍ തീര്‍ക്കാന്‍ വിനിയോഗിക്കും, അല്ലാത്ത പക്ഷം കോടതിയുടെ തീരുമാനത്തിന് വിടും. സമ്പാദ്യത്തിലെ ഭൂരിഭാഗവും കുടുംബത്തിലെ പല അംഗങ്ങള്‍ക്കുമായി വീതിച്ചു പോകും. അതിനാൽ എല്ലാ പ്രവാസികളും മുന്‍കരുതൽ എന്ന നിലയ്ക്ക് വില്‍പത്രം തയ്യാറാക്കി രജിസ്റ്റര്‍ ചെയ്യേണ്ടത് അത്യാവശ്യമാണ്. ഏറ്റവുമടുത്ത കുടുംബാംഗങ്ങളോട് സമ്പാദ്യത്തിന്റെയും, ബാധ്യതകളുടെയും വിവരങ്ങള്‍ കൃത്യമായി രേഖകള്‍ സഹിതം അറിയിച്ചിരിക്കണം. തൊഴില്‍സ്ഥലത്തെ ആനുകൂല്യങ്ങള്‍ ലഭിക്കാന്‍ കൃത്യമായ വിവരങ്ങള്‍ തൊഴിലുടമക്ക് കൈ മാറണം , ഇതില്‍ വ്യക്തമായി ഒരു നോമിനിയെ നിര്‍ദ്ദേശിക്കുകയാണ് ഏറ്റവും പ്രധാനം.
വില്‍പത്രം തയ്യാറാക്കുന്നതിനായി നിയമവിദഗ്ദ്ധരുടെ സഹായം തേടാം. എമിറേറ്റ്‌സ് ഐഡി , പാസ്സ്പോര്‍ട്ട് എന്നിവയാണ് വില്‍പത്രം രജിസ്റ്റര്‍ ചെയ്യാന്‍ ആവശ്യമായ രേഖകള്‍. അബുദാബിയിലാണെങ്കില്‍ അബുദാബി ജുഡീഷ്യല്‍ ഡിപ്പാര്‍ട്‌മെന്റിന്റെ(എ.ഡി.ജെ.ഡി.) വെബ്‌സൈറ്റ് വഴി അപേക്ഷ സമര്‍പ്പിക്കാം.
അപേക്ഷകന്റെ യോഗ്യത പരിശോധിച്ച ശേഷം അപേക്ഷ സ്വീകരിച്ച വിവരം എസ് .എം.എസ് വഴി അപേക്ഷകനെ അറിയിക്കും. അതല്ല അപേക്ഷയില്‍ മാറ്റങ്ങള്‍ വരുത്തേണ്ടതുണ്ടെങ്കില്‍ അക്കാര്യവും അറിയിക്കും. പിന്നീട് നടപടികള്‍ പൂര്‍ത്തിയാക്കാന്‍ നോണ്‍-മുസ്ലിംസ് വില്‍സ് രജിസ്ട്രേഷന്‍ ഓഫീസുമായി ബന്ധപ്പെട്ട് അപ്പോയ്ന്റ്‌മെന്റ് എടുക്കണം . അപ്പോയ്ന്റ്‌മെന്റ് ലഭിക്കുന്ന ദിവസം നേരിട്ടെത്തി ഒറിജിനല്‍ രേഖകള്‍ ഹാജരാക്കണം നടപടികള്‍ പൂര്‍ത്തിയായാല്‍ വില്‍പത്രം നിയമവിധേയമാകും. ഇത് നോട്ടറി വകുപ്പ് സാക്ഷ്യപ്പെടുത്തുകയും ചെയ്യും. 950 ദിര്‍ഹമാണ് രജിസ്റ്റര്‍ ചെയ്യാനുള്ള നിരക്ക്. കൂടുതല്‍ വിവരങ്ങള്‍ക്ക് 026513257 എന്ന നമ്പറിലോ non-muslims@ adjd.gov.ae എന്ന വിലാസത്തിലോ ബന്ധപ്പെടാം.
https://www.facebook.com/Malayalivartha
