വാഹനാപകടകേസില്‍ പ്രതിക്ക് ജാമ്യം നിന്നയാള്‍ കുടുങ്ങി... പ്രതി നാട്ടിലേക്ക് രക്ഷപ്പെട്ടതിനാല്‍ ജാമ്യംനിന്നയാള്‍ അരലക്ഷം റിയാല്‍ നല്‍കണം
ദമ്മാമില്‍ വാഹനാപകട കേസില്‍ അരലക്ഷത്തോളം റിയാല്‍ നഷ്ടപരിഹാരം നല്‍കേണ്ട പ്രതി അനധികൃത മാര്‍ഗത്തില്‍ നാട്ടിലേക്ക് രക്ഷപ്പെട്ടതായി പരാതി. ഇതോടെ, ഇയാളെ ജയിലില്‍നിന്നിറക്കാന്‍ ജാമ്യംനിന്ന സാമൂഹിക പ്രവര്‍ത്തകന്‍ കുടുങ്ങി. ഇദ്ദേഹത്തില്‍നിന്ന് പണം ഈടാക്കുന്നതിനുള്ള നിയമ നടപടികളിലേക്ക് കടക്കുകയാണ് രക്ഷപ്പെട്ട പ്രതിയുടെ സ്‌പോണ്‍സറും കോടതിയും. ദമ്മാമില്‍ ട്രെയിലര്‍ ഡ്രൈവറായി ജോലിചെയ്തിരുന്ന ബിഹാര്‍ സ്വദേശി ചുനിലാല്‍ ആണ് നാട്ടിലേക്ക് രക്ഷപ്പെട്ടത്. ഇയാളെ ജയിലില്‍നിന്നിറക്കാന്‍ ജാമ്യംനിന്ന സാമൂഹിക പ്രവര്‍ത്തകന്‍ നാസ് വക്കത്തിനാണ് അരലക്ഷത്തോളം റിയാലിന്റെ ബാധ്യത ഏറ്റെടുക്കേണ്ടിവന്നിരിക്കുന്നത്. ഒരുവര്‍ഷം മുമ്ബാണ് ചുനിലാല്‍ ഓടിച്ചിരുന്ന ട്രെയിലര്‍ കാറുമായി കൂട്ടിയിടിച്ച് അപകടമുണ്ടായത്. ആര്‍ക്കും ഗുരുതര പരിക്കുകളുണ്ടായില്ലെങ്കിലും അപകടത്തില്‍ കാറ് പൂര്‍ണമായി തകര്‍ന്നു.
അപകടസമയത്ത് ചുനിലാല്‍ മദ്യപിച്ചിരുന്നതായി അന്വേഷണത്തില്‍ കണ്ടെത്തി. ഇതോടെ, ഇയാള്‍ ജയിലിലുമായി. ഇത്തരം കേസുകളില്‍ ഇവരെ ജാമ്യത്തില്‍ പുറത്തിറക്കാന്‍ ആരുമില്ലെങ്കില്‍ കേസ് തീരുന്നതുവരെ ജയിലില്‍ തടവില്‍ പാര്‍പ്പിക്കുകയാണ് പതിവ്.ഡീപോര്‍ട്ടേഷന്‍ കേന്ദ്രം സന്ദര്‍ശന വേളയില്‍ ചുനിലാല്‍ നാസ് വക്കത്തിനോട് തന്റെ അവസ്ഥ വിവരിക്കുകയും സഹായം ആവശ്യപ്പെടുകയുമായിരുന്നു. പുറത്തിറങ്ങിയാല്‍ ബന്ധുക്കളുടെ സഹായത്തോടെ കേസിന്റെ വിധി വരുന്നതിനനുസരിച്ച് നഷ്ടപരിഹാരം കണ്ടെത്താന്‍ സാധിക്കുമെന്നായിരുന്നു ഇയാള്‍ പറഞ്ഞിരുന്നത്.ഇത് വിശ്വസിച്ച് ഇയാളെ നാസ് വക്കം സ്വന്തം ജാമ്യത്തില്‍ പുറത്തിറക്കി, കേസിന്റെ വിധി വരുന്നതുവരെ ബന്ധുക്കളോടൊപ്പം പോകാന്‍ അനുവദിക്കുകയായിരുന്നു.മാസങ്ങള്‍ കഴിഞ്ഞ് 46,000 റിയാല്‍ നഷ്ട പരിഹാരം നല്‍കാന്‍ ചുനിലാലിനെതിരെ വിധി വന്നു. കോടതി ഇയാള്‍ക്കെതിരെ യാത്രാനിരോധനവും ഏര്‍പ്പെടുത്തിയിരുന്നു.മാസങ്ങള്‍ കഴിഞ്ഞതിനാല്‍ നാസ് വക്കവും ചുനിലാലിന്റെ കാര്യം മറന്നു. പ്രതിയെ നാട്ടിലേക്ക് രക്ഷപ്പെടാന്‍ സഹായിച്ചുവെന്ന് ഇയാളുടെ സ്‌പോണ്‍സര്‍ കേസ് നല്‍കുമേ്ബാഴാണ് ചുനിലാല്‍ രക്ഷപ്പെട്ട വിവരവും താന്‍ കെണിയിലായ വിവരവും അറിയുന്നത് എന്ന് നാസ് വക്കം പറഞ്ഞു.
അനധികൃത മാര്‍ഗത്തിലൂടെ നാട്ടിലെത്തിയ ചുനിലാല്‍ തന്റെ പുതിയ ഇന്ത്യന്‍ പാസ്‌പോര്‍ട്ട് ഉയര്‍ത്തിപ്പിടിച്ച് വിഡിയോ കാളില്‍ സ്‌പോണ്‍സറെ വിളിച്ച് പരിഹസിക്കുകയായിരുന്നു. ഇതോടെ, സ്‌പോണ്‍സര്‍ രോഷാകുലനായി ഡീപോര്‍ട്ടേഷന്‍ സന്റെറില്‍ എത്തിയപ്പോഴാണ് നാസ് വക്കമാണ് ഇയാളെ ജാമ്യത്തില്‍ പുറത്തിറക്കിയതെന്നറിഞ്ഞത്.ഇതേതുടര്‍ന്നാണ് ഇയാള്‍ നാസിനെതിരെ കേസ് നല്‍കിയത്. ദീര്‍ഘകാലം നീണ്ടുപോകുന്ന കേസുകളില്‍ ഇത്രയും കാലം തടവില്‍ കിടക്കാതിരിക്കാന്‍ മാനുഷിക പരിഗണന നല്‍കി താന്‍ ചെയ്ത സഹായമാണ് ഇപ്പോള്‍ തനിക്കെതിരെ വിനയായി വന്നിരിക്കുന്നതെന്ന് നാസ് വക്കം 'ഗള്‍ഫ് മാധ്യമ'ത്തോട് പറഞ്ഞു.നിരപരാധിത്വം ഡീപോര്‍ട്ടേഷന്‍ അധികാരികള്‍ക്ക് ബോധ്യമുള്ളതാണ്. ഇയാളെ നാട്ടിലെത്താന്‍ സഹായിച്ചതാരാണെന്ന അന്വേഷണം നടക്കണം. മൂന്നു പതിറ്റാണ്ടിലേറെയായി സാമൂഹിക പ്രവര്‍ത്തനം നടത്തുന്ന താന്‍ ആദ്യമായാണ് ഇത്തരമൊരു കെണിയില്‍ പെടുന്നതെന്നും നാസ് വക്കം പറഞ്ഞു.
https://www.facebook.com/Malayalivartha
