പതിനെട്ട് മാസം മാത്രം പ്രായമുള്ള തന്റെ മകന്‍ ഉറങ്ങിയോ എന്ന് നോക്കാന്‍ പോയ അമ്മ കണ്ടത് ഞെട്ടിക്കുന്ന ദൃശ്യം. 

കുഞ്ഞിനോട് ചേര്‍ന്ന് മറ്റൊരു കുഞ്ഞിന്റെ പ്രേത സമാനമായ രൂപം.

അമേരിക്കയിലെ ഇല്ലിനോയിസ് സ്വദേശിയായ മരിറ്റ്‌സ സിബുല്‍സ് എന്ന 32-കാരി തന്റെ അനുഭവം പങ്കുവച്ചിരിക്കുന്നതിങ്ങനെ: കഴിഞ്ഞ രാത്രി, എന്റെ മകനൊപ്പം ഒരു പ്രേത സമാനമായ ഒരു കുഞ്ഞിനെ കണ്ട ഞാന്‍ ഞെട്ടി. എന്റെ ഉറക്കം നഷ്ടപ്പെട്ടു. മകന്‍ ഉറങ്ങിക്കിടക്കുമ്പോള്‍, ഒരു ഫ്‌ലാഷ് ലൈറ്റിന്റെ സഹായത്തോടെ പതുങ്ങി ചെന്നു നോക്കാന്‍ പോലും ശ്രമിച്ചു.

'ഇത് ഒരു തോന്നല്‍ ആയിരിക്കുമെന്നാണ് ആദ്യം കരുതിയത്. തുടക്കത്തില്‍ ഇത് അവഗണിച്ചു.എന്നാല്‍ ആ ചിത്രം തന്റെ മനസ്സിനെ വിടാതെ പിടികൂടി. എങ്കിലും ഇതിന്റെ പിന്നില്‍ ഒരു യുക്തി ഉണ്ടെന്ന് മനസ്സിനെ പഠിപ്പിക്കാനാണ് പിന്നീട് ശ്രമിച്ചത്'.

ഫെയ്സ്ബുക്കില്‍ മരിറ്റ്സ ചിത്രം പങ്കുവെച്ചത് വെളളിയാഴ്ചയാണ്. ദിവസങ്ങള്‍ക്കകം 2.9 ലക്ഷം ഷെയറാണ് ചിത്രത്തിന് ലഭിച്ചത്. അഞ്ചുലക്ഷം പേര്‍ ചിത്രത്തില്‍ പ്രതികരിച്ചു.

അടുത്ത ദിവസം ഇതിന്റെ ദൂരൂഹത മാറിയതായും മരിറ്റ്സ ഫെയ്സ്ബുക്കിലൂടെ തന്നെ വെളിപ്പെടുത്തി. 

നേരത്തേ വിരിച്ചിരുന്ന ഷീറ്റ് മാറ്റിയെങ്കിലും, വേറെ ഷീറ്റ് വിരിക്കാതെ മരിറ്റ്സയുടെ ഭര്‍ത്താവ് മാട്രസ്സിനു മുകളില്‍ കുട്ടിയെ വെറുതെ കിടത്തുകയായിരുന്നു.

കിടക്കയിലെ ഒരു ഡിസൈനാണ് പ്രേതസമാനമായ രൂപത്തെ സങ്കല്‍പ്പിക്കാന്‍ ഇടയാക്കിയതെന്ന് മരിറ്റ്സ പറയുന്നു.