15 വർഷത്തെ കഠിനപ്രയ്തനത്തിനൊടുവിൽ അബുദാബി ഭാഗ്യദേവത കടാക്ഷിച്ചപ്പോൾ മലയാളിയായ മുഹമ്മദ് കുഞ്ഞിയെ തേടിയെത്തിയത് 13 കോടിയുടെ ഭാഗ്യം. ബുധനാഴ്ചയായിരുന്നു നറുക്കെടുപ്പ്. അബുദാബി ബിഗ് ടിക്കറ്റ് നറുക്കെടുപ്പുകളില്‍ മലയാളിയായ മുഹമ്മദ് കുഞ്ഞി മയ്യത്തയ്ക്കാണ് 70 ലക്ഷം ദിര്‍ഹം (13 കോടി രൂപ) സമ്മാനം ലഭിച്ചത്. 121013 എന്ന ടിക്കറ്റിനായിരുന്നു മുഹമ്മദ് കുഞ്ഞിയെ ഭാഗ്യം തേടിയെത്തിയത്. മുഹമ്മദ് കുഞ്ഞിയുടെ രണ്ട് മക്കളും ഭാര്യയും നാട്ടിലാണ്.

താനാണ് വിജയി എന്ന ഫോണ്‍ സന്ദേശം വന്നപ്പോള്‍ വിശ്വസിക്കാനായില്ലെന്ന് മുഹമ്മദ് കുഞ്ഞി പറയുന്നു. സുഹൃത്തും ബന്ധുവുമായ അബൂബക്കറിന്റെ വൃക്കമാറ്റി വക്കാന്‍ ആവശ്യമായ പണം നല്‍കുകയാണ് തന്റെ ആദ്യ ലക്ഷ്യം എന്ന് അദ്ദേഹം പറയുന്നു. 'ജീവിതം മാറ്റി മറിച്ച ദിവസമാണിന്ന്, വീട് എന്ന സ്വപ്‌നം ഇനി യാഥാര്‍ത്ഥ്യമാക്കണം. പറ്റുമെങ്കില്‍ സ്വന്തമായി ഒരു ബിസിനസ് തുടങ്ങണം. മുഖ്യമന്ത്രിയുടെ ദുരിതാശ്വാസ നിധിയിലേക്ക് ഒരു തുക സംഭാവന നല്‍കും.' -മുഹമ്മദ് കുഞ്ഞി പറഞ്ഞു. അബുദാബി ബിനിയാസില്‍ ഒരു തുണിക്കടയില്‍ സെയില്‍സ്മാനായി ജോലി ചെയ്ത് വരികയാണ് മുഹമ്മദ് കുഞ്ഞി.