അന്താരാഷ്ട്രതലത്തിൽ പ്രശസ്തമായ 24-ാമത് ദുബായ് ഷോപ്പിംഗ് ഫെസ്റ്റിവൽ ഡിസംബർ 26 ന്  തുടക്കം കുറിക്കും. സിറ്റി ഓഫ് ഗോൾഡ് എന്ന പേരിൽ അറിയപ്പെടുന്ന ദുബായിയുടെ വാർഷിക വ്യാപാര മാമാങ്കം ഡിസംബർ 26 ന് ആരംഭിച്ച് ഫെബ്രുവരി രണ്ടുവരെ തുടരും .

സ്വർണ വ്യവസായ മേഖലയിലെ ഏറ്റവും വലിയ വ്യാപാര ശൃംഖലയുള്ള സംഘടനയായ ദുബായ് ഗോൾഡ് ആൻഡ് ജുവലറി ഗ്രൂപ്പ്, ദുബായ് ഫെസ്റ്റിവെൽ ആൻഡ് റീടെയിൽ എസ്റ്റാബ്ലിഷ്‌മെന്റുമായി കൈകോർത്തുകൊണ്ടണ് 24-ാമത് ദുബായ് ഷോപ്പിംഗ് ഫെസ്റ്റിവൽ പ്രഖ്യാപിച്ചത്.

വജ്ര- സ്വർണാഭരണങ്ങളുടെ ഇരട്ടസമ്മാനപദ്ധതികളാണ് ഈ വർഷത്തെ ഫെസ്‌ററിവലിന്റെ സവിശേഷത. 32 കിലോ സ്വർണം, ഒട്ടേറെ സ്വർണക്കട്ടികൾ, അഞ്ച് ബി.എം.ഡബ്ള്യു ലക്‌ഷ്വറി കാറുകൾ, 65 ഇഞ്ചിന്റെ ആറ് സാംസങ് ടി.വി. എന്നിവ സമ്മാനപദ്ധതിയിലൂടെ അഞ്ച്‌ ആഴ്ചയ്ക്കുള്ളിൽ നൽകും. 142 വിജയികളെയാണ് ദുബായ് ഗോൾഡ് ആൻഡ് ജൂവലറി ഗ്രൂപ്പ് തിരഞ്ഞെടുക്കുന്നത്.

 ജൂവലറി വിൽപ്പനയെ കൂടുതൽ മെച്ചപ്പെടുത്താനും ഊർജസ്വലമാക്കാനും വേണ്ടി വ്യത്യസ്തവും നവീനവുമായ രണ്ടു സമ്മാനപദ്ധതികളാണ് ഷോപ്പിങ് ഫെസ്റ്റിവലിൽ പങ്കെടുക്കുന്ന മുന്നൂറോളം ജ്യൂവലറികളിലെ ഉപഭോക്താക്കൾക്കായി തയ്യാറാക്കിയിരിക്കുന്നത്. ഉപഭോക്താക്കൾക്ക് സമ്മാനം നേടാനായിയുള്ള ഏറ്റവും മികച്ച അവസരമാണിതെന്നും ദുബായ് ഗോൾഡ് ആൻഡ് ജൂവലറി ഗ്രൂപ്പ് ചെയർമാൻ തവ്ഹിദ് അബ്ദുള്ള പത്രസമ്മേളനത്തിൽ അറിയിച്ചു.

 ഓരോ അഞ്ഞൂറു ദിർഹത്തിന്റെ സ്വർണാഭരണത്തിനും ലഭ്യമാവുന്ന നറുക്കെടുപ്പ് കൂപ്പണിലൂടെ ആകെ 32 കിലോ സ്വർണം സമ്മാനമായി നൽകും.

 ഡിസംബർ 27 മുതൽ ജനുവരി 26 വരെ ദിവസവും നാലുവിജയികളെ കാത്തിരിക്കുന്നത് ദിവസവും 250 ഗ്രാം സ്വർണം വീതം. ഫെബ്രുവരി രണ്ടിന് നടക്കുന്ന അവസാന നറുക്കെടുപ്പിലെ ഒരു ഭാഗ്യശാലിക്ക് ഒരു കിലോ സ്വർണവും ലഭിക്കും.

 ജനുവരി 27 മുതൽ ഫെബ്രുവരി ഒന്ന് വരെയുള്ള ആറ് വിജയികൾക്ക് 100 ഗ്രാം വീതം ഗോൾഡ് ബാറുകളും ആറ് വിജയികൾക്ക് സാംസങ് ടി.വിയും സമ്മാനമായി ലഭിക്കും. ചുരുങ്ങിയത് 500 ദിർഹത്തിന് വജ്രാഭരണം വാങ്ങിക്കുന്ന ഭാഗ്യശാലികളെ ജനുവരി 5, 12, 19,26, ഫെബ്രുവരി രണ്ട് എന്നീ തീയതികളിൽ നടക്കുന്ന നറുക്കെടുപ്പുകളിലെ ജേതാക്കൾക്ക് ബി.എം.ഡബ്‌ള്യു കാറുകളാണ് സമ്മാനം.

ദുബായ് ഫെസ്റ്റിവെൽ ആൻഡ് റീടെയിൽ എസ്റ്റാബ്ലിഷ്‌മെൻറ് സി.ഇ.ഒ. അഹ്‌മദ് അൽ ഖാജ, ദുബായ് ഗോൾഡ് ആൻഡ് ജൂവലറി ഗ്രൂപ്പ് ബോർഡ് മെംബറും ഡി.സി.ടി.സി.എം. ചെയർ പേഴ്‌സൺ (മാർക്കറ്റിങ് സി.ഇ.ഒ., സ്ട്രാറ്റജിക് അലൈൻസ് ആൻഡ് പാർട്ണർഷിപ്പ്‌ സെക്ടർ) ലൈലാ സുഹൈൽ, റാഫിൾ ആൻഡ് പ്രൊമോഷൻസ് ഡയറക്ടർ അബ്ദുള്ള ഹസ്സൻ അൽ അമീറി എന്നിവരുടെ സാന്നിധ്യത്തിലായിരുന്നു സമ്മാനപദ്ധതികളുടെ പ്രഖ്യാപനം.പങ്കെടുക്കുന്ന മാളുകൾ, നറുക്കെടുപ്പ് ദിവസങ്ങൾ തുടങ്ങിയ എല്ലാ വിവരങ്ങളും http://dubaictiyof gold.com/ എന്ന വെബ്‌സൈറ്റിൽ ലഭ്യമാണ്.