എനിക്ക് ലഭിച്ച ആയിരക്കണക്കിന് ആശംസകള്ക്ക് ഹൃദയം നിറഞ്ഞ നന്ദി! നിങ്ങളുടെ സ്നേഹം എന്നെ അദ്ഭുതപ്പെടുത്തി... തിങ്കളാഴ്ച റഷ്യയ്ക്കെതിരായ മത്സരത്തില് ടീമിനായി ആര്ത്തുവിളിക്കാന് ഞാനുണ്ടാകും, 'എനിക്ക് കൂട്ടുകാരെ കാണണം' ; ആശുപത്രി വിട്ട എറിക്സന് ടീം ക്യാംപില്!
യൂറോ കപ്പ് ഫുട്ബോള് മത്സരത്തിനിടെ കുഴഞ്ഞുവീണ ഡെന്മാര്ക്ക് താരം ക്രിസ്റ്റിയന് എറിക്സണ് ആശുപത്രി വിട്ടശേഷം ആദ്യം ആവശ്യപ്പെട്ടത് എനിക്കു ടീമംഗങ്ങളെ കാണണം എന്നാണ്. എറിക്സന്റെ ആഗ്രഹം പോലെ അതു യാഥാര്ഥ്യമായി. ടീം പരിശീലനം നടത്തുമ്പോഴായിരുന്നു പങ്കാളി സബ്രീനയ്ക്കും 2 ആണ്മക്കള്ക്കുമൊപ്പം എറിക്സന്റെ ആവേശ വരവ്.
എറിക്സന് ടീമംഗങ്ങളെ കാണാനെത്തിയ വിവരം ഡെന്മാര്ക്ക് ഫുട്ബോള് അധികൃതര് തന്നെയാണ് പുറം ലോകത്തെ അറിയിച്ചത്. 'ക്രിസ്റ്റ്യന് എറിക്സന്റെ ശസ്ത്രക്രിയ വിജയകരമായി പൂര്ത്തിയായി. അദ്ദേഹത്തെ ആശുപത്രിയില്നിന്നും ഡിസ്ചാര്ജ് ചെയ്തു. ഇന്ന് അദ്ദേഹം ടീം ക്യാംപിലെത്തി സഹതാരങ്ങളെ കണ്ടു. ഇനി വീട്ടിലേക്കു മടങ്ങുന്ന അദ്ദേഹം അവിടെ കുടുംബാംഗങ്ങളോടൊപ്പം കുറച്ചുകാലം സമയം ചെലവഴിക്കും'എന്നാണ് ഡെന്മാര്ക്ക് ഫുട്ബോള് അസോസിയേഷന് ട്വീറ്റ് ചെയ്തിരിക്കുന്നത്.
ഇതിനോടൊപ്പം ക്രിസ്റ്റ്യന് എറിക്സന്റെ സന്ദേശവും അവര് ട്വീറ്റ് ചെയ്തിരിക്കുകയാണ്. 'എനിക്ക് ലഭിച്ച ആയിരക്കണക്കിന് ആശംസകള്ക്ക് ഹൃദയം നിറഞ്ഞ നന്ദി.
നിങ്ങളുടെ സ്നേഹം എന്നെ അദ്ഭുതപ്പെടുത്തി. ശസ്ത്രക്രിയ വിജയകരമായിരുന്നു. നിലവില് ഞാന് സുഖമായിരിക്കുന്നു.
കഴിഞ്ഞ മത്സരത്തിലെ തകര്പ്പന് പ്രകടനത്തിനുശേഷം ടീമംഗങ്ങളെ കണ്ടത് മികച്ചൊരു അനുഭവമായിരുന്നു. തിങ്കളാഴ്ച റഷ്യയ്ക്കെതിരായ മത്സരത്തില് ടീമിനായി ആര്ത്തുവിളിക്കാന് ഞാനുണ്ടാകുമെന്ന് പ്രത്യേകം പറയേണ്ടതില്ലല്ലോ' എന്നായിരുന്നു ട്വീറ്റിലെ വാചകം.
"
https://www.facebook.com/Malayalivartha