മലപ്പുറം എറിയാട് കാപ്പില്‍ സിദ്ദീഖലിയുടെയും സറീനയുടെയും മകനായ പുഴക്കാട്ടിരി ഗവ.ഐടിഐ ഇലക്ട്രോണിക്‌സ് വിദ്യാര്‍ഥിയായ മുഹമ്മദ് റസ്സല്‍ (21) വരച്ച ഒരു ചിത്രം സമൂഹമാധ്യമത്തില്‍ തരംഗമാവുകയാണ്. മുഹമ്മദ് റസ്സല്‍ വരച്ചത് ഒരു ചിത്രം എന്നു പറഞ്ഞാല്‍ പോരാ, ഒന്നൊന്നര ചിത്രം എന്നു തന്നെ പറയണം.

ഇടതു കൈകൊണ്ട് ടൊവിനൊ തോമസ്, വലതു കൈകൊണ്ടു ജയസൂര്യ, വായ കൊണ്ട് പൃഥ്വിരാജ്... ഇങ്ങനെ ഒരേ സമയം മൂന്നു നടന്മാരെ വരച്ചിട്ട മുഹമ്മദ് റസ്സലിന്റെ അടുത്ത ലക്ഷ്യംകൂടി കേട്ടോളൂ, രണ്ടു കൈകൊണ്ടും രണ്ടു കാലുകൊണ്ടും ഒരേസമയം 4 പേരുടെ ചിത്രം വരയ്ക്കണം.

ചിത്രങ്ങള്‍ സമൂഹമാധ്യമത്തില്‍ പോസ്റ്റ് ചെയ്യാന്‍ നിര്‍ബന്ധിച്ചത് സുഹൃത്തുക്കളാണ്. വിഡിയോ കണ്ട ടൊവിനൊ തോമസ് അടക്കം ഒട്ടേറെ പേര്‍ ഷെയര്‍ ചെയ്തു. ബാപ്പയും സഹോദരിമാരായ റീഷയും റിയയും റിഷ്മയും വരയ്ക്കും. ബാപ്പയാണു ചിത്ര രചനയില്‍ ഗുരു. വെളുത്ത പേപ്പറില്‍ കറുത്ത മാര്‍ക്കര്‍ ഉപയോഗിച്ചാണു വര. ഓരോ ചിത്രവും പലതവണ വരച്ചു പരിശീലിച്ച ശേഷമാണ് ഒരുമിച്ചു വരയ്ക്കുന്നത്.