ഡല്‍ഹി ക്യാപിറ്റല്‍സിനെതിരെ സണ്‍റൈസേഴ്‌സ് ഹൈദരാബാദിന് 88 റണ്‍സ് ജയം. സ്‌കോര്‍: ഹൈദരാബാദ് 20 ഓവറില്‍ 2 വിക്കറ്റ് നഷ്ടത്തില്‍ 219 റണ്‍സ്. ഡല്‍ഹി 19 ഓവറില്‍ 131 റണ്‍സിന് ഓള്‍ഔട്ട്. ഈ തോല്‍വിയോടെ 12 മത്സരങ്ങളില്‍ നിന്ന് 14 പോയിന്റുമായി ഡല്‍ഹി ക്യാപിറ്റല്‍സ് മൂന്നാം സ്ഥാനത്തേക്കു പിന്തള്ളപ്പെട്ടു. അതേസമയം, ഇന്നത്തെ ജയത്തോടെ പ്ലേഓഫ് സാധ്യതകള്‍ നിലനിര്‍ത്തിയ സണ്‍റൈസേഴ്‌സ് ഹൈദരാബാദ്, 12 മത്സരങ്ങളില്‍ നിന്നു 10 പോയിന്റോടെ രാജസ്ഥാനെ മറികടന്ന് ആറാം സ്ഥാനത്തേക്കു കയറി. ഡല്‍ഹിയ്‌ക്കെതിരെ 88 റണ്‍സ് ജയത്തോടെ നെറ്റ് റണ്‍റേറ്റില്‍ മുംബൈയ്ക്ക് പിന്നില്‍ രണ്ടാം സ്ഥാനത്താണ് ഹൈദരാബാദ്.

220 റണ്‍സ് എന്ന കൂറ്റന്‍ വിജയലക്ഷ്യം പിന്തുടര്‍ന്ന് ബാറ്റിങ് ആരംഭിച്ച ഡല്‍ഹിയുടെ ഇന്നിങ്ങ്‌സിലെ മൂന്നാം പന്തില്‍ റണ്ണൊന്നുമെടുക്കാതെ ശിഖര്‍ ധവാന്‍ പുറത്തായി. ടീം സ്‌കോര്‍ 14 ആയപ്പോള്‍ ഷഹബാസ് നദീമിന്റെ ബോളിങ്ങില്‍ വാര്‍ണര്‍ ക്യാച്ചെടുത്ത് മാര്‍ക്കസ് സ്റ്റോയ്‌നിസും (5 റണ്‍സ്) പുറത്തായി. അജിന്‍ക്യ രഹാനെയും ഷിംറോണ്‍ ഹെറ്റ്‌മെയറും ചേര്‍ന്ന് ആറാം ഓവറില്‍ ഡല്‍ഹി സ്‌കോര്‍ 50 കടത്തി. ഏഴാം ഓവറില്‍ റാഷിദ് ഖാന്‍ ഡല്‍ഹിയ്ക്ക് ഇരട്ടപ്രഹരമാണേല്‍പ്പിച്ചത്. ആദ്യ പന്തില്‍ ബോള്‍ഡായി ഹെറ്റ്‌മെയറും (16 റണ്‍സ്), അഞ്ചാം പന്തില്‍ വിക്കറ്റിനു മുന്നില്‍ കുരുങ്ങി അജിന്‍ക്യ രഹാനെയും (26 റണ്‍സ്) മടങ്ങി.

10 ഓവര്‍ പൂര്‍ത്തിയായപ്പോള്‍ ഡല്‍ഹി 4 വിക്കറ്റ് നഷ്ടത്തില്‍ 73 റണ്‍സ് എന്ന നിലയിലായി. വിക്കറ്റുകള്‍ തുടരെ വീണതോടെ ഡല്‍ഹി പൂര്‍ണമായും പ്രതിരോധത്തിലായി. 12-ാം ഓവറില്‍ ക്യാപ്റ്റന്‍ ശ്രേയസ് അയ്യരും (7 റണ്‍സ്) 13-ാം ഓവറില്‍ അക്‌സര്‍ പട്ടേലും (1 റണ്‍) മടങ്ങി. പകരക്കാരന്‍ ഫീല്‍ഡര്‍ പ്രിയം ഗാര്‍ഗ് ക്യാച്ചെടുത്താണ് അക്‌സര്‍ പട്ടേല്‍ പുറത്തായത്. ഒരറ്റത്ത് ഋഷഭ് പന്ത് പ്രതിരോധിച്ചു നിന്നെങ്കിലും മറുവശത്ത് തുടരെ വിക്കറ്റുകള്‍ വീണതോടെ റണ്‍ നേടുന്നതില്‍ ഡല്‍ഹി ബുദ്ധിമുട്ടി. ഇതിനിടെ മികവുറ്റ ബോളിങ് പ്രകടനവുമായി റാഷിദ് ഖാന്‍ നാല് ഓവര്‍ പൂര്‍ത്തിയാക്കി. 4 ഓവറില്‍ ഏഴു റണ്‍സ് മാത്രം വഴങ്ങിയാണ് റാഷിദ് ഖാന്‍ മൂന്നു വിക്കറ്റുകള്‍ വീഴ്ത്തിയത്.

