ആലപ്പുഴയില്‍ മുതുകുളം വെട്ടത്തുമുക്ക് ഭാഗത്ത് നാലു വര്‍ഷത്തോളമായി നാട്ടുകാരുടെയും വഴിയാത്രക്കാരുടെയും തലയില്‍ റാഞ്ചുകയും കൊത്തുകയും ചെയ്തിരുന്ന പരുന്തിനെ പിടികൂടി കടപ്പുറത്തെത്തിച്ചു പറത്തി വിട്ടു.

പരുന്തിന്റെ ആക്രമണത്തില്‍ ഏറെപ്പേര്‍ക്ക് പരുക്കേറ്റിട്ടുണ്ട്. പിടികൂടാന്‍ നടത്തിയ ശ്രമങ്ങളൊക്കെ പരാജയപ്പെട്ടു. റിട്ട.കോളജ് അധ്യാപകന് കഴിഞ്ഞ ദിവസം പരുന്തിന്റെ ആക്രമണത്തില്‍ പരുക്കേറ്റിരുന്നു.

വെട്ടത്തുമുക്കിനു സമീപമുള്ള തയ്യല്‍ക്കടയില്‍ ഇന്നലെ പത്തുമണിയോടെ പരുന്ത് കയറുകയായിരുന്നു. കടയുടെ ഷട്ടര്‍ താഴ്ത്തിയ ശേഷം പരുന്തിനെ ചാക്കിലാക്കി പുറത്തെത്തിച്ചു.

തുടര്‍ന്ന് മുന്‍ പഞ്ചായത്ത് പ്രസിഡന്റ് ബി.എസ്.സുജിത്ത് ലാല്‍, കൃഷ്ണപിള്ള, കെ.വി.മണിലാല്‍, എസ്.സംജിത് എന്നിവരുടെ നേതൃത്വത്തില്‍ തോട്ടപ്പള്ളി തീരത്തെത്തിച്ചു പറത്തി വിടുകയായിരുന്നു.