വിസ്മയ കാഴ്ചകളുടെയും ആദായ വില്‍പനയുടെയും ഉല്‍സവമായ ദുബായ് ഷോപ്പിങ് ഫെസ്റ്റിവലിൽ ഇത്തവണ കൈനിറയെ സമ്മാനങ്ങളും . ഫിബ്രുവരി രണ്ട വരെ നീളുന്ന ഷോപ്പിങ് മാമാങ്കം 12 മണിക്കൂർ നീളുന്ന മെഗാ വിൽപ്പനയോടെയാണ് തുടങ്ങുന്നത് . മേളയുടെ ആദ്യ ദിവസം 25 മുതൽ 90 ശതമാനം വരെ വിലക്കുറവുണ്ടാകുമെന്നാണ് സംഘാടകർ അറിയിച്ചിരിക്കുന്നത് . പതിവുപോലെ ഷോപ്പിങ്, വിനോദങ്ങൾ, സമ്മാനങ്ങൾ എന്നീ പ്രധാന മൂന്ന് ചേരുവകളോടെയാണ് മേളയുടെ 24-ാം പതിപ്പും ഒരുങ്ങുന്നത്

സമ്മാനപദ്ധതിയിൽ 142 വിജയികളെകണ്ടെത്തും . ഷോപ്പിംഗ് ഫെസ്റ്റിവലിൽ പങ്കെടുക്കുന്ന മുന്നൂറോളം ജ്വല്ലറികളിൽ നിന്നും സ്വർണ വജ്രാഭരണങ്ങൾ വാങ്ങുന്നവരെയാണ് 32 കിലോ സ്വർണമുൾപ്പടെ വൻ സമ്മാനങ്ങൾ കാത്തിരിക്കുന്നത്.
ജനുവരി ഇരുപത്താറു വരെ ദിവസവും നറുക്കെടുപ്പിലൂടെ കണ്ടെത്തുന്ന നാല് പേർക്ക് 250 ഗ്രാം സ്വർണം വീതം സമ്മാനമായി ലഭിക്കും. ജനുവരി 26 മുതൽ ഫെബ്രുവരി 1 വരെ വിജയികൾക്ക് 100 ഗ്രാം വീതം സ്വർണ്ണം ലഭിക്കും . 65 ഇഞ്ച് സാംസങ് ടെലിവിഷൻ, വജ്രാഭരണം വാങ്ങിക്കുന്നവരിൽ നിന്നും തിരഞ്ഞെടുക്കുന്ന അഞ്ചു വിജയികൾക്ക് ബി എം ഡബ്ള്യു കാറുകൾ എന്നീ സമ്മാനങ്ങളും ഫെസ്റ്റിവലിൽ ഒരുക്കിയിരിക്കുന്നു .
മലയാളി ഉപഭോക്താക്കൾക്ക് കല്യാൺ ജ്യുവല്ലേഴ്‌സ് പ്രത്യേക സമ്മാനപദ്ധതി തയ്യാറാക്കിയിട്ടുണ്ടെന്നു എന്ന് കല്യാൺ ജ്യുവല്ലേഴ്‌സ്, ഓവർസീസ് ഓപ്പറേഷൻസ് മേധാവി എൻ ആർ വെങ്കട്ടരാമൻ മാധ്യമങ്ങളോട് പറഞ്ഞു.

1996 ൽ സ്ഥാപിതമായ ദുബായ് ഗോൾഡ് ആൻഡ് ജ്വല്ലറി ഗ്രൂപ്പ് ആദ്യമായാണ് സ്വർണ, വജ്രാഭരണങ്ങൾക്കായി പ്രത്യേകം സമ്മാനപദ്ധതികൾ പ്രഖ്യാപിക്കുന്നത്. ദുബായ് ഫെസ്റ്റിവൽ ആൻഡ് റീറ്റെയ്ൽ എസ്റ്റാബ്ലിഷ്മെന്റുമായി സഹകരിച്ചാണ് സമ്മാനപദ്ധതി ഒരുക്കിയിരിക്കുന്നത്

ആഡംബരക്കാറുകളും സ്വർണവും പണവും മറ്റ് വിലപിടിപ്പുള്ള സമ്മാനങ്ങളുമായി മെഗാ റാഫിൾ നറുക്കെടുപ്പുകളും മേളയുടെ ഭാഗമായുണ്ട്.

ദുബായ് കോൺറാഡ് ഹോട്ടലിൽ നടന്ന വാർത്താസമ്മേളനത്തിലാണ് സമ്മാനപദ്ധതികൾ പ്രഖ്യാപിച്ചത്. ദുബായ് ഫെസ്റ്റിവൽ ആൻഡ് റീറ്റെയ്ൽ എസ്റ്റാബ്ലിഷ്‌മെന്റ് സീ ഈ ഓ അഹ്മദ് അൽ ഖാജ, ദുബായ് ഗോൾഡ് ആൻഡ് ജ്വല്ലറി ഗ്രൂപ്പ് ചെയർമാൻ തവഹിദ് അബ്ദുള്ള, ബോർഡ് മെമ്പർ ലൈല സുഹൈൽ, ദുബായ് ഷോപ്പിംഗ് ഫെസ്റ്റിവൽ സംഘാടകർ എന്നിവർ വാർത്താസമ്മേളനത്തിൽ പങ്കെടുത്തിരുന്നു
വിവിധ രാജ്യങ്ങളിൽനിന്നുള്ള കലാകാരന്മാർ ഒരുക്കുന്ന സാംസ്കാരിക പരിപാടികളും വിനോദപരിപാടികളും കാർണിവലുകളും കുട്ടികൾക്കായുള്ള പ്രത്യേകപരിപാടികളും ഫെസ്റ്റിവലിന്റെ മാറ്റ് കൂട്ടും.