കുവൈറ്റില് കോവിഡ് രൂക്ഷമാകുന്നു... 24 മണിക്കൂറിനുള്ളില് 1,048 പുതിയ കൊറോണ വൈറസ് കേസുകള്
കുവൈത്തില് 24 മണിക്കൂറിനുള്ളില് 1,048 പുതിയ കൊറോണ വൈറസ് കേസുകള് കൂടി റിപ്പോര്ട്ട് ചെയ്തതായി ആരോഗ്യ മന്ത്രാലയം അറിയിച്ചു. ഇതോടെ കുവൈറ്റത്തില് കൊറോണ വൈറസ് ബാധിച്ചവരുടെ എണ്ണം 14,850 ആയി. കൊറോണ വൈറസ് ബാധയെ തുടര്ന്ന് അഞ്ച് പേര് കൂടി ഞായറാഴ്ച കുവൈത്തില് മരിച്ചു. ഇതോടെ മരണമടഞ്ഞവരുടെ ആകെ എണ്ണം 112 ആയി. ഞായറാഴ്ച രോഗബാധ സ്ഥിരീകരിച്ച കേസുകളില് 242 ഇന്ത്യക്കാരും, 242 സ്വദേശികളും, 53 ബംഗ്ലാദേശികളും, 238 ഈജിപ്ഷ്യന്സും ബാക്കിയുള്ളത് മറ്റു രാജ്യക്കാരുമാണ്. ക്യാപിറ്റല് ഗവര്ണറേറ്റില് 142 ഫര്വാനിയ ഗവര്ണറേറ്റില് 319 ഹവല്ലി ഗവര്ണറേറ്റില് 288 അഹമ്മദി ഗവര്ണറേറ്റില് 196 ജഹ്റ ഗവര്ണറേറ്റില് 103 കേസുകളുമാണ് ഞായറാഴ്ച റിപ്പോര്ട്ട് ചെയ്തത്. ഞായറാഴ്ച 250 പേരാണു രോഗ മുക്തി നേടിയത്. ഇതോടെ ആകെ രോഗം സുഖമായവരുടെ എണ്ണം 4,093 ആയി. ആകെ 10,645 പേരാണു ഇപ്പോള് ചികിത്സയില് കഴിയുന്നത്. ഇവരില് 168 പേര് തീവ്രപരിചരണ വിഭാഗത്തില് കഴിയുന്നവരാണെന്നും ആരോഗ്യ മന്ത്രാലയം വക്താവ് അബ്ദുള്ള അല് സനദ് വാര്ത്താസമ്മേളനത്തില് അറിയിച്ചു.
കുവൈത്തില് കോവിഡ് ബാധിച്ച് ചികിത്സയിലായിരുന്ന പാലക്കാട് സ്വദേശിയും മരിച്ചു. കൊല്ലങ്കോട് ശ്രീജയില് വിജയ ഗോപാല് (65) ആണ് മരിച്ചത്. മുബാറക് അല് കബീര് ആശുപത്രിയില് വച്ചാണ് അന്ത്യം. ശ്വാസതടസത്തെ തുടര്ന്ന് രണ്ടു ദിവസം മുമ്ബ് ചികില്സ തേടിയെത്തിയ ഇദ്ദേഹത്തിനു തുടര് പരിശോധനയില് കൊറോണ വൈറസ് ബാധ കണ്ടെത്തുകയായിരുന്നു. കുവൈത്ത് മെറ്റല് പൈപ്പ് ഇന്ഡസ്ട്രീസ് കമ്ബനിയില് ക്വാളിറ്റി കണ്ട്രോളറായിരുന്നു. ഇദ്ദേഹം 40 വര്ഷത്തോളമായി കുവൈത്തില് പ്രവാസ ജീവിതം നയിച്ചുവരികയായിരുന്നു. സാല്മിയയില് കുടുംബത്തോടൊപ്പമായിരുന്നു താമസം. മൃതദേഹം കോവിഡ് പ്രോട്ടോകോള് പ്രകാരം കുവൈത്തില് സംസ്കരിക്കും.
https://www.facebook.com/Malayalivartha