പ്രചാരണത്തിനെത്തി മുന്നണിയേതെന്ന് വിളിച്ചറിയിക്കുന്ന തമിഴ്നാട്ടില് നിന്നുള്ള മുഖാവരണങ്ങള്‍!
ഓരോ രാഷ്ട്രീയ പാര്‍ട്ടികള്‍ക്കും വേണ്ടി അവരുടെ പാര്‍ട്ടി ചിഹ്നങ്ങള്‍ രേഖപ്പെടുത്തിയ മുഖാവരണങ്ങളുടെ തിരക്കിട്ട നിര്‍മ്മാണം നടക്കുകയാണ്. കോയമ്പത്തൂരിലാണ് മാസ്‌ക് നിര്‍മാണം തകൃതിയായി നടക്കുന്നത്. അങ്ങനെ ഇത്തവണ തിരഞ്ഞെടുപ്പ് പ്രചാരണത്തിന് തമിഴ്നാട്ടില് നിന്നുള്ള മുഖാവരണങ്ങളുമുണ്ടാകും. മൊത്ത വ്യാപാരികള്‍ക്ക് വിതരണം ചെയ്യുന്നതിനുള്ള മോഡലുകള്‍ സ്വകാര്യ ഏജന്‍സികളില്‍ എത്തിത്തുടങ്ങി.
കോഴിക്കോട് പൂവാട്ടുപറമ്പ് കല്ലേരി കുറ്റിയാലയ്ക്കല്‍ ബിനു എഡ്വേഡ് ഓര്‍ഡര്‍ നല്‍കിയത് അനുസരിച്ച് വിവിധ രാഷ്ട്രീയ പാര്‍ട്ടിക്കാരുടെ ചിഹ്നങ്ങള്‍ രേഖപ്പെടുത്തിയ മാസ്‌ക്കുകള്‍ കോയമ്പത്തൂര്‍ കമ്പനി എത്തിച്ചു തുടങ്ങി. ഇതിനൊപ്പം തൊപ്പികള്‍, ടീ ഷര്‍ട്ടുകള്‍ എന്നിവയുമുണ്ട്. സ്ഥാനാര്‍ഥി നിര്‍ണയം പൂര്‍ത്തിയായാല്‍ സ്ഥാനാര്‍ഥികളുടെ ചിത്രങ്ങള്‍ സഹിതമുള്ള മാസ്‌ക്കുകളും ഓര്‍ഡര്‍ അനുസരിച്ച് എത്തിച്ചുനല്‍കും.
ബഹു വര്‍ണങ്ങളിലുള്ള മാസ്‌ക്കുകള്‍ കോട്ടണ്‍, ബനിയന്‍ ക്ലോത്ത് എന്നിവയിലാണ് നിര്‍മിക്കുന്നത്. ഫ്‌ലെക്‌സ് ബോര്‍ഡുകളും ബാനറുകളും ഒഴിവാക്കി തുണികളിലാണ് പ്രചാരണ ബോര്‍ഡുകളും ബാനറുകളുമുണ്ടാവുക. സ്ഥാനാര്‍ഥി നിര്‍ണയം പൂര്‍ത്തിയായ ഇടങ്ങളില്‍ സമൂഹ മാധ്യമ പ്രചാരണവും തുടങ്ങിയിട്ടുണ്ട്. സ്വതന്ത്ര സ്ഥാനാര്‍ഥികള്‍ക്ക് ചിഹ്നങ്ങള്‍ അനുവദിച്ചു കിട്ടിയാല്‍ മാസ്‌ക്കുകള്‍ നല്‍കാനുള്ള സംവിധാനവും റെഡിയാണ്.
https://www.facebook.com/Malayalivartha
