സൗദിയിൽ പ്രവാസി മലയാളിയായ നഴ്സിനെ താമസസ്ഥലത്ത് ആത്മഹത്യ ചെയ്ത നിലയിൽ കണ്ടെത്തി. സൗദി അല്‍ഹസ്സ ഹഫൂഫില്‍ നിന്നും 200 കിലോമീറ്റര്‍ അകലെയുള്ള ഹുറെസിലെ ഹെല്‍ത്ത്‌ സെന്റെറിലെ നഴ്സിനെയാണ് മരിച്ച നിലയിൽ കണ്ടെത്തിയത്. തിരുവനന്തപുരം പള്ളിക്കല്‍ പകൽക്കുറി ആറയില്‍ പുന്നവിള വീട്ടില്‍ നീന (27) ആണ് ജീവനൊടുക്കിയത്.

മൂന്നു വര്‍ഷമായി അല്‍ഹസ്സയില്‍ ജോലി നോക്കുന്ന നീന കഴിഞ്ഞ മാസം 24 നാണ് അവധി കഴിഞ്ഞു നാട്ടില്‍ നിന്നും മടങ്ങി എത്തിയത്. ഇതിനിടെ വിവാഹനിശ്ചയം കഴിഞ്ഞിരുന്നു. അമ്മയ്ക്ക് പെട്ടെന്ന് സുഖമില്ലതായപ്പോള്‍ ഉടനെ പത്തു ദിവസത്തേയ്ക്ക് നാട്ടില്‍ പോകാന്‍ നീന അവധി ആവശ്യപ്പെട്ടിരുന്നുവെങ്കിലും ആശുപത്രി അധികാരികള്‍ അനുമതി നല്‍കിയിരുന്നില്ല. ഇതോടെ ഏറെ മാനസികവിഷമത്തിലായിരുന്നു നീന. ഇത് തന്നെയാണ് ആത്മഹത്യയിലേക്ക് നയിച്ചതെന്നും ആക്ഷേപം ഉയരുന്നുണ്ട്.

കശുവണ്ടി തൊഴിലാളിയായ നളിനിയാണ് അമ്മ ,. പിതാവ് തമ്പി നേരത്തെ ഇവരെ ഉപേക്ഷിച്ചു പോയിരുന്നു ഏക സഹോദരന്‍ വിഷ്ണു. കിംഗ്‌ ഫഹദ് ആശുപത്രിയില്‍ സൂക്ഷിച്ചിരിയ്ക്കുന്ന മൃതദേഹം നാട്ടിലെത്തിയ്ക്കാന്‍ ശ്രമം നടക്കുകയാണ്.