ഐപിഎല്ലില്‍ ചെന്നൈ സൂപ്പര്‍ കിങ്‌സിനെതിരെ രാജസ്ഥാന്‍ റോയല്‍സിന് ഏഴ് വിക്കറ്റ് വിജയം. 10 കളികളില്‍നിന്ന് രാജസ്ഥാന് എട്ടു പോയിന്റുണ്ട്. ഏഴു മത്സരങ്ങള്‍ തോറ്റ ചെന്നൈ സൂപ്പര്‍ കിങ്‌സ് പട്ടികയിലെ അവസാന സ്ഥാനക്കാരാണ്.

ടോസ് നേടി ബാറ്റിങ് തിരഞ്ഞെടുത്ത ചെന്നൈ 20 ഓവറില്‍ അഞ്ച് വിക്കറ്റ് നഷ്ടത്തില്‍ 125 റണ്‍സെടുത്തു. 30 പന്തില്‍ 35 റണ്‍സെടുത്ത രവീന്ദ്ര ജഡേജയാണു ചെന്നൈയുടെ ടോപ് സ്‌കോറര്‍. എം.എസ്.ധോണി (28പന്തില്‍ 28), സാം കറന്‍ (25 പന്തില്‍ 22) എന്നിവരും ഭേദപ്പെട്ട പ്രകടനം പുറത്തെടുത്തു.

ചെന്നൈയുടെ ആദ്യ വിക്കറ്റ് 13 റണ്‍സില്‍ നില്‍ക്കെ ജോഫ്ര ആര്‍ച്ചറാണ് വീഴ്ത്തിയത്. 10 റണ്‍സെടുത്ത ഡുപ്ലേസിയെ ജോസ് ബട്‌ലര്‍ തകര്‍പ്പന്‍ ക്യാച്ചിലൂടെ പുറത്താക്കി. അധികം വൈകാതെ എട്ട് റണ്‍സെടുത്ത ഷെയ്ന്‍ വാട്‌സനും മടങ്ങി. ഒരു ഭാഗത്തു സാം കറന്‍ പൊരുതി നോക്കിയെങ്കിലും, അധികനേരം നീണ്ടില്ല. 25 പന്തുകള്‍ നേരിട്ട കറന്‍ 22 റണ്‍സെടുത്തു. 48 പന്തുകളില്‍നിന്ന് ചെന്നൈ 50 പിന്നിട്ടു. സ്‌കോര്‍ 56ല്‍ നില്‍ക്കെ അംബാട്ടി റായുഡുവിനെ രാഹുല്‍ തെവാട്ടിയ പുറത്താക്കി. തുടര്‍ന്ന് ധോണിയും രവീന്ദ്ര ജഡേജയും ചേര്‍ന്ന് ചെന്നൈ സ്‌കോര്‍ ഉയര്‍ത്തി. ഇതോടെ ചെന്നൈ സ്‌കോര്‍ 100 കടന്നു. 28 പന്തില്‍ 28 റണ്‍സെടുത്ത ധോണി റണ്ണൗട്ടായി. രവീന്ദ്ര ജഡേജയും കേദാര്‍ ജാദവും ചേര്‍ന്ന് ചെന്നൈ സ്‌കോര്‍ 120 കടത്തി. കേദാര്‍ ജാദവ് ഏഴ് പന്തുകളില്‍നിന്ന് നാല് റണ്‍സെടുത്തു പുറത്താകാതെനിന്നു.

മറുപടി ബാറ്റിംഗിനിറങ്ങിയ രാജസ്ഥാന് 26 റണ്‍സില്‍ നില്‍ക്കെ ആദ്യ വിക്കറ്റ് നഷ്ടമായി. 19 റണ്‍സെടുത്ത സ്റ്റോക്‌സ് ദീപക് ചാഹറിന്റെ പന്തില്‍ ബൗള്‍ഡാകുകയായിരുന്നു. രണ്ട് റണ്‍സിനപ്പുറം റോബിന്‍ ഉത്തപ്പയും മടങ്ങി. നാല് റണ്‍സ് മാത്രമെടുത്ത റോബിന്‍ ഉത്തപ്പയെ ഹെയ്‌സല്‍വുഡിന്റെ പന്തില്‍ ധോണി ക്യാച്ചെടുത്താണു മടക്കിയത്. റണ്ണൊന്നുമെടുക്കാതെ സഞ്ജു സാംസണും പുറത്തായി. സഞ്ജുവിന്റെ ബാറ്റില്‍ തട്ടിയ പന്ത് വിക്കറ്റിനു പിന്നില്‍നിന്ന് ധോണി പിടിച്ചെടുക്കുകയായിരുന്നു. തുടക്കത്തില്‍ മൂന്നു വിക്കറ്റുകള്‍ നഷ്ടപ്പെട്ടു പ്രതിരോധത്തിലായെങ്കിലും ജോസ് ബട്‌ലറിന്റെയും ക്യാപ്റ്റന്‍ സ്റ്റീവ് സ്മിത്തിന്റെയും കൂട്ടുകെട്ടാണു രാജസ്ഥാനെ വിജയത്തിലേക്കു നയിച്ചത്.

വിക്കറ്റ് പോകാതെ പതുക്കെ സകോര്‍ ഉയര്‍ത്തിയ ഇരുവരും 88 പന്തില്‍ രാജസ്ഥാനെ 100 കടത്തി. ഇതിനിടെ 37 പന്തുകളില്‍നിന്ന് ബട്‌ലര്‍ അര്‍ധസെഞ്ചുറി തികച്ചു. 17.3 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ രാജസ്ഥാന്‍ വിജയറണ്‍സ് കുറിക്കുകയും ചെയ്തു. 34 പന്തില്‍ 26 റണ്‍സെടുത്ത് ക്യാപ്റ്റന്‍ സ്റ്റീവ് സ്മിത്ത് പുറത്താകാതെ നിന്നു.

ചെന്നൈയ്ക്കായി ദീപക് ചാഹര്‍ രണ്ടും ജോഷ് ഹെയ്‌സല്‍വുഡ് ഒരു വിക്കറ്റും സ്വന്തമാക്കി. രാജസ്ഥാന്‍ റോയല്‍സിന് വേണ്ടി ജോഫ്ര ആര്‍ച്ചര്‍, കാര്‍ത്തിക് ത്യാഗി, ശ്രേയസ് ഗോപാല്‍, രാഹുല്‍ തെവാട്ടിയ എന്നിവര്‍ ഓരോ വിക്കറ്റ് വീതം വീഴ്ത്തി.