പ്രധാനാധ്യാപിക ഉള്‍പ്പെടെ എട്ട് അധ്യാപകരും വനിതകള്‍. പിന്നെയുള്ളത് ഏക അനധ്യാപക ജീവനക്കാരി. ഇതുകൊണ്ടുമാത്രം തീരുന്നില്ല ഉപ്പുതോട് ഗവ. യു.പി സ്‌കൂളിന്റെ പ്രത്യേകതകള്‍. ആറു വര്‍ഷമായി വനിതകള്‍ മാത്രമുള്ള സര്‍ക്കാര്‍ വിദ്യാലയമെന്ന ബഹുമതി ഈ വനിതാദിനത്തിലും ഉപ്പുതോട് ഗവ. യു.പി സ്‌കൂളിന് സ്വന്തം. 

1973-ല്‍ പ്രവര്‍ത്തനം ആരംഭിച്ച മലയോര കര്‍ഷകരുടെ ഈ വിദ്യാലയത്തില്‍ 15 വര്‍ഷമായി പ്രധാനാധ്യാപികയും വനിത തന്നെ. വനിതാവര്‍ഷത്തില്‍ ഈ സ്‌കൂളിനെ തേടി സര്‍ക്കാര്‍ സമ്മാനമായി ഒരു കോടി. കഴിഞ്ഞ 12 വര്‍ഷത്തിനിടെ രണ്ടുവര്‍ഷം മാത്രമാണ് പുരുഷന്മാര്‍ ഇവിടെ അധ്യാപകരായി ജോലി ചെയ്തിട്ടുള്ളത്. വനിതാഅധ്യാപകര്‍ എല്ലാവരും വിവാഹിതരും അമ്മമാരുമാണ്.ഇവരുടെ കുട്ടികള്‍ ഈ സ്‌കൂളില്‍ തന്നെ പഠിക്കുന്നുവെന്ന പ്രത്യേകതയുമുണ്ട്.

കഴിഞ്ഞ 15 വര്‍ഷമായി കുട്ടികള്‍ക്ക് അക്ഷരവെളിച്ചം പകര്‍ന്നുനല്‍കുന്ന സൗമ്യ ടീച്ചറാണ് സീനിയര്‍. ഈ നാട്ടുകാരി തന്നെയാണ് സൗമ്യ. 12 വര്‍ഷമായി ഇവിടെ ജോലി ചെയ്യുന്ന ധന്യ മോഹന്‍ തൊട്ടടുത്ത സ്ഥാനത്തുണ്ട്. സ്‌കൂളിനോട് ചേര്‍ന്ന് പ്രീ-പ്രൈമറി സ്‌കൂളും അംഗന്‍വാടിയും പ്രവര്‍ത്തിക്കുന്നു.ഇവിടെയും അംഗനമാര്‍ തന്നെ ആധിപത്യം സ്ഥാപിച്ചിരിക്കുന്നു.

പൊതുവിദ്യാലയങ്ങള്‍ മികവിന്റെ കേന്ദ്രമാക്കി മാറ്റുന്നതിന് ഇടുക്കി മണ്ഡലത്തില്‍നിന്ന് തെരഞ്ഞെടുത്തിരിക്കുന്നത് ഏക സ്‌കൂള്‍ ഇതു മാത്രമാണ്. രണ്ടുതലമുറക്ക് അക്ഷരവെളിച്ചം പകര്‍ന്ന് 45 വര്‍ഷം മുമ്പ് ഓലമേഞ്ഞ കെട്ടിടത്തില്‍ പ്രവര്‍ത്തനം ആരംഭിച്ച സ്‌കൂള്‍ ഇപ്പോള്‍ ഹൈടെക് നിലവാരത്തിലെത്തി നില്‍ക്കുന്നു.

ഒന്നാം ക്ലാസ് മുതല്‍ ഐ.എ.എസ് പരിശീലനം, എല്‍.എസ്.എസ്, യു.എസ്.എസ് പ്രത്യേക പരിശീലനം, മികച്ച ജൈവവൈവിധ്യ ഉദ്യാനം, ഐ.ടി അധിഷ്ഠിത വിദ്യാഭ്യാസം, അത്യാധുനിക ഉപകരണങ്ങള്‍ സജ്ജീകരിച്ച സയന്‍സ് ലാബ് എന്നിവ മരിയാപുരം പഞ്ചായത്തിലെ ഈ സ്‌കൂളിന്റെ പ്രത്യേകതകളാണ്.