വീട്ടില്‍ നിന്നും സാധനങ്ങള്‍ മോഷ്ടിക്കുക, കാര്‍ മോഷ്ടിക്കുക എന്നതു സാധാരണ സംഭവമാണ്. എന്നാല്‍ വീട് മുഴുവനായി മോഷ്ടിക്കുക എന്നതു കേട്ടു കേള്‍വി പോലും ഇല്ലാത്തതാണ്. എന്നാല്‍ ഇന്നു മുതല്‍ വീട് മോഷണം പോകുക എന്നതും അവിശ്വസനീയമല്ലാതായിരിക്കുന്നു.

ദീര്‍ഘകാലത്തെ സ്വന്തം അധ്വാനം കൊണ്ട് വളരെ പണിപ്പെട്ടാണ് മെഗന്‍ പാനു ,ബെന്റന്‍ പാര്‍ക്ക് മിഷിഗണ്‍ അവന്യുവില്‍ തന്റെ സ്വപ്ന സൗധം പണിതുയര്‍ത്തിയത്. രണ്ടു വര്‍ഷമായിരുന്നു വീടു പടുത്തുയര്‍ത്തുവാന്‍ വേണ്ടി വന്നതെന്നു മെഗന്‍ പറയുന്നു.ട്രെയ്‌ലര്‍ ലോക്ക് ഉപയോഗിച്ചു വളരെ സുരക്ഷിതമായാണ് വീട് സ്ഥാപിച്ചിരുന്നതെന്നും ഇവര്‍ പറഞ്ഞു.

കഴിഞ്ഞ ശനിയാഴ്ച മുതല്‍ വീട് കാണാതായി. വീട് സ്ഥാപിച്ചിരുന്ന സ്ഥലത്തു നിന്നും മറ്റൊരു സ്ഥാനത്തേക്ക് മാറ്റാനുള്ള പദ്ധതിയുടെ ഭാഗമായി മേഗന്‍ വീട്ടിലില്ലാതിരുന്നപ്പോഴാണ് വീട് മോഷണം പോയത്.

സൗത്ത് സെന്റ് ലൂയിസില്‍ നിന്നും മോഷ്ടിച്ച വീട് ഡിസംബര്‍ 18 ബുധനാഴ്ച ഹൗസ് സ്പ്രിംഗില്‍ നിന്നാണു കണ്ടെത്തിയതെന്ന് കൗണ്ടി ഷെറിഫ് ഡേവ് മാര്‍ ഫക്ക് പറഞ്ഞു.മുന്‍പ് ഉണ്ടായിരുന്ന സ്ഥാനത്തേക്ക് വീട് സൗജന്യമായി ടൊ ചെയ്തു കൊണ്ടു വരാമെന്നു ഹില്‍സ് ബറൊയിലെ ഒരു ടോയിംഗ് കമ്പനി സമ്മതിച്ചിട്ടുണ്ട്. ഇതു മെഗനുള്ള ഞങ്ങളുടെ ക്രിസ്മസ് സമ്മാനമാണെന്നാണ് കമ്പനി വക്താവ് അറിയിച്ചത്. വീട് ഇന്‍ഷ്വര്‍ ചെയ്യുന്നതിനുള്ള പണം ഒന്നും കൈവശം ഇല്ലായെങ്കിലും ലോക്ക് ചെയ്തിട്ടിരുന്നു എന്നാണ് ഉടമസ്ഥ പറഞ്ഞത്.