'ദ് വൈകിങ് സ്‌കൈ' എന്ന ആഡംബരക്കപ്പലില്‍നിന്നു ചില യാത്രക്കാര്‍ സമൂഹമാധ്യമങ്ങളില്‍ പങ്കുവച്ച വിഡിയോ ദൃശ്യങ്ങള്‍ ലോകം ശ്വാസമടക്കി കണ്ട ടൈറ്റാനിക്ക് സിനിമയുടെ രംഗങ്ങള്‍ക്കു സമാനമായിരുന്നു. ഉലയുന്ന കപ്പലിനുള്ളില്‍ നിരങ്ങി നീങ്ങുന്ന ഫര്‍ണിച്ചറുകള്‍, ലൈഫ് ജാക്കറ്റുകള്‍ ധരിച്ച് രക്ഷാപ്രവര്‍ത്തകരെ കാത്ത് ഭീതിയോടെയിരിക്കുന്ന യാത്രക്കാര്‍...

നോര്‍വേയിലെ ട്രോംസോയില്‍നിന്നു സ്റ്റാവഞ്ചറിലേക്കു 4 ദിവസത്തെ യാത്രയായിരുന്നു കപ്പലിനുണ്ടായിരുന്നത്. 21-ന് പ്രാദേശിക സമയം രാത്രി 10.30-ന് തുടങ്ങി. 24-ന് ഉച്ചയ്ക്ക് ഒരുമണിക്കു ലക്ഷ്യസ്ഥാനത്ത് എത്തേണ്ടതായിരുന്നു. നോര്‍വേയുടെ തീരംപറ്റിയായിരുന്നു കപ്പലിന്റെ സഞ്ചാരം. മൂന്നാം ദിനം, ശനിയാഴ്ച ഉച്ചയ്ക്ക് ഹസ്റ്റാഡ്വിക മേഖലയിലേക്കു പ്രവേശിച്ചതോടെയാണ് അപകടമുണ്ടായത്.

കപ്പലിന്റെ 4 എന്‍ജിനുകളുടെയും പ്രവര്‍ത്തനം ഒന്നിച്ചു നിലച്ചു. കടല്‍ ക്ഷോഭിച്ച അവസ്ഥയിലായിരുന്നു. ഈ സമയത്ത് കപ്പലിന്റെ പ്രവര്‍ത്തനം നിലച്ചതു പ്രതിസന്ധി ഇരട്ടിയാക്കി. ഉയര്‍ന്ന തിരകളിലും കാറ്റിലും കപ്പല്‍ നിയന്ത്രണം നഷ്ടപ്പെട്ട് ഒഴുകിനടക്കാന്‍ തുടങ്ങി. അപകടകരമായ കപ്പല്‍ച്ചാലായി അറിയപ്പെടുന്ന ഈ മേഖലയില്‍, എവിടെയെങ്കിലും ഇടിച്ചു കപ്പല്‍ തകരാന്‍ സാധ്യതയുണ്ടായിരുന്നു. ആടിയുലഞ്ഞ കപ്പലില്‍ വീണും, അടര്‍ന്നു വീണ ഭാഗങ്ങള്‍ ദേഹത്തു പതിച്ചും 17 പേര്‍ക്ക് പരുക്കേല്‍ക്കുകയും ചെയ്തു. ജീവനക്കാരുടെ പരിശ്രമങ്ങളെല്ലാം പാഴായതോടെ ഉച്ചയ്ക്ക് 2 മണിക്ക് കപ്പലിന്റെ ക്യാപ്റ്റന്‍ കരയിലേക്ക് അപകട സന്ദേശം അയച്ചു.

അപകട സന്ദേശം ലഭിച്ചയുടനെ 5 ഹെലികോപ്റ്ററുകളും ഒട്ടേറെ രക്ഷായാനങ്ങളും രംഗത്തെത്തി. എന്നാല്‍ ഹെലികോപ്റ്ററില്‍ ഒരു സമയം പരമാവധി 20 പേരെ മാത്രമേ ഉള്‍ക്കൊള്ളാനാകൂ എന്നതിനാല്‍ രക്ഷാപ്രവര്‍ത്തനം വൈകി.. അഞ്ഞൂറോളം ആളുകളെ ഇങ്ങനെ മാറ്റിയപ്പോഴേയ്ക്കും ഒരുരാത്രി ഇരുട്ടി വെളുത്തു. രാവിലെ കപ്പലിന്റെ 3 എന്‍ജിനുകള്‍ ഭാഗികമായി പ്രവര്‍ത്തിച്ചു തുടങ്ങി. കടലില്‍ വന്‍തിരയും കാറ്റും ശമിച്ചു. ഇതോടെ ടഗ് ബോട്ടുകള്‍ ഉപയോഗിച്ച് കപ്പല്‍ കെട്ടിവലിച്ചു തീരത്തടുപ്പിക്കാമെന്ന നിലയിലായി. ഇപ്പോള്‍ മണിക്കൂറില്‍ 13 കിലോമീറ്റര്‍ മാത്രം വേഗത്തിലാണു കപ്പല്‍ തീരത്തേക്ക് നീങ്ങുന്നത്. അടുത്ത തുറമുഖമായ മോള്‍ഡെയിലേക്ക് അപകട സ്ഥലത്തുനിന്ന് 80 കിലോമീറ്റര്‍ ദൂരമുണ്ട്.

ഇരുപതിലേറെ ബസുകളുടെ നീളമുള്ള ബഹുനില ആഡംബരക്കപ്പലാണ് ദ് വൈകിങ് സ്‌കൈ. 227 മീറ്റര്‍ നീളവും 29 മീറ്റര്‍ വീതിയുമുണ്ട്. അതിഥികള്‍ക്കും ജീവനക്കാര്‍ക്കുമായി 465 മുറികളാണ് കപ്പലിലുള്ളത്. 8 ഭക്ഷണശാലകള്‍, സ്പാ, യോഗാ കേന്ദ്രം, ജിമ്മുകള്‍, നീന്തല്‍ക്കുളങ്ങള്‍ തുടങ്ങിയവയും കപ്പലിനുള്ളിലുണ്ട്.