പാക്കിസ്ഥാന്‍ ടെസ്റ്റ് ടീമിലേക്ക് ഇടങ്കയ്യന്‍ ബാറ്റ്‌സ്മാന്‍ ഫവദ് അലാമിനെ തിരിച്ചുവിളിച്ചു. പത്ത് വര്‍ഷത്തിന് ശേഷമാണ് ഫവദ് പാക്കിസ്ഥാന്റെ ടീമിലെത്തുന്നത്. അടുത്തകാലത്ത് മികച്ച ഫോമിലേക്കു തിരിച്ചെത്തിയതാണ് ഫവദിനെ ടീമിലേക്കു തിരിച്ചുവിളിക്കാന്‍ പ്രേരിപ്പിച്ചത്. ബുധനാഴ്ച റാവല്‍പിണ്ടിയില്‍ ആരംഭിക്കുന്ന ശ്രീലങ്കയ്‌ക്കെതിരായ മത്സരത്തില്‍ ആലം കളിക്കും. ഈ പരമ്പരയിലൂടെ പാക്കിസ്ഥാന്‍ മണ്ണിലേക്ക് ടെസ്റ്റ് ക്രിക്കറ്റ് തിരിച്ചെത്തുകയാണ്. 2009 ജൂലൈയില്‍ ശ്രീലങ്കയാണ് അവസാനമായി പാക്കിസ്ഥാനില്‍ ടെസ്റ്റ് മത്സരത്തിനായി സന്ദര്‍ശിച്ചത്. ആ സമയത്താണ് ലാഹോറില്‍ വച്ച് ശ്രീലങ്കന്‍ ടീമിനെ ബസിനുനേരേ തീവ്രവാദികളുടെ ആക്രമണമുണ്ടായത്.
ഈ പരമ്പരയിലായിരുന്നു ഹവദിന്റെ ടെസ്റ്റിലെ അരങ്ങേറ്റവും. അരങ്ങേറ്റ മത്സരത്തില്‍ തന്നെ ശ്രീലങ്കയ്‌ക്കെതിരേ സെഞ്ചുറിയും നേടി. എട്ടു മാസത്തിന് ശേഷം ന്യൂസീലന്‍ഡിനെതിരെയാണ് ആലം അവസാനമായി കളിച്ചത്. അരങ്ങേറ്റ ടെസ്റ്റില്‍ ശ്രീലങ്കയ്‌ക്കെതിരെ സെഞ്ചുറിയടിച്ച ആലമിന് ഫസ്റ്റ് ക്ലാസ് ക്രിക്കറ്റില്‍ 56.84 ശരാശരിയുണ്ട്. ഐസിസി ലോക ടെസ്റ്റ് ചാമ്പ്യന്‍ഷിപ്പിന്റെ ഭാഗമായുള്ള പരമ്പരയില്‍ രണ്ടു മത്സരങ്ങളാണുള്ളത്. ഡിസംബര്‍ 19 മുതല്‍ കറാച്ചിയിലാണ് രണ്ടാം മത്സരം നടക്കുന്നത്.