ഇന്ത്യയിലേക്കുള്ള സര്വീസുകളില് കുട്ടികള്ക്കുള്ള ആനുകൂല്യം ഇത്തിഹാദ് നിര്ത്തലാക്കി
യു.എ.ഇയുടെ ദേശീയ വിമാന കമ്പനിയായ ഇത്തിഹാദ് എയര്വേസ് ഇന്ത്യയിലേക്ക് നടത്തുന്ന സര്വീസുകളില് കുട്ടികള്ക്ക് നല്കിയിരുന്ന ആനുകൂല്യം നിര്ത്തലാക്കി. ജൂണ് 16 മുതലാണ് കുട്ടികള്ക്കും മുഴുവന് നിരക്കും നല്കണമെന്ന വ്യവസ്ഥ നിലവില് വന്നത്. അതേസമയം, രണ്ട് വയസ്സ് വരെയുള്ള കുട്ടികള്ക്കുള്ള ആനുകൂല്യങ്ങള് തുടരും. ഇവര്ക്ക് യാത്രാ നിരക്കിന്െറ പത്ത് ശതമാനം നല്കിയാല് മതിയാകും. എന്നാല്, സീറ്റ് ആവശ്യമുള്ള രണ്ട് വയസ്സ് വരെയുള്ള കുട്ടികള്ക്ക് മുഴുവന് തുകയും നല്കേണ്ടി വരും.
ഇന്ത്യയിലേക്കുള്ള സര്വീസുകളില് കുട്ടികള്ക്കുള്ള ആനുകൂല്യങ്ങള് നിര്ത്തലാക്കിയെന്ന് കാണിച്ച് വിവിധ ട്രാവല് ഏജന്സികള്ക്ക് ഇത്തിഹാദ് എയര്വേസില് നിന്ന് വിവരം ലഭിച്ചിട്ടുണ്ട്. ജൂണ് 16 മുതല് എടുക്കുന്ന ടിക്കറ്റുകള്ക്ക് മുഴുവന് നിരക്കും ഈടാക്കാനാണ് നിര്ദേശിച്ചിരിക്കുന്നത്. അതേസമയം, മുന്കൂര് ടിക്കറ്റ് എടുത്തവര്ക്ക് പുതിയ തീരുമാനം ബാധകമല്ല എന്നാണ് അറിയുന്നത്. രണ്ട് മുതല് 11 വയസ്സ് വരെയുള്ള കുട്ടികള്ക്ക് ടിക്കറ്റ് നിരക്കില് 25 ശതമാനം ഇളവാണ് ഇത്തിഹാദ് നല്കിയിരുന്നത്. മധ്യവേനല് അവധി തുടങ്ങുന്നതിന് തൊട്ടുമുമ്പ് നിലവില് വന്ന തീരുമാനം മലയാളികള് അടക്കം പ്രവാസി ഇന്ത്യന് കുടുംബങ്ങളെ ബുദ്ധിമുട്ടിലാക്കിയിരിക്കുകയാണ്. പ്രവാസികള് കുടുംബത്തോടൊപ്പം നാട്ടില് പോകുന്ന സീസണിന് മുമ്പായി പുതിയ തീരുമാനം വന്നതാണ് ഇരുട്ടടിയായത്. രണ്ട് കുട്ടികളുമായി നാട്ടില് പോകുന്ന കുടുംബങ്ങളുടെ ബജറ്റ് താളം തെറ്റിക്കുന്നതാണ് പുതിയ തീരുമാനം.
അവധിക്കാലം മുന്നില് കണ്ട് വിമാന കമ്പനികള് ടിക്കറ്റ് നിരക്കുകളില് വന് വര്ധന വരുത്തിയതിന് പിന്നാലെയാണ് യു.എ.യില് നിന്ന് ഇന്ത്യയിലേക്ക് ഏറ്റവും കൂടുതല് സര്വീസുകള് നടത്തുന്ന കമ്പനികളിലൊന്നായ ഇത്തിഹാദ് കുട്ടികളുടെ ആനുകൂല്യങ്ങളും നിര്ത്തിയത്. ഇത്തിഹാദിന്റെ നടപടി മറ്റു കമ്പനികളും പിന്തുടര്ന്നാല് പ്രവാസികളുടെ അവധിക്കാലയാത്രയെ ബാധിക്കും.
https://www.facebook.com/Malayalivartha