16-ാം ഓവറില്‍ കഗിസോ റബാഡയെ (3 റണ്‍സ്) ടി. നടരാജന്‍ ബൗള്‍ഡാക്കി. തൊട്ടടുത്ത ഓവറില്‍ സന്ദീപ് ശര്‍മയ്ക്കു വിക്കറ്റ് സമ്മാനിച്ച് ഋഷഭ് പന്തും (35 പന്തില്‍ 36 റണ്‍സ്) മടങ്ങി. 17 ഓവര്‍ പൂര്‍ത്തിയായപ്പോള്‍ ഡല്‍ഹി 8 വിക്കറ്റ് നഷ്ടത്തില്‍ 110 റണ്‍സ്. ഡല്‍ഹിയ്ക്ക് 18 പന്തില്‍ ജയിക്കാന്‍ വേണ്ടത് 110 റണ്‍സ്. ഓരോ ഓവറിലും 35 റണ്‍സിനു മേല്‍ നേടണമെന്ന നിലയിലായി ഡല്‍ഹി. അവസാന ഓവറുകളില്‍ തുഷാര്‍ ദേശ്പാണ്ഡെ ബൗഡറികള്‍ പായിച്ചെങ്കിലും വൈകിപ്പോയിരുന്നു. ജെയ്‌സന്‍ ഹോള്‍ഡര്‍ എറിഞ്ഞ 18 ാം ഓവറിലെ അവസാന പന്തില്‍ അബ്ദുല്‍ സമദ് ക്യാച്ചെടുത്ത് ആര്‍. അശ്വിന്‍ (7 റണ്‍സ്) പുറത്തായി. പിന്നാലെ ടി. നടരാജന്റെ പന്തില്‍ പ്രിയം ഗാര്‍ഗ് ക്യാച്ചെടുത്ത് ആന്റിച്ച് നോര്‍ജെ (1 റണ്‍) പുറത്തായതോടെ ഹൈദരാബാദിന്റെ വിജയം പൂര്‍ണം. തുഷാര്‍ ദേശ്പാണ്ഡെ (20 റണ്‍സ്) പുറത്താകാതെ നിന്നു.

നേരത്തെ, വൃദ്ധിമാന്‍ സാഹ (87 റണ്‍സ്), ഡേവിഡ് വാര്‍ണര്‍ (66 റണ്‍സ്), മനീഷ് പാണ്ഡെ (പുറത്താകാതെ 44 റണ്‍സ്) എന്നിവരുടെ ബാറ്റിങ് മികവില്‍ ഹൈദരാബാദ് 20 ഓവറില്‍ 2 വിക്കറ്റ് നഷ്ടത്തില്‍ 219 റണ്‍സെടുത്തു. 25 പന്തിലാണ് രണ്ടു സിക്‌സും ആറു ഫോറും സഹിതം 6-ാം ഓവറില്‍ വാര്‍ണര്‍ അര്‍ധ സെഞ്ചുറി തികച്ചത്. ഐപിഎല്ലിലെ ഈ സീസണില്‍ പവര്‍പ്ലേയില്‍ അര്‍ധ സെഞ്ചുറി നേടുന്ന ആദ്യ താരമാണ് വാര്‍ണര്‍. 9-ാം ഓവറില്‍ ഹൈദരാബാദ് സ്‌കോര്‍ 100 കടന്നു. ഓവറില്‍ 11-ലേറെ റണ്‍ റേറ്റിലായിരുന്നു ഹൈദരാബാദിന്റെ കുതിപ്പ്. 10 ാം ഓവര്‍ വാര്‍ണര്‍ വീണു. 107 റണ്‍സ് നേടിയ ശേഷമാണ് ഓപ്പണിങ് കൂട്ടുകെട്ട് പിരിഞ്ഞത്.

പത്ത് ഓവര്‍ പൂര്‍ത്തിയായപ്പോള്‍ ഹൈദരാബാദ് ഒരു വിക്കറ്റ് നഷ്ടത്തില്‍ 113 റണ്‍സ് എന്ന നിലയിലെത്തി. തൊട്ടടുത്ത ഓവറില്‍ വൃദ്ധിമാന്‍ സാഹ അര്‍ധ സെഞ്ചുറി തികച്ചു. ആന്റിച്ച് നോര്‍ജെ എറിഞ്ഞ 15-ാം ഓവറില്‍ ശ്രേയസ് അയ്യര്‍ ക്യാച്ചെടുത്ത് വൃദ്ധിമാന്‍ സാഹയെ മടക്കി. 45 പന്തില്‍ രണ്ടു സിക്‌സും 12 ഫോറുമുള്‍പ്പെടെ 87 റണ്‍സെടുത്താണ് സാഹ മടങ്ങിയത്. 67 റണ്‍സ് കൂട്ടുകെട്ട് പടുത്തുയര്‍ത്തിയ ശേഷമാണ് വൃദ്ധിമാന്‍ സാഹ - മനീഷ് പാണ്ഡെ സഖ്യം പിരിഞ്ഞത്. 15 ഓവര്‍ പൂര്‍ത്തിയായപ്പോള്‍ ഹൈദരാബാദ് രണ്ടു വിക്കറ്റ് നഷ്ടത്തില്‍ 175 റണ്‍സ്.

നിശ്ചിത 20 ഓവര്‍ പൂര്‍ത്തിയായപ്പോള്‍ ഹൈദരാബാദ് 20 ഓവറില്‍ 2 വിക്കറ്റ് നഷ്ടത്തില്‍ 219 റണ്‍സെടുത്തു. മനീഷ് പാണ്ഡെ 31 പന്തില്‍ ഒരു സിക്‌സും 4 ഫോറുമുള്‍പ്പെടെ 44 റണ്‍സോടെയും കെയ്ന്‍ വില്യംസന്‍ 10 പന്തില്‍ ഒരു ഫോറുമുള്‍പ്പെടെ 11 റണ്‍സോടെയും പുറത്താകാതെ നിന്നു. ഡല്‍ഹിയ്ക്കു വേണ്ടി ആര്‍. അശ്വിന്‍, ആന്റിച്ച് നോര്‍ജെ എന്നിവര്‍ ഓരോ വിക്കറ്റ് വീതം നേടി.