അമേയ സന്തോഷെന്ന 15 വയസുകാരനെ ഷാർജയിൽ നിന്നും കാണാതായി എന്ന വാർത്തയാണ് പുറത്ത് വരുന്നത് . പരീക്ഷാപേടിയാണ് വിദ്യാർത്ഥിയെ കാണാതായതിന് പിന്നിലെന്ന് പുറത്ത് വരുന്ന റിപോർട്ടുകൾ സൂചിപ്പിക്കുന്നു. അത്തരത്തിലാണ് മാതാപിതാക്കൾ പൊലീസിനോട് പരാതിപ്പെട്ടതും . വെള്ളിയാഴ്ച മുതലാണ് വിദ്യാർത്ഥിയെ കാണാതാവുന്നത്. അബു ഷഗാറയിൽ താമസിക്കുന്ന തൃശൂർ സ്വദേശി സന്തോഷ് രാജൻ–ബിന്ദു സന്തോഷ് ദമ്പതികളുടെ മകനാണ് അമേയ സന്തോഷ്.

ഷാർജ ഡിപിഎസ് പത്താം ക്ലാസ് വിദ്യാർഥിയായ അമേയ ഇതുവരെ മാതാപിതാക്കളെയോ കൂട്ടുകാരെയോ അധ്യാപകരെയോ ബന്ധപ്പെട്ടിട്ടില്ല. വെള്ളിയാഴ്ച രാവിലെ 10.15ന് മകനെ ട്യൂഷൻ സെന്ററിനടുത്ത് ഇറക്കിവിട്ടതാണ്. എന്നാൽ, കുട്ടി ട്യൂഷൻ സെന്ററിൽ പ്രവേശിക്കുന്നതായി സിസിടിവി ദൃശ്യങ്ങളിൽ പതിഞ്ഞിട്ടില്ല. അമേയ ക്ലാസിലെത്തിയില്ലെന്ന് അധ്യാപകനും പറഞ്ഞു. ഇതിനു ശേഷം കുട്ടിക്കായി വ്യാപാകമായി തിരച്ചിൽ നടത്തിവരികയാണെന്ന് പിതാവ് സന്തോഷ് രാജൻ പറഞ്ഞു. അമേയയുടെ കൈയിൽ മൊബൈൽ ഫോൺ ഉണ്ടെങ്കിലും സ്വിച്ച്ഡ് ഓഫാണ്.

പച്ച ടി–ഷേർട്ടും നീല ത്രി–ഫോർത് പാന്റസുമാണ് കാണാതാകുമ്പോൾ അമേയ സന്തോഷ് ധരിച്ചിരുന്നത്. കറുത്ത ബാക്ക് പാക്ക് ബാഗുമുണ്ടായിരുന്നു. കൈയിൽ കറുത്ത ചരടു കെട്ടിയിട്ടുണ്ട്. 10 ദിർഹത്തിലധികം മകന്റെ കൈയിലുണ്ടാകാൻ സാധ്യതയില്ലെന്നു മാതാവ് ബിന്ദു പറയുന്നു. അടുത്തു വരുന്ന സിബിഎസ്ഇ പൊതു പരീക്ഷ സംബന്ധിച്ച് മകന് നേരിയ ഭയവും സമ്മർദവുമുണ്ടായിരുന്നതായി ബന്ധുക്കൾ പറഞ്ഞു. ഇന്ന് (ഞായർ) ആണ് സയൻസ് പരീക്ഷ. ഈ വിഷയം നന്നായി പഠിക്കാനാകാത്തതിലും വലിയ പ്രയാസത്തിലായിരുന്നു. അമേയയുടെ കുടുംബം പൂനെയിലാണ് സ്ഥിര താമസം.

അമേയയെക്കുറിച്ച് എന്തെങ്കിലും വിവരം ലഭിക്കുന്നവർ അടുത്തുള്ള പൊലീസ് സ്റ്റേഷനിൽ വിവരം അറിയിക്കുക. അമേയയെ കണ്ടെത്തി എന്ന രീതിയിൽ സമൂഹമാധ്യമങ്ങളില്‍ വ്യാജ പ്രചാരണം നടത്തുന്നതായി ബന്ധുക്കൾ പരാതിപ്പെട്ടു. കുട്ടിയെ കണ്ടെത്തിയിട്ടില്ലെന്നും വ്യാജ പ്രചാരണം നിർത്തി അന്വേഷണത്തിൽ സഹകരിക്കണമെന്നു ബന്ധുക്കൾ അഭ്യർഥിച്ചു. ഫോൺ: 050 584 3889 (സന്തോഷ് രാജൻ)