ഒനീല്‍ കുറുപ്പ് എന്ന അമേരിക്കന്‍ മലയാളിക്ക് ഇപ്പോളും ഞെട്ടൽ മാറിയിട്ടില്ല. ആകാശത്തിലൂടെ പറന്നുപോകുന്ന വിമാനം റോഡിലൂടെ പോകുന്ന കാറില്‍ വന്ന് ഇടിക്കുകയായിരുന്നു. യുഎസ്‌ ലെ ടെക്‌സാസിലാണ് സംഭവം.

യുഎസിലെ ഡ്രഗ് എന്‍ഫോഴ്‌സ്‌മെന്റ് എജന്‍സിയുടെ ചെറുവിമാനമാണ് തകരാറിലായതിനെ തുടര്‍ന്ന് അടിയന്തിരമായി നിലത്തിറക്കാന്‍ ശ്രമിക്കുന്നതിന്ഇടയിൽ അപകടം ഉണ്ടാക്കിയത്. റോഡിലൂടെ പോയ വാഹനങ്ങളെയെല്ലാം ഇടിച്ചു തെറിപ്പിച്ചുകൊണ്ടാണ് വിമാനം നിന്നത്. അപകട സമയത്ത് ഒനീലും മകൻ ആരവും വാഹനത്തിലുണ്ടായിരുന്നു. കാറിന്റെ ഒരു വശം തകര്‍ന്നെങ്കിലും ഒനീലിനും മകന്‍ ആരവിനും പരുക്കേറ്റില്ല. തന്റെ ഫേയ്‌സ്ബുക്കിലൂടെയാണ് ഒനീല്‍ അപകടവിവരം പങ്കുവെച്ചത്.

ആ നിമിഷം എനിക്കും മകനും ജീവന്‍ നഷ്ടമായെന്ന് കരുതി. ദൈവത്തിന് നന്ദി. ടെസ്ല കാറിനും. എന്ന് അദ്ദേഹം ഫേസ്ബുക്കിൽ കുറിച്ചു. വിമാനത്തിന്റെ ചിത്രത്തിനൊപ്പമാണ് അദ്ദേഹത്തിന്റെ പോസ്റ്റ്.