സൗദിയിൽ ജോലിചെയ്ത് വരികയായിരുന്നു പ്രവാസി മലയാളി മരണപ്പെട്ടു. തിരുവനന്തപുരം പൂന്തുറ അമ്പലത്തറ സ്വദേശി നങ്ങേലിച്ചിവിളകം സുകുമാരന്‍ മകന്‍ സുജിത്ത് കുമാര്‍ (33) ആണ് മരിച്ചത്. നെഞ്ച് വേദനയെത്തുടർന്ന് ചികിത്സയിലായിരുന്ന സുജിത് സൗദി ജര്‍മ്മന്‍ ഹോസ്പിറ്റലില്‍ വെച്ചാണ് മരണപ്പെട്ടത്.

സൗദിയിലെ അല്‍റായി കമ്പനിയില്‍ പന്ത്രണ്ട് വര്‍ഷമായി ജോലി ചെയ്ത് വരികയായിരുന്ന സുജിത്ത് നെഞ്ച് വേദനയുണ്ടായതിനാലാണ് ചികിത്സക്കായി സഹോദരനുമൊത്ത് ഹോസ്പിറ്റലില്‍ എത്തിയത്. അതേസമയം രണ്ട് ദിവസം മുൻപ് പല്ലെടുത്തതിനെ തുടര്‍ന്ന് നിലക്കാത്ത രക്തസ്രാവവും സുജിത്ത് കുമാറിനുണ്ടായിരുന്നു.

സൗദി ജര്‍മ്മനില്‍ വിദഗ്ത പരിശോദനയില്‍ രക്താര്‍ബുദമാണെന്ന് സ്ഥിരീകരിക്കുകയും മൂന്ന് ദിവസത്തോളം തീവ്രപരിചരണ വിഭാഗത്തിലും പിന്നീട് വെന്റിലേറ്ററിലും ചികിത്സ നടത്തിയെങ്കിലും തിങ്കളാഴ്ച രാത്രിയോടെ സുജിത്ത് കുമാര്‍ മരണപ്പെടുകയുമായിരുന്നു.

ഭാര്യ നിമിഷയോടൊപ്പം ദര്‍ബില്‍ താമസിച്ച്‌ വരികയായിരുന്ന സുജിത്ത് അവസാനമായി നാട്ടില്‍ പോയത് മൂന്ന് വര്‍ഷം മുൻപായിരുന്നു. ദര്‍ബില്‍ ജോലി ചെയ്യുന്ന സഹോദരന്‍ സുധിഷ് കുമാര്‍, ദമ്മാമില്‍ നിന്നും അമ്മാവന്‍ സുഷീന്ദ്രന്‍ എന്നിവര്‍ അബഹയിലെത്തിയിട്ടുണ്ട്. മറ്റൊരു സഹോദരനൊപ്പം സുജിത്ത് കുമാറിന്റെ ഭാര്യ ബുധനാഴ്ച നാട്ടിലേക്ക് തിരിച്ചു. നടപടിക്രമങ്ങള്‍ക്ക് അസീര്‍ പ്രവാസി സംഘം റിലീഫ് വിഭാഗം നേതാക്കളായ സുരേഷ് മാവേലിക്കര, ബാബു പരപ്പനങ്ങാടി, ഷൗക്കത്ത് ആലത്തൂര്‍ എന്നിവര്‍ രംഗത്തുണ്ട്.