യു.എ.ഇയുടെ പുതിയ പ്രസിഡന്റായി ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനെ ഏഴ് എമിറേറ്റ്‌സുകളിലെ ഭരണാധിപന്മാര്‍ ചേര്‍ന്ന സുപ്രീംകൗണ്‍സില്‍ ഏകകണ്ഠമായി തിരഞ്ഞെടുത്തു, യു.എ.ഇയുടെ മൂന്നാമത്തെ പ്രസിഡന്റും അബുദാബിയുടെ 17 ാമത് ഭരണാധികാരിയുമായി ഷെയ്ഖ് മുഹമ്മദ്.

കഴിഞ്ഞ ദിവസം അന്തരിച്ച ഷെയ്ഖ് ഖലീഫ ബിന്‍ സായിദിന്റെ അര്‍ദ്ധ സഹോദരനാണ്. 2005 ജനുവരി മുതല്‍ യു.എ.ഇ സായുധസേനയുടെ ഉപ സര്‍വസൈന്യാധിപനാണ്. 2004 നവംബറില്‍ അബുദാബിയുടെ കിരീടാവകാശിയായി

ഷെയ്ഖ് ഖലീഫ രോഗബാധിതനായ ശേഷം ഏഴു വര്‍ഷമായി ഭരണത്തില്‍ ഷെയ്ഖ് മുഹമ്മദ് പങ്കാളിയാണ്. യു.എ.ഇയുടെ രാഷ്ട്രപിതാവ് ഷെയ്ഖ് സായിദ് ബിന്‍ സുല്‍ത്താന്‍ അല്‍ നഹ്യാന്റെ മൂന്നാമത്തെ മകനായി 1961 മാര്‍ച്ച് 11നാണ് ജനനം. യു.എ.ഇ വ്യോമസേനയില്‍ പൈലറ്റായി സൈനിക സേവനം നടത്തിയിട്ടുണ്ട്.

2015ല്‍ യു.എ.ഇയില്‍ ആദ്യ സന്ദര്‍ശനത്തിനെത്തിയ ഇന്ത്യന്‍ പ്രധാനമന്ത്രി നരേന്ദ്രമോദിയെ ഷെയ്ഖ് മുഹമ്മദ് പ്രസിഡന്‍ഷ്യല്‍ എയര്‍പോര്‍ട്ടില്‍ നേരിട്ടെത്തിയാണ് സ്വീകരിച്ചത്. യു.എ.ഇയിലെത്തുന്ന രാഷ്ട്രത്തലവന്‍മാര്‍ക്ക് കൊട്ടാരത്തില്‍ സ്വീകരണമൊരുക്കുകയാണ് പതിവ്.

ഷെയ്ഖ് മുഹമ്മദും മുന്‍ഗാമികളെപ്പോലെ കേരളത്തിന്റെ പ്രിയ സ്‌നേഹിതന്‍. കഴിഞ്ഞ സര്‍ക്കാരിന്റെ കാലത്താണ് വിദേശനിക്ഷേപം തേടി മുഖ്യമന്ത്രി പിണറായി വിജയന്‍ യു.എ.ഇയിലെത്തിയപ്പോള്‍ നേരിട്ട് സന്നദ്ധത അറിയിച്ച വ്യക്തിയാണ്.

ലോകത്തെ ഏറ്റവും വലിയ നിക്ഷേപക സ്ഥാപനങ്ങളില്‍ ഒന്നായ 'മുബദല'യുടെ ചെയര്‍മാനാണ് ഷെയ്ഖ്. മുബദലയ്ക്ക് മുപ്പതിലധികം രാജ്യങ്ങളിലായി 16 ലക്ഷം കോടി രൂപയുടെ നിക്ഷേപമുണ്ട്. പെട്രോകെമിക്കല്‍ സമുച്ചയം, ഡിഫന്‍സ് പാര്‍ക്ക്, ലൈഫ് സയന്‍സ് പാര്‍ക്ക്, ഭക്ഷ്യസംസ്‌കരണ കേന്ദ്രം, വ്യോമയാന വ്യവസായം എന്നിവയിലാണ് മുബദലയ്ക്ക് താത്പര്യമുള്ളത്.

കേരളത്തില്‍ തുറമുഖ മേഖലയില്‍ നിക്ഷേപമുള്ള ദുബായ് ഡി.പി വേള്‍ഡും ഇന്‍ഡ്സട്രിയല്‍ പാര്‍ക്ക്, ജലഗതാഗതം എന്നിവയില്‍ നിക്ഷേപത്തിന് തയ്യാറാണ്. തിരുവനന്തപുരം- കാസര്‍കോട് ജലപാതയില്‍ ഭാഗമാക്കാനും അവര്‍ക്ക് താത്പര്യമുണ്ട്. ഉദ്യോഗസ്ഥതല നടപടി പുരോഗമിക്കുകയാണ്. ഷെയ്ഖ് മുഹമ്മദ് പ്രസിഡന്റായതോടെ ഇനി കാര്യങ്ങള്‍ വേഗത്തിലാകും. യു.എ.ഇയിലെ സായിദ് ചാരിറ്റബിള്‍ ഫൗണ്ടേഷന്റെ ചെയര്‍മാനായ അദ്ദേഹം,പ്രളയകാലത്ത് നമുക്ക് അവശ്യസാധനങ്ങള്‍ അയച്ചിട്ടുണ്ടായിരുന്നു.