ആനക്കയം സ്വദേശി സാഗറിന്റെ വീട്ടിലെ റൂണി എന്നു പേരുള്ള ഒരു വയസ്സുകാരി തത്തയെ ഒരു നാടുമുഴുവന്‍ അന്വേഷിച്ചു നടക്കയായിരുന്നു.

വീട്ടുകാരുമായി ഇണങ്ങിയ തത്തയെ വിശ്രമസമയത്തൊഴികെ കൂട്ടിലടയ്ക്കാറുണ്ടായിരുന്നില്ല. എത്ര അകലേക്കു പറന്നാലും വൈകിട്ടോടെ കൃത്യമായി വീട്ടിലേക്കു തിരിച്ചെത്തും. എന്നാല്‍ കഴിഞ്ഞ നാലാം തീയതി പറന്നു പോയ റൂണി പിന്നീട് തിരിച്ചു വന്നില്ല.

പല വഴിക്ക് സാഗറും സുഹൃത്തുക്കളും അന്വേഷിച്ചെങ്കിലും നിരാശയായിരുന്നു ഫലം. ഒടുവില്‍ തത്തയെ കാണാതായ കാര്യം സൂചിപ്പിച്ച് പത്രത്തില്‍ പരസ്യം നല്‍കി.

പരസ്യം ശ്രദ്ധയില്‍പെട്ട പന്തല്ലൂര്‍ സ്വദേശിയായ ഒരാള്‍ തത്ത സ്വന്തം വീട്ടിലുണ്ടെന്ന് സാഗറിനെ വിളിച്ചറിയിച്ചു.

കാണാതായതിന് രണ്ടു ദിവസത്തിനു ശേഷമാണ് റൂണി തത്ത ഇദ്ദേഹത്തിന്റെ വീട്ടിലെത്തിയത്. ഇന്നലെ സാഗര്‍ നേരിട്ടു ചെന്ന് തത്തയെ സ്വന്തം വീട്ടിലേക്കു കൂട്ടിക്കൊണ്ടുപോന്നു.