പെരുവള്ളൂര്‍ കാടപ്പടിയിലെ ദാസ് ഓട്ടോ ഇലക്ട്രിക്കല്‍സ് ഉടമ കൊല്ലംചിന ചുള്ളിയാലപ്പുറം അതിപറമ്പത്ത് ലോഹിതാക്ഷന് പ്രിയപ്പെട്ട ഒരു ചങ്ങാതിയുണ്ട്; ആമറോണ്‍ കാക്ക! .

6 മാസം മുന്‍പ് തുടങ്ങിയതാണ് ഇവരുടെ സൗഹൃദം. പൊരിച്ച ഉണക്കമത്സ്യം ലോഹിതാക്ഷന്‍ കൈവെള്ളയില്‍ വച്ച് നീട്ടിയത് ഒട്ടും ഭയമില്ലാതെ ആമറോണ്‍ കൊത്തിയെടുത്തു. അന്നു തുടങ്ങിയ സൗഹൃദമാണ്. പിന്നെ വരവ് പതിവായി.

ആദ്യം ഒന്നോ, രണ്ടോ തവണ കടയില്‍ എത്തിയിരുന്ന കാക്ക ഇപ്പോള്‍ 10 തവണ വരെ എത്തുന്നുണ്ടെന്ന് ലോഹിതാക്ഷന്‍ പറയുന്നു. ഉണക്കമീന്‍, മിക്‌സ്ചര്‍, പപ്പടം തുടങ്ങിയവയാണ് ഇഷ്ട വിഭവങ്ങള്‍.

തെരുവോരം കേരള കൂട്ടായ്മയുടെ വൊളന്റിയര്‍ കൂടിയായ ലോഹിതാക്ഷന്‍ ഓട്ടോ ഇലക്ട്രിഷ്യനാണ്. ലോഹിതാക്ഷന്‍ ആമറോണ്‍ ബാറ്ററിയുടെ ഏജന്‍സി എടുത്തതില്‍ പിന്നെ ആമറോണ്‍ ദാസെന്നാണ് അറിയപ്പെടുന്നത്. കാക്കയ്ക്ക് ആമറോണ്‍ എന്ന് പേരിടാനുള്ള കാരണവും ഇതുതന്നെ.