എ.എന്‍.ഐ പുറത്തുവിട്ട ഒരു വീഡിയോ സമൂഹമാധ്യമങ്ങളുടെ ശ്രദ്ധനേടുന്നു. മണിപ്പൂരില്‍ നിന്നുള്ള നാലാം ക്ലാസുകാരനായ കുനാല്‍ ശ്രേഷ്ഠ എന്ന ബാലന്റെ ഫുട്‌ബോള്‍കളിയുടെ ദൃശ്യങ്ങളാണ് വീഡിയോയില്‍ ഉള്ളത്. ഒരു കാല്‍ മാത്രമുള്ള ബാലന്‍ ഊന്നുവടിയുടെ സഹായത്തോടെ കൂട്ടുകാര്‍ക്കൊപ്പം ഫുട്ബോള്‍ കളിക്കുകയാണ്.

കുനാല്‍ ജനിക്കുമ്പോള്‍ തന്നെ ഒരു കാലേ ഉണ്ടായിരുന്നുള്ളൂ. എന്നാല്‍ കൂട്ടുകാര്‍ക്കൊപ്പം നടക്കുമ്പോള്‍ ഒരു കുറവും കുനാലിന് അനുഭവപ്പെടരുതെന്ന് തനിക്ക് നിര്‍ബന്ധമുണ്ടായിരുന്നുവെന്ന് അവന്റെ അമ്മ പറയുന്നു. അവന്‍ ഒരിക്കലും തന്റെ കുറവ് തോന്നിയിട്ടുമില്ല. സൈക്കിള്‍ സവാരിയും അവന്‍ തനിയെ പഠിച്ചെടുത്തു-അമ്മ പറയുന്നു.

ഫുട്ബോള്‍ കളി തനിക്ക് വളരെ ഇഷ്ടമാണെന്ന് കുനാല്‍ പറയുന്നു. ആദ്യമൊക്കെ ബാലന്‍സ് കിട്ടാന്‍ പ്രയാസമായിരുന്നു. പേടിയുമുണ്ടായിരുന്നു. എന്നാല്‍ ഇപ്പോള്‍ തനിക്ക് നല്ല ആത്മവിശ്വാസമുണ്ട്. സുഹൃത്തുക്കള്‍ എനിക്ക് നല്ല പിന്തുണ നല്‍കുന്നു. വൈകാതെ ഒരു ഗോള്‍ ഞാന്‍ നേടും.-കുനാല്‍ ശ്രേഷ്ഠ പറയുന്നു.