സൗദി വിദേശ വിനോദസഞ്ചാരികള്‍ക്ക് ഇ-വിസ ഏര്‍പ്പെടുത്താനുള്ള തീരുമാനം ഉടൻ
സൗദി വിദേശ വിനോദസഞ്ചാരികള്‍ക്ക് ഇ-വിസ ഏര്‍പ്പെടുത്താനുള്ള തീരുമാനം ഉടൻ എടുത്തേക്കുമെന്നു സൂചന.
സൗദിയില്‍ ആദ്യമായി നടന്ന ദിര്‍ഇയ്യ ഫോര്‍മുല ഇ-കാറോട്ട മത്സരം വീക്ഷിക്കാന്‍ 80 രാജ്യങ്ങളില്‍ നിന്നുള്ളവര്‍ക്ക് ഇലക്‌ട്രോണിക് വിസിറ്റിങ് വിസ അനുവദിച്ചിരുന്നു. ആയിരം വിദേശികള്‍ ഇത് പ്രയോജനപ്പെടുത്തിയിരുന്നു. . സൗദിയിലെത്തിയ വിദേശികള്‍ പൈതൃക ഗ്രാമങ്ങളും വിനോദ സഞ്ചാരകേന്ദ്രങ്ങളും സന്ദർശിക്കുകയും ഇ വിസ വിജയകരമാണെന്ന് കണ്ടെത്തുകയും ചെയ്തതിനെ തുടർന്നാണ് ഈ നടപടി.
ഇ-ടൂറിസ്റ്റ് വിസ അനുവദിക്കുന്ന രാജ്യങ്ങളുടെ ആദ്യ പട്ടികയില്‍ ഇന്ത്യയുടെ പേര് ഇതുവരെ ഇല്ല. നിലവില്‍ അമേരിക്ക, ഓസ്ട്രേലിയ, ജപ്പാന്‍, കൊറിയ തുടങ്ങിയ രാജ്യങ്ങളിലെ പൗരന്‍മാര്‍ക്ക് ഇ-വിസ അനുവദിക്കുന്നുണ്ട്. സന്ദര്‍ശകരില്‍ നിന്ന് മികച്ച പ്രതികരണം ലഭിച്ച സാഹചര്യത്തില്‍ ഇ-വിസകള്‍ കൂടുതല്‍ രാജ്യങ്ങളിലുള്ളവര്‍ക്ക് അനുവദിക്കുന്നത് സജീവ പരിഗണനയിലാണ്.
സൗദി ആഭ്യന്തര വിദേശ മന്ത്രാലയങ്ങളും സൗദി കമ്മീഷന്‍ ഫോര്‍ ടൂറിസം ആന്റ് നാഷണല്‍ ഹെറിറ്റേജും ചേര്‍ന്നാണ് വിദേശികള്‍ക്ക് ടൂറിസ്റ്റ് വിസകള്‍ അനുവദിക്കുന്നതിനുള്ള വ്യവസ്ഥകള്‍ക്ക് രൂപം നല്‍കിയത്. ഇത് പ്രകാരം വിദേശികള്‍ക്ക് ഒറ്റക്ക് സന്ദര്‍ശിക്കുന്നതിന് വിസ അനുവദിക്കില്ല. ടൂറിസ്റ്റ് വിസയ്ക്ക് അപേക്ഷിക്കുമ്പോള്‍ ആ ഗ്രൂപ്പില്‍ ചുരുങ്ങിയത് നാലു പേരെങ്കിലും ഉണ്ടാവണം എന്ന് ണ് നിര്ബന്ധവുമുണ്ട്. . അംഗീകൃത വിദേശ ടൂര്‍ ഓപറേറ്റര്‍മാരും സൗദിയില്‍ ലൈസന്‍സുള്ള ടൂര്‍ ഓപറേറ്റര്‍മാരും സഹകരിച്ചാണ് വിദേശ വിനോദ സഞ്ചാരികള്‍ക്കുള്ള യാത്രകള്‍ സംഘടിപ്പിക്കേണ്ടത്.
വിനോദ സഞ്ചാര ഗ്രൂപ്പ് സന്ദര്‍ശിക്കുന്ന പ്രദേശങ്ങള്‍, സഞ്ചരിക്കുന്ന റൂട്ടുകള്‍, സമയക്രമം എന്നിവയെല്ലാം മുന്‍കൂട്ടി ഓണ്‍ലൈന്‍ വഴി സമര്‍പ്പിച്ചാണ് ബന്ധപ്പെട്ട വകുപ്പുകളില്‍ നിന്ന് ഗ്രൂപ്പിനുള്ള അനുമതി സമ്പാദിക്കേണ്ടത്.
ആഭ്യന്തര വിദേശ മന്ത്രാലയങ്ങള്‍ വെരിഫിക്കേഷന്‍ നടപടികള്‍ പൂര്‍ത്തിയാക്കിയും മറ്റും വ്യവസ്ഥകള്‍ പാലിച്ചുമാണ് ഗ്രൂപ്പുകള്‍ക്ക് വിസ അനുവദിക്കുക. കൂടാതെ സൗദി കമ്മിഷന്‍ ഫോര്‍ ടൂറിസം ആന്‍ഡ് നാഷണല്‍ ഹെരിറ്റേജ് അനുമതി നല്‍കുന്ന പ്രദേശങ്ങളിലും പ്രവിശ്യകളിലും മാത്രം സന്ദര്‍ശനം നടത്തുന്നതിനാണ് വിദേശ ടൂറിസ്റ്റുകള്‍ക്ക് അനുവാദമുണ്ടാവുക. മക്കയും മദീനയും സന്ദര്‍ശന പദ്ധതിയില്‍ ഉള്‍പ്പെടില്ല. വിദേശ ടൂറിസ്റ്റുകള്‍ സൗദി വിടുന്നതുവരെ ഇവരുടെ ചുമതല ടൂര്‍ ഓപ്പറേറ്റര്‍മാര്‍ക്ക് ആയിരിക്കും.
ഇ വിസ ഏർപ്പെടുത്തിയാൽ കൂടുതല്‍ വിനോദസഞ്ചാരികള്‍ സൗദി സന്ദർശനത്തിന് എത്താൻ സാധ്യതയുണ്ട്. ഇതോടെ വിനോദസഞ്ചാരവുമായി ബന്ധപ്പെട്ട് കൂടുതല്‍ സ്വദേശികള്‍ക്ക് തൊഴിലവസരം ലഭ്യമാകുമെന്നാണ് കരുതുന്നത്. അതുകൊണ്ടുതന്നെ തൊഴില്‍ മന്ത്രാലയവും ടൂറിസം ആന്‍ഡ് നാഷണല്‍ ഹെറിറ്റേജ് അതോറിറ്റിയും ഇ-വിസ അനുവദിക്കുമെന്നാണ് പ്രതീക്ഷിക്കുന്നത്
https://www.facebook.com/Malayalivartha
