അബുദാബിയില്‍ ഒറ്റ രാത്രികൊണ്ട് കോടീശ്വരന്മാരായി അഞ്ച് പ്രവാസികള്‍. അബുദാബി ബിഗ് ടിക്കറ്റിന്റെ സീരീസ് 286 നറുക്കെടുപ്പില്‍ സാന്ത്വന സമ്മാനമായി പത്ത് ലക്ഷം ദിര്‍ഹം (ഏകദേശം രണ്ടരക്കോടി രൂപ) വീതമാണ് അഞ്ച് ഇന്ത്യക്കാര്‍ക്ക് ലഭിച്ചത്. ഇതില്‍ ഒമാനില്‍ ജോലി ചെയ്യുന്ന മുരളി വാഴയില്‍, അജ്മാനില്‍ അക്കൗണ്ട് മാനേജറായ ലിയോ ലോറന്‍സ് എന്നീ മലയാളികളുമുണ്ട്.

50കാരനായ മുരളി വാഴയില്‍ ഒമാനില്‍ സൂപ്പര്‍വൈസറായി ജോലി ചെയ്യുകയാണ്. കഴിഞ്ഞ എട്ട് വര്‍ഷമായി ബിഗ് ടിക്കറ്റില്‍ ഭാഗ്യം പരീക്ഷിക്കുന്നുണ്ട്. 20പേരടങ്ങുന്ന നാല് വ്യത്യസ്ത ഗ്രൂപ്പുകളിലായാണ് അദ്ദേഹം ടിക്കറ്റെടുക്കാറുള്ളത്. ഒമ്പത് മാസമായി സ്വന്തം പേരിലാണ് ടിക്കറ്റെടുക്കുന്നത്. ഇപ്പോള്‍ ലഭിച്ച സമ്മാനത്തുക 20പേരുമായി വീതിച്ചെടുക്കുമെന്നും അദ്ദേഹം പറഞ്ഞു. പണം കുടുംബത്തിന്റെ ആവശ്യത്തിനായി ഉപയോഗിക്കുമെന്നാണ് മുരളി വാഴയില്‍ പറയുന്നത്.

2024 മുതല്‍ അജ്മാനില്‍ കുടുംബത്തോടൊപ്പം താമസിക്കുന്ന പ്രവാസിയാണ് ലിയോ ലോറന്‍സ്. ടിക്കറ്റ് നറുക്കെടുത്ത ദിവസം രാവിലെ തനിക്ക് എന്തോ നല്ലത് സംഭവിക്കാന്‍ പോകുന്നുണ്ടെന്ന് ലിയോ ഭാര്യയോട് പറഞ്ഞിരുന്നു. മകളെ ഡോക്ടറെ കാണിക്കാന്‍ പോകുന്നതിനിടെയാണ് സമ്മാനം ലഭിച്ച വിവരം തേടിയെത്തിയത്. പത്ത് സഹപ്രവര്‍ത്തകരുമായി ചേര്‍ന്നാണ് ലിയോ ടിക്കറ്റെടുത്തത്. അടുത്തിടെ ഒരു വില്ല വാങ്ങിയെന്നും അതിന്റെ ലോണ്‍ തിരിച്ചടയ്ക്കാന്‍ ഈ സമ്മാനത്തുക സഹായകരമാകുമെന്നും ലിയോ പറഞ്ഞു.