ഓഗസ്റ്റ് രണ്ടാം വാരത്തോടെ വിദേശത്ത് നിന്ന് കേരളത്തിലേക്ക് പണം അയയ്ക്കുന്നതില്‍ മുപ്പത് ശതമാനത്തോളം വര്‍ധനവ്. രൂപയുടെ മൂല്യം ഇടിയുന്നതാണ് ഇതിന് കാരണം. പ്രവാസികൾക്കാണ് ഇതിന്റെ നേട്ടം കൈവരിക്കാൻ ആകുന്നത്. വരും ദിവസങ്ങളിലും രൂപയുടെ മൂല്യമിടിവ് തുടര്‍ന്നാല്‍ കേരളത്തിലേക്കെത്തുന്ന തുകയിലും വര്‍ധനയുണ്ടാകും.

യുഎഇ ദിര്‍ഹം ദിവസങ്ങള്‍ക്കുള്ളില്‍ 20 രൂപയിലെത്തുമെന്നാണ് സൂചനകൾ കാണിക്കുന്നത്. യുഎസ്-ചൈന വ്യാപാര തര്‍ക്കങ്ങള്‍, ഉയരുന്ന എണ്ണ വില തുടങ്ങിയ വിഷയങ്ങളുടെ അടിസ്ഥാനത്തില്‍ രൂപയുടെ മൂല്യം ഇടിഞ്ഞതോടെ നിരക്ക് വര്‍ധന നിലനില്‍ക്കുന്നുണ്ടെങ്കിലും പ്രവാസികൾ പ്രതീക്ഷയിലാണ്.

ഓഗസ്റ്റോടെ നിരക്കിലുണ്ടായ കുതിച്ചുചാട്ടം അമ്പരിപ്പിക്കുന്നതായിരുന്നു. പ്രളയക്കെടുതിയിൽ ദുരിതം അനുഭവിക്കുന്ന കേരളത്തിന് കൈത്താങ്ങാകാൻ പ്രവാസികൾ മുന്നിട്ടു നിന്നതിനു പിന്നിലെ കാരണവും രൂപയുടെ മൂല്യം ഇടിഞ്ഞതുതന്നെയാണ്. നിരവധി പ്രവാസികളാണ് ഇത്തരത്തിൽ കേരളത്തിന് ധനസഹായം ചെയ്തത്. അതേസമയം 2014 -2015 കാലഘട്ടത്തില്‍നിന്നു വ്യത്യസ്തമായി ബാങ്ക് വായ്പ എടുത്ത് പണം അയയ്ക്കുന്നവരുടെ എണ്ണത്തില്‍ ഇത്തവണ കുറവുണ്ടായിട്ടുണ്ടെന്ന് റിപ്പോര്‍ട്ട്